TAUNET 30 - Bukuit Ne Tilil

¹ Ye kingo keer Rael kole mata kosikyi Jakobo lagok, koam ng'etkong' ineendet agobo chepkamet. Koleenji Jakobo, “Kono lagok, ak ngo megono, amee.”

² Ki pa parak nereegegap Jakobo eng' Rael, ak ki leenji, “Tos ko ageeregei Kamuktaindet ne kaetenen iyoteet?”

³ Koleenji `Rael Jakobo, “Keero, mi otwogindennyu Bila. Otuiyegei ak ineendet, si kobiit kosigiis ak ki ityon lagok eng' ineendet.”

⁴ Ki igoochi otwogindennyi Bila koek kwondonyi, ak ki ituiyogei Jakobo ak ineendet.

⁵ Ki manach anyun Bila, ak ki sikyi Jakobo weeriit.

⁶ Kole Rael, “Kagoyaiywo ne myee Kamuktaindet, ak kagogas kutinnyu ak kagogoono weeriit”; Kiguure kainennyi Dan amu nooto.

⁷ Ki manach kogeny Bila otwogetap Rael, ak ki sikyi Jakobo weeriit ne po aeng'.

⁸ Ak ki le Rael, “Kagibelgei ak chepkamennyu eng' kabeletapkei ne oo, ak kaaterter.” Ki kuure weerooto ki sich kainennyi Naphtali.

⁹ Kingo kagogeer Leah kole mata kosich lagok ineendet, konam Silba otwogindennyi kogoochi Jakobo koek kwondonyi.

¹⁰ Ki sikyi Silba otwogindetap Leah Jakobo weeriit.

¹¹ Ak ki le Leah, “Kagoek saboon ra!” Ak kiguure kainennyi Gad.

¹² Ki sikyi Silba otwogindetap Leah Jakobo weeriit ne po aeng'.

¹³ Ki le anyun Leah, “Agasigei! Amu tuun kuureno tiibiik ne igasegei.” Kiguure kainennyi Asher.

¹⁴ Ki wo Reuben eng' peetuusyek che po kesisyetap nganuuk, ak kinyoor tuguuk che uu labotik eng' keeweet, ak ki ipchi kamet Leah. Ki leenji `Rael Leah eng' yooto, “Kaigai igoono tuguuchooto uu labotik, cho kaibu weeriing'ung'.”

¹⁵ Kowolji Leah koleenji, “Tos igeere ile ma kiy ngirebena manong'otyonnyu, ak imache irebena labotigap weeriinnyu ak icheek?” Kole Rael, “Myee koru koong'ung' rani amu labotigap weeriing'ung'.”

¹⁶ Ye ki punu Jakobo kewaniin koskoleny kwo Leah kotorookta ak koleenji, “Kanyool inyoo iru koonnyu, amu kaalin eng' labotigap weeriinnyu.” Ki ru anyun koonnyi kemounooto.

¹⁷ Ak ki kas `Kamuktaindet Leah, ak ki manach, ak kosikyi Jakobo weeriit ne po muut.

¹⁸ Ki le anyun Leah, “Kagogoono Kamuktaindet melektanyu, amu ki agoochi manong'otyonnyu otwogindennyu.” Kiguure anyun kainennyi Issakar.

¹⁹ Ki manach Leah kogeny, ak ki sikyi Jakobo weeriit ne po lo.

²⁰ Ak ki le Leah, “Kagogoono Kamuktaindet kanyiok che myach; kobooch nguno ko kagitebi ak manong'otyondennyu, amu ki asikyi weeriik lo.” Kiguure kainennyi Zebulun.

²¹ Kingo pata chooto kosich chepto, ak koguuree kainennyi Dina.

²² Ki ibwaat `Kamuktaindet Rael, ak ki kas `Kamuktaindet ineendet ak kotyach moennyi.

²³ Ki manach ak kosich weeriit, ak kole, “Kagoistaiwo Kamuktaindet chotisyennyu.”

²⁴ Ak kiguure kainennyi Joseph, ak kole, “Ingoteswa Kamuktaindet ne Toroor weeriit age.”

²⁵ Ye kingo kagosich `Rael Joseph, koleenji `Jakobo Laban, “Meto awo, si kobiit awechigei agoi emennyu.

²⁶ Chamwo kwonyiikyuk ak lagokyuk amu ki aootin agobo icheeget, pagaakta awo, amu ingen inyee otwoknateennyu ne ki aootin.”

²⁷ Koleenji Laban, “Ngo ki anyooru myeeindo eng' taing'ung', ki ageer komyee ale ki koberuura Kamuktaindet ne Toroor agobo inyee,

²⁸ ara mwaiwo melekto ne imache, si agoonin.”

²⁹ Ki wolji Jakobo koleenji, “Ingen inyee ole ki aootiten, ak ole uu tuguuk che ki ayagi.

³⁰ Amu ki itinye che ng'ering' ye kitom aitu, ak ki kotesagis kochang'a; ak ki koberuurin Kamuktaindet ne Toroor kobooch ngap aitu. Ago nguno anyun, ko tos anyooru kotya si achopchi tuguuk piigap koonnyu?”

Melekto ne ki kigoochi Jakobo

³¹ Ki leenji Laban, “Agoonin nee?” Ak ki le Jakobo, “Amegono kiy, ngot iyaiywo kii amache, amuuchi ayagun akwotisyeguk kogeny ak ariip.

³² Chamwo achut akwotisyeguk tugul rani alewenoti, ak ateer ak atabaan artet age tugul ne ibisia ak ne pusye, ak aarwet age tugul ne tuui, ak ne ibisia, ak ne pusye, eng' ng'oroorek, si koek chooto melektanyu.

³³ Ak tuun paoryanjino imandanyu, ye tuun inyoo agobo melektanyu ne mi taing'ung'. Nginyoorcha ne ma ibisia ak ne ma pusye eng' ng'oroorek, ak ne ma tuui eng' aarek, iit ile ki kichoorei.”

³⁴ Ki le Laban, “Keero, ingotep ko uu ye kaimwa.”

³⁵ Ak ki itabaan Laban peetuunooto kwesik che keronen ak che pusyenen, ak iyuogik tugul che ibisyonen ak che pusyenen, ak age tugul ne ki tinyei che leelach, ak aarek tugul che tuuen, kokweri kogoochi weeriikyik.

³⁶ Ak ki wo Laban koistoegei Jakobo ne tee pandap peetuusyek somok, ak ki iyaga Jakobo neego che po Laban che ki ituuch.

³⁷ Kibut anyun Jakobo korokweek che po keetiik che uu siliboik che tuonen, ak che uu mobonik ak che uu kurinik, ak ki ibony kolegenitu si kotook ole leelachen eng' kirokwechooto.

³⁸ Ki lumda kirokwechooto ki ibony kotoorchi moingonik eng' ole ee peek neego; ak korisyo ko kabwa nyo koe peek.

³⁹ Kirisyo neego eng' taitap kirokweek, ak ki iyo neego che keronen ak che ibisyonen ak che pusyenen.

⁴⁰ Ki itabaan Jakobo aarek, ak kitokyi neego ole mi che keronen ak tugul che tuuen eng' neegap Laban. Ak ki inde akwotisyekyik oldanywa icheegei, ma ituiyo ak che po Laban.

⁴¹ Eng' ui tugul ye ristos neego che neryootiin, konde Jakobo kirokweek eng' taitap konyegap neego eng' moingonik, si korisyo eng' ye mi kirokweek;

⁴² ago ki ma indochi neego che sogityotiin. Ki punji anyun Laban chooto sogityotiin, ak kobunji Jakobo che neryootiin.

⁴³ Ara ki ek mogoryo Jakobo miising' ak ki tinyei akwotisyek che chaang', tiibiik ak murenik che otwogik, tambeesik ak sigiroik.