TAUNET 31 - Bukuit Ne Tilil

Komwee `Jakobo Laban

¹ Ki kas anyun Jakobo kong'alaaldos weeriigap Laban koleen, “Ki kokweri Jakobo tugul che po kwandanyo; ak ki konyoor mogornatoni tee ni eng' tuguugap kwandanyo.”

² Ak ki keer `Jakobo togeetap Laban kole ma ko uu atkinye tai.

³ Ki leenji `Kamuktaindet ne Toroor Jakobo, “Ketitegei, ui emetap kwanisyeguk ole ki kisikyinin, ak ami kobooten.”

⁴ Ki iyookto Jakobo chii kwo kewaniin ole mi akweennyi koguur Rael ak Leah,

⁵ ak ipkoleenji, “Ageere ale ma ko uu togeetap kwandang'wong' atkinye tai, ago kigotebi Kamuktaindet ne po abba kobooto.

⁶ Ongen ole ki aoot kwandang'wong' eng' kimnateennyu tugul.

⁷ Nga ki koberbera kwandang'wong' ak ki kowal melektanyu konyil taman, koma chamji Kamuktaindet koyaiywo ne ya.

⁸ Ye kingo mwa kole, ‘Egu melektang'ung' che ibisyonen,’ ko ki iiyo anyun tugul che ibisyonen; ak ye kingo mwa kole, ‘Egu melektang'ung' che keronen,’ ko ki iiyo anyun tugul che keronen.

⁹ Ko uu nooto anyun-i, kogigetune `Kamuktaindet kwandang'wong' akweet ak kogoono.

¹⁰ Ak ye kingo machei korisyo neego, ageer eng' karwotitoet kwesik che laanyei neego ak ki keronen, ak che ibisyonen ak che mologonen.

¹¹ Ki kuura malaikaiyatap Kamuktaindet eng' karwotitoet, kole, ‘Jakobo,’ ak ki ale, ‘Ami yu.’

¹² Kole, ‘Keerote, si inai ile, keronen ak ko ibisyonen ak ko mologonen kwesik tugul, che laanyei neego; amu kaageer chooto tugul che yaun Laban.

¹³ Anee Kamuktaindet ne po Bethel, ole ki iroong'jine mwaita toloita ak ki iyasyeunena. Ng'eet anyun, ui eng' emoni, iweege ole ki kisikyinin.’ ”

¹⁴ Ki wolji anyun Rael ak Leah koleenji, “Tos miitei kebeberta anan kiy ne kinyooru eng' kootap kwandanyo?

¹⁵ Tos ma ki itech keele ki po oor age? Ki koaldech ak kigoamenech tuguuk.

¹⁶ Nenyo ak lagokyok mogornatoni ki ibe Kamuktaindet kwandanyo. Ara anyun yai kiy age tugul ne kagomwaun Kamuktaindet.”

¹⁷ Ki ng'eet anyun Jakobo, ak kochop lagokyik ak kwonyiikyik kolaany tambeesik.

¹⁸ Ki kweri akwotisyekyik tugul, ak tuguukyik tugul che kiga koyum, agot akwotisyek che kiga konyoor, che kiga koyum eng' Padan-aram, si kobiit kouto anyun koba kapkwandanyi Isak eng' emetap Kanaan.

¹⁹ Kichoor Rael kanamonigap kwandanyi Laban, ye kigawo Laban kotil koroorigap keechiirekyik.

²⁰ Ki ng'aal `Jakobo Laban Syrianindet, amu ma mwachi koleenji amache awo, ago ki ung'atkei.

²¹ Ki imweito anyun tuguuk tugul che ki tinyei; ak king'eet kolandae aineet, kwo kotokyigei tulweetap Gilead.

Kosubi `Laban Jakobo

²² Ye ki ngemwachi Laban eng' peetuutap somok keleenji, kogomwei Jakobo,

²³ komut tupchosyekyik, koba kobooto ineendet koosup, ak eng' peetuutap tisap konyoorchi tulweetap Gilead.

²⁴ Ki nyoonji `Kamuktaindet Laban Syrianindet kemoi eng' karwotitoet koleenji, “Riipkei, amemwachi Jakobo ng'olyoo, ne myee anan ne ya.”

²⁵ Ki it anyun Laban ole mi Jakobo. Kiga teech Jakobo emainnyi eng' tulweet. Ki nyo koteech Laban ak tupchosyekyik ak icheek tulweetap Gilead.

²⁶ Koleenji `Laban Jakobo, “Ki iyai nee kot ing'ala ak iung'anugei, ak imutu tiibiikyuk ko uu luulenik che ki kiname rotwetap chok?

²⁷ Kilya si imweu iung'anugei ak ing'ala, ne ma imwaiwo, si kobiit aunden iwe eng' poiboiyet ak tyenwogik, ak sugutit ne ming'in ak ketubet;

²⁸ ak ma igang'wa ang'utut weeriikyuk ak tiibiikyuk? Ki iyai eng' perberyo.

²⁹ Atinye kimnateet ayaiywok ne ya; ago kong'alaalwo Kamuktaindetap kwandang'wong' lagat koleenjo, ‘Riipkei, si memwachi Jakobo kiy ne myee anan ne ya.’

³⁰ Ago angen ale koitau panda, amu amin emo agobo kootap kwandang'ung', ago kilya si ichoor kanamonikyuk?”

³¹ Kowolji `Jakobo Laban koleenji, “Amu ki aiyweisye, ale, abeere imuuchi irebena tiibiiguk eng' kimnateet.

³² Ago meei age tugul ne inyoorchini kanamoniguk. Inyit eng' taitap tupchosyekyok kiy age tugul ne neng'ung' ne atinye si iip.” Amu ki ma nai Jakobo kole kichoor Rael tuguuchooto.

³³ Ki chut anyun Laban emaitap Jakobo, ne po Leah ak emaitap otwogik aeng' che tiibiik ago ma nyoor kanamonichooto. Yeityo komong' eng' emait ne po Leah ak kochut ne po Rael.

³⁴ Kingo kagoip Rael kanamonichooto konde tuguuk oriit che ki iitoe tambeesik ak kotebee. Ak ki isyach Laban ola tugul kosapsabat eng' emait ago ma nyoor.

³⁵ Ak ki leenji `Rael kwandanyi, “Amat konereekyo kiptaiyandennyu, amu ma muuchi ang'eet eng' taing'ung'; kanama atebeetap kwonyiik.” Ak ki cheeng' kot, ago ma nyoor kanamonik.

³⁶ Ki nereech anyun Jakobo ak kobolyo ak Laban. Ki wolji `Jakobo Laban koleenji, “Nee lelutyennyu? Nee chalwoktonyu, kot isubwo ko uu ni eng' nereegek?

³⁷ Nga kaisyach ak isapsabate tuguukyuk tugul, ko nee ne po tuguugap koong'ung' ne kenyooru? Nde yu, taitap tupchosyekyuk ak tupchosyeguk, si kobiit kobesyewech acheek tuwai.

³⁸ Ki atebi kobooten eng' kenyisyechu tiptem; ma oos keechiireguk ak ng'orooreguk, ama aam mengichigap akweeng'ung'.

³⁹ Ak ki ma aibun ne ki par tyondo kotonaton; ki ageerunenen nenyu. Ki imagena nooto, ngo ne kiga kichoor peet anan ngo ne kiga kichoor kemoi.

⁴⁰ Ki atebi ko uu nooto, kibiro kiptoret peet, ak ki para kaitityet kemoi ak ki ma anuuchi.

⁴¹ Ki atebee koong'ung' eng' kenyisyechu tiptem; ki aootin kenyiisyek taman ak ang'wan agobo tiibiiguk aeng', ak ki aootin kenyiisyek lo agobo akwotisyeguk, ak ki iwal melektanyu konyil taman.

⁴² Nda ki ma komi kobooto Kamuktaindet ne po abba, Kamuktaindetap Abraham, ak Ineendet ne iywei Isak, ko kiteona awo puch. Kogogeer Kamuktaindet nyalildanyu ak poisyetap eunekyuk, ak kogerin kong' lagat anyun amu nooto.”

⁴³ Eng' yooto kowolji `Laban Jakobo koleenji, “Tipchu ko tiibiikyuk, ak lagochu ko lagokyuk, ak akwotisyechu ko akwotisyekyuk, ak tuguuchu tugul igeere ko chechuuk. Ago alyonjini anyun tipchuchuk rani, ak lagokwak che ki kosich?

⁴⁴ Ara anyun, nyoo kiyasyechigei, inyee ak anee; si koek paornateet eng' kwenunnyo, inyee ak anee.”

⁴⁵ Ki nam anyun Jakobo koita kolumda koek toloita.

⁴⁶ Ak koleenji Jakobo tupchosyekyik, “Oyum koik,” ak ki iyum koik, yeityo koruruuch; ak ki amis eng' ye neegitee karurugutyonooto po koik.

⁴⁷ Ak kiguure Laban yooto Jegar-sahadutha, ago kiguure Jakobo Galeed.

⁴⁸ Ki le Laban, “Karurugutyoni ko paornateet eng' kwenunnyoo, inyee ak anee ra.” Ki kiguure anyun kainetap yooto Galeed amu nooto,

⁴⁹ ak ki kiguure kogeny Mispa, amu ki le, “Ingoek Kamuktaindet ne Toroor riibindet eng' kwenunnyoo, inyee ak anee, ye ma kigeeregei.

⁵⁰ Ngot ko tuun ius tiibiikyuk, anan ngot ko tuun itun kwonyiik alak isyone tiibiikyuk, nga ma mi chii kwenunnyoo, ko paoryat Kamuktaindet eng' kwenunnyoo, inyee ak anee.”

⁵¹ Yeityo koleenji `Laban Jakobo, “Keer karurugutyoni, keer toloi, ne kaalumde eng' kwenunnyoo, inyee ak anee.

⁵² Paoryat karurugutyoni, ak paoryat toloi ale si ma siiru karurugutyoni anyoo ayaun kiy ne ya, ak si mesiiru aginye karurugutyoni ak toloi, inyoo iyaiywo kiy ne ya.

⁵³ Ingorwookseiywech Kamuktaindetap Abraham, ak Kamuktaindetap Nahor, Kamuktaindetap kwandanywa.” Ak ki iyasyo Jakobo agobo Ineendet ne iywei Isak kwandanyi.

⁵⁴ Ki igoito Jakobo tiseiywot eng' tulweet, yeityo koguur tupchosyekyik kobwa koamis. Ki amis ak kiruiyo tulwoonooto eng' lagatunooto.

⁵⁵ Ak king'eet Laban karon miising', kong'utut mochogoronikyik ak tiibiikyik ak ki iberuur. Yeityo kwo anyun Laban koweektagei oldanyi.