TAUNET 35 - Bukuit Ne Tilil

Koteechei Jakobo Kaptisisyet eng' Bethel

¹ Ki leenji `Kamuktaindet Jakobo, “Ng'eet, ui togoste Bethel, imeny oliindo, ak iteekyi Kamuktaindet kaptisisyet eng' olooto, ineendet ne ki mong'jin ye ki imwee ng'eetap kamenng'ung' Esau.”

² Ki mwachi Jakobo anyun piigap koonnyi, ak tugul che ki mi kobooto ineendet koleenji, “Olakte kanamonik che mi kwenung'wong' che po pororyosyek alak, oanyinygei ak owal ngoroikwok.

³ Ong'eetyee anyun, keebe ketogoste Bethel, si awo ateekyi Kamuktaindet kaptisisyet eng' oliindo, ineendet ne ki wolwo eng' peetuutap pichiindanyu ak ki mi kobooto eng' pandanyu.”

⁴ Ki igoochi anyun `pichooto Jakobo kanamonichooto tugul po pororyosyek alak che ki tinyei, ak munaok che ki mi itiikwak, ak ki uny Jakobo chooto eng' keetitap alayet keel ne ki mi Shekem.

⁵ Ak ye kibendi anyun, ko ki tebee kamuisetap Kamuktaindet nganasook che ki mi ole neegitee icheeget, ak ma isup icheek weeriigap Jakobo.

⁶ Ki it anyun Jakobo Luz (nooto ko Bethel), ne mi emetap Kanaan, ak piik tugul che ki mi kobooto ineendet.

⁷ Ki teech kaptisisyet eng' olooto, ak koguure olooto El-bet-el, amu yooto ko ye king'aang'jinegei Kamuktaindet, ye kingo mwee ng'eetap kamet.

⁸ Ak kime Debora cheplakwetap Rebeka, ak ki kitupchi ole neegitee Bethel, eng' keetit keel ne ki mi olooto. Ki kiguure keetoto Alon-bakut.

⁹ Komong'ji `Kamuktaindet Jakobo kogeny, ye ki punu Padan-aram, ak koberuur ineendet.

¹⁰ Koleenji Kamuktaindet, “Kaineng'ung' ko Jakobo; ma keguurenen Jakobo kogeny, ago ngeguurenen Israel.” Ak kiguure kainennyi Israel.

¹¹ Ak koleenji Kamuktaindet, “Aa Kamuktaindet Ne po Kamuktaet. Ii ak itesage, tuun mong'unenen inyee pororyet ak chaang'indap pororyosyek, ak mang'unen laitorinik.

¹² Tuun agoonin emonooto ki agoochi Abraham ak Isak, ak agoochini lagoguk ak icheek che tuun piitu let.”

¹³ Ki wo anyun Kamuktaindet eng' yooto kotogosta eng' ole ki ng'alaale.

¹⁴ Ki lumda Jakobo toloita eng' yooto ki ng'alaale, toloita ne po koita, ak koroong'ji kagoochinet ne po tuguuk che kieei, yeityo koroong'ji mwaita.

¹⁵ Ak kiguure Jakobo kainetap yooto ki ng'alaale ak Kamuktaindet, Bethel.

Sigeetap Benjamin ak meetap Rael

¹⁶ Ki pa anyun eng' Bethel, ak kingo tomo koit Eprat, koam moet Rael, ak konyoor pichiindo eng' moonooto

¹⁷ Ye ki machei kosigiis eng' pichiindo, koleenji chebyosetap sigisyo, “Meiywei amu imache isich weeriit age nguno.”

¹⁸ Ye kingo machei kome Rael, koguuree lakwanooto kainennyi Ben-Oni, ago kiguure `kwandanyi lakwanooto Benjamin.

¹⁹ Ki me Rael, ak ki kitupchi ooreet ne wendi Eprat (yooto ko Bethlehem).

²⁰ Ak ki lumda Jakobo toloita eng' kererinnyi, toloatap kereritap Rael ne agoi ra.

²¹ Kiu anyun Israel, ak ki teech emainnyi taitap teekseet ne kooi eng' Eder.

²² Ye kita komenyei Israel emonooto, kwo Reuben koruiyo ak Bila, chebaigeiyatap kwandanyi; ak ki kas Israel ng'olyoondonooto. Ki taman ak aeng' weeriigap Jakobo.

²³ Chu ko weeriigap Leah: ne po tai ko Reuben, (ne oo ne po Jakobo) Simion, Lawi, Judah, Issakar, ak Zebulun.

²⁴ Chu ko weeriigap Rael: Joseph ak Benjamin.

²⁵ Chu ko weeriigap Bila, kwondo ne ki otwogindetap Rael: Dan ak Naphtali.

²⁶ Chu ko weeriigap Silba, kwondo ne ki otwogindetap Leah: Gad ak Asher. Chuuto ko ki weeriigap Jakobo che kisichei eng' Padan-aram.

Meetap Isak

²⁷ Ki it anyun Jakobo Mamre, kap Isak kwandanyi, eng' Kiriath-arba (nooto ko Hebron), ole ki cham komenyei Abraham ak Isak ye kita ko toek.

²⁸ Kenyiisyegap Isak ko ki pogol ak tamanwogik sisiit.

²⁹ Ki ilil Isak, ak ki kiyum kobooto piikwak, ko poiyo ne kiga koosit miising'. Ak kitup ineendet weeriikyik Esau ak Jakobo.