TAUNET 25 - Bukuit Ne Tilil

Kaliletap Abraham

¹ Ki itun Abraham kwondo age ne kiguure Ketura,

² ak ki sikyi Simran, Joksan, Medan, Midian, Isbak, ak Sua.

³ Ak ki sich `Joksan Sheba ak Dedan. Weeriigap Dedan ko ki Asurik, Letusik ak Leumik.

⁴ Weeriigap Midian ko ki: Ephah, Epher, Hanok, Abida ak Eldaa. Chuuto tugul ko ki lagogap Ketura.

⁵ Ki pogokyi `Abraham Isak tuguuk tugul che ki tinyei.

⁶ Ago ye kita kosabei ko ki igoochi weeriigap chebaigeinikyik, kagoochinoik ak koleenji koba koistogei eng' ole mi weeriinnyi Isak, koba emetap kong'asiis.

⁷ Kenyiisyek che ki tar Abraham kosabei, ko pogol ak tamanwogik tisap ak muut.

⁸ Ki ilil Abraham ko kagoosit miising', ko poiyot ne kiga konyi peetuusyekyik, ak ki kiyum kobooto piikyik.

⁹ Kitup ineendet weeriikyik Isak ak Ishmael eng' kebeneetap Makpela ne tokyingei Mamre, ne mi mbareetap Epron, weeriitap Sohar Hitindet,

¹⁰ ne ki alee Abraham piigap Het. Yooto ye ki kitupchi Abraham, ak Sarah kwondonyi.

¹¹ Kingo kagobata kaliletap Abraham, ko ki iberuur `Kamuktaindet Isak weeriinnyi, ak ki meny Isak ole neegitee keriingetap peek ne kiguure Beer-lahari-roi.

¹² Chu ko ortinwegap Ishmael, weeriitap Abraham, ne ki sikyi Hagar Chemisiryot otwogindetap Sarah,

¹³ Chu isubi ko kainaigap weeriigap Ishmael, ko uu kainaikwak ak ko uu ortinwekwak: lakweet ne po tai ne po Ishmael ko Nebaiot; yeityo korup Kedar, Adbeel, Mibsam,

¹⁴ Misma, Duma ak Massah;

¹⁵ Hadad, Tema, Jetur, Napis, ak Kedema.

¹⁶ Chu ko weeriigap Ishmael, ak chu kainaikwak, eng' nganasookwak, ak eng' meng'ootennywa; pounik taman ak aeng' ko uu pororyosyekwak.

¹⁷ Kenyiisyegap Ishmael che ki tar kosabei, ko pogol ak sosom ak tisap. Kingo lil ineendet, ko ki kigonor kobooto piikyik.

¹⁸ Ki meng'oot kobooch Havilah agoi Shur ne tokyingei Misiri, eng' ooreet ne wendi Assyria, ki wo komeny olooto eng' taitap tupchosyekyik tugul.

Sigeetap Esau ak Jakobo

¹⁹ Chu ko ortinwegap Isak, weeriitap Abraham: kisichei `Abraham Isak.

²⁰ Ki po Isak kenyiisyek artam ye kingo tuni Rebeka, cheptap Bethuel Syriaindet ne po Padan-aram, chepkametap Laban Syriaindet.

²¹ Ki riirchi `Isak Kamuktaindet ne Toroor miising' agobo kwondonyi, amu kisoon. Ki kasyi Kamuktaindet ne Toroor riirekyik ak ki manach Rebeka kwondonyi.

²² Kingo tomono, kobelgei lagok eng' moennyi; ak ki le, “Ngot ko uu nooto, ko kalya si atep ko uu ni?” Ak ki wo koteebe Kamuktaindet ne Toroor.

²³ Ak ki leenji Kamuktaindet ne Toroor, “Miitei moeng'ung' pororyosyek aeng'u, ak tuun pcheegei pororyosyek chu aeng'u punu moeng'ung'; kimitu pororyet age kosiir age; ak koot ne oo ne ming'in.”

²⁴ Ye kingo it anyun peetuunnyi ne po kosigiis, ogeero, ki mi sarameek moennyi.

²⁵ Ki indoi ne oo, ak kibiriir. Ki sabul poorto tugul ko uu sambut ak kiguure kainennyi Esau.

²⁶ Kingo pata nooto kesich ng'eetap kamet ne kinamonu kwaryatap Esau; ki kiguure kainennyi Jakobo. Ki po Isak kenyiisyek tamanwogik lo ye kingo sichei kwondonyi lagochooto.

²⁷ Ki egitu weerchooto, ki kiplogotyot ne ng'oom Esau, chiito ne po timiin. Ago ki chiito Jakobo ne tala ne kimeng'ooti emaisyek.

²⁸ Ki chamei `Isak Esau, amu ki amei panyeek che ki ibune logeet, ago ki chamei `Rebeka Jakobo.

²⁹ Ye kingo chobei Jakobo sogoryek, koit Esau kobunu timiin, ko kang'et miising'.

³⁰ Koleenji anyun `Esau Jakobo, “Kaigai, koono aam amitwogichu piriireen amu kaatanui!” Ki kiguure kainennyi anyun Edom amu nooto.

³¹ Koleenji Jakobo, “Aldaiwo korook imandap etunateng'ung' ne po sigeet.”

³² Kole Esau, “Keero, neegit ame; tos tilei nee eng' anee etunateet ne po sigeet?”

³³ Ak ki leenji Jakobo, “Iyosyeiwo rani.” Ak ki iyasyechi anyun ineendet ak ki aldochi Jakobo etunatennyi ne po sigeet.

³⁴ Yeityo kogoochi `Jakobo Esau magatyat ak sogoryek che kiyoe che kiguure lendil. Ki am ak koe, yeityo kong'eet kwo. Ara ki mata koiit anyun Esau etunatennyi ne po sigeet koek kiy.