TAUNET 2 - Bukuit Ne Tilil

¹ Ki kigees anyun yaetap kipsengwet ak ng'wony ak chaang'indonywa tugul.

² Ki igees Kamuktaindet eng' peetuutap tisap poisyonikyik che kiga koyai. Ki imuuny eng' peetuunooto po tisap eng' poisyonikyik tugul che kiga koyai.

³ Ki iberuur anyun Kamuktaindet peetuutap tisap ak kotabaan, amu ki imuuny eng' peetuunooto eng' poisyonikyik tugul che ki toi Kamuktaindet koyai.

Adam ak Hawa eng' mbareetap Eden

⁴ Uu ni anyun ole ki kiyaita kipsengwet ak ng'wony eng' peetuunooto, ne ki yai Kamuktaindet ne po Toroornatet kipsengwet ak ng'wony.

⁵ Ki tomo kobiit keet ne po keeweet eng' ng'wony, ak ki tomo kobiityo keetiik alak tugul che mengeechen che po keeweet, amu ki tomo kogoochi Kamuktaindet ne po Toroornatet korobonji ng'wony, ak ki ma komi chii ne iboti ng'wony.

⁶ Ago ki mong' peek eng' ng'wony ak koobis ng'wony komugul.

⁷ Ak ki yai Kamuktaindet ne po Toroornatet chiito eng' ng'ung'unyek, ak kobusyi seruunekyik kabuuset ne po saboondo. Ki ek anyun chiichooto chiito ne sabei.

⁸ Ki kool Kamuktaindet ne po Toroornatet mbareet eng' Eden eng' komostap kong'asiis, ak konde olooto chiichooto ne kiga koyai.

⁹ Ak ki igoochi Kamuktaindet ne po Toroornatet kobiit keet age tugul eng' ng'wony ne karaaran eng' keeret ak ne myee eng' ameet. Ki mi eng' kwenutap mbareet keetit ne po saboondo ak keetit ne po naet ne kinae ne myee ak ne ya.

¹⁰ Ki mang'une Eden aineet ne ibisi mbareet; yeityo kopcheigei koek ainoosyek ang'wan.

¹¹ Kainetap ne po tai ko Pison. Ainooni ko ne yiemei emet komugul ne po Havilah ole mi thahabu ak

¹² myachen thahabu che po emonooto; miitei olooto nyamdutik che ng'uu che kiguure Bedola ak koik che po kamanuut che kiguure Soam.

¹³ Kiguure aineet ne po aeng' Gihon; nooto ne yiemei emet komugul ne po Kush.

¹⁴ Kiguure aineet ne po somok Tigris. Ainooni ko ne wendi komostap kong'asiis ne po Assyria. Kiguure aineet ne po ang'wan Yufrets.

¹⁵ Ki imut Kamuktaindet ne po Toroornatet chiito kwo kotebee mbareetap Eden si kobiit koseemberi ak koriibei.

¹⁶ Ki ng'at Kamuktaindet ne po Toroornatet chiichooto koleenji, “Imuuchi iam logoek che po keetit age tugul ne imache ne mi mbareet;

¹⁷ ago amat iam che po keetit ne po naet ne kinae ne myee ak ne ya. Amu eng' peetuut ne keam che po keetoto, imee ne matiny.”

¹⁸ Yeityo komwa Kamuktaindet ne po Toroornatet kole, “Ma myee kotebi chii ineegei; ayachini ne toreti ne kergei ak ineendet.”

¹⁹ Ara ki yai anyun Kamuktaindet ne po Toroornatet tyony age tugul ne po ng'wony eng' ng'ung'unyek, ak toriitik alak tugul che po parak, yeityo kokwerichi chiichooto tyong'ichooto kogeer ole tachindoi kainaik. Ak kainet ne kiguure chiichooto kiy age tugul ne sabei, ko ki ek kainennyi nooto.

²⁰ Ki toochi anyun chiichooto kainai kiyak tugul, toriit che po parak, ak tyong'in alak tugul che po ng'wony. Ago ki ma piit ne toreti chiichooto ne kergei ak ineendet.

²¹ Ara ki yai anyun Kamuktaindet ne po Toroornatet chiichooto koru rwondo ne nyigiis, ak ye ki inuuchi, konem karaasta agenge, ak kotuge yooto panyeek kogeere karasato.

²² Ak eng' karasato ki inemune chiichooto, koyai Kamuktaindet ne po Toroornatet koek kwony ak komutyi chiichooto.

²³ Yeityo komwa anyun chiichooto kole, “Ni anyun nguno ko kaweet ne po kawekyuk, ak panyeek che po panyeegap poortanyu; kiguure kainennyi Kwony, amu kaginemune Muren.”

²⁴ Amu nooto anyun, pagaktoi mureno kwandanyi ak kamennyi ak konamgei ak kwondonyi, ak koek icheek poorto agenge.

²⁵ Ki mi aach ngor tuwai, chiichooto ak kwondonyi, ak ki ma koliilandos.