TAUNET 18 - Bukuit Ne Tilil

Kayomisetap Weeriit

¹ Kimong'ji `Kamuktaindet ne Toroor Abraham eng' ye neegitee keetiigap Mamre kotebyei eng' kurgeetap emainnyi ko kang'wanit asiista.

² Kingo tabendo, kogeer piik somok kotonondos ko kaitoorchigei ineendet. Ye kingo keer, komanda ak kolabat kotorookta kong'etee kurgeetap emainnyi ak ipkogutung'ji icheek.

³ Ak kile, “Kiptaiyandennyu, ngot ko kaanyooru myeeindo eng' taing'ung', asaain ale amesiirtoe otwogindeng'ung',

⁴ ingeibwok peek tutigin, si oune keelyekwok, ak omuuny eng' keetit keel.

⁵ Ya tugul aibwok amitwogik tutigin, si ogimegitu, ak ye ibata otestai eng' pandang'wong', amu kaaoitu uitugul kap otwogindeng'wong'.” Kowol icheek kole, “Yai ko uu ye kaimwa.”

⁶ Ki chaakta anyun Abraham kwo ko ole ki mi Sarah, ak ipkoleenji, “Chokyi ker keruutik somok che po peek che ng'ootiin che tambulul ak itangwar si ichop magatiinik.”

⁷ Ki labat Abraham ole ki mi tuuga kwo koget kiptoiyot ne myee, ak kogoochi otwogindet ne ki chokyi kochop.

⁸ Yeityo konam mwaitap cheego, cheego, ak kiptoiyondonooto kagagechop konde tainnywa, ak kotonon ineendet eng' ole neegitee keetit keel yooto ki amisyei icheek.

⁹ Ki teebee `icheek ineendet koleenji, “Mi ano Sarah kwondong'ung'?” Kowolji koleenji, “Mi emait oriit.”

¹⁰ Koleenji agenge eng' icheek, “Aweekyiningei iman peetuusyek che uu chu eng' kenyiit ne nyoonei, ak keero, sichei `kwondong'ung' Sarah weeriit.” Ki ebei iit Sarah komi kurgeetap emait ne ki mi patai.

¹¹ Kiga koosegitu Abraham ak Sarah; ki tinyei kenyiisyek che chaang', ak kiga kong'et iyato Sarah.

¹² Kirori anyun Sarah eng' muguleldanyi koleen, “Tos ta abaibaitu ago kogotertera osindo, ak kagoosit agine manong'otyonnyu?”

¹³ Ak ki leenji `Kamuktaindet ne Toroor Abraham, “Amu nee si korori Sarah koleen, ‘Tos ta amuuchi iman anee asich lakwa ko kaaositu?’

¹⁴ Tos mi kiy age tugul ne temenee Kamuktaindet ne Toroor? Aweekyiningei peetuusyek che uu chu eng' kenyiit ne nyoonei, eng' peetuut ne kaachop, ak sichei `Sarah weeriit.”

¹⁵ Amu ki iywei anyun Sarah, kotiiyo kole, “Ma aroori.” Ak ki leenji, “Achicha; keroori.”

Saaetap Abraham agobo Sodom

¹⁶ Ki ng'eetyo anyun pichooto koba eng' yooto, kotokyigei Sodom ko yamisi Abraham.

¹⁷ Ak ki le Kamuktaindet ne Toroor, “Tos aung'e Abraham iman kiit ne amache ayai,

¹⁸ ago tuun egu Abraham ne matiny pororyet ne oo ne tinyei kimnateet, ne kiberuure pororyosyek tugul che po ng'wony?

¹⁹ Amu ki alewen ineendet si komuuch koboi lagokyik ak koonnyi ne tuun piitu, si kobiit koriip ooreetap Kamuktaindet ne Toroor eng' yaeet ak kirwoogetap imanda; si kosuldochi `Kamuktaindet ne Toroor Abraham kiit ne ki mwa agobo ineendet.”

²⁰ Ak ki le Kamuktaindet ne Toroor, “Oo kateiyet agobo Sodom ak Gomorah, ak kosamisen tengekwogikwak miising'.

²¹ Achoortaigei anyun nguno asi ageer ngo ki koyai iman ko uu kateiyennywa, ne ki konyoonjo, ak ngo ma uu nooto, anai.”

²² Ki week anyun pichooto eng' olooto ak koba kotokyigei Sodom, kita kotonon Abraham eng' taitap Kamuktaindet ne Toroor.

²³ Kiriikyi anyun `Abraham Kamuktaindet ne Toroor, ak koteebe koleenji, “Tos iwong'u piik che po iman kobooto che yaacheen?

²⁴ Ngot komi piik che po iman konomu eng' nganaseet; ko tos iwong'u ameriree nganaseet agobo pichooto konom che po iman che mi olooto?

²⁵ Ingolooit eng' inyee, yaeet ne uu ni, ne kebarei che po iman kobooto che yaacheen; si kogergeit che po iman ak che yaacheen. Ingolooit eng' inyee nooto. Tos ma yaei iman Kirwoogindet ne po ng'wonyuni komugul.”

²⁶ Kole Kamuktaindet ne Toroor, “Ngot anyoorchi Sodom piik konom che po iman, ariiree anyun olooto tugul amu icheek.”

²⁷ Ak ki wolji Abraham kole, “Keero, kaagany ang'alaalji Kiptaiyat, nga aa temburyek ak ko aa oreek kityo.

²⁸ Tos ngot koma piit piik muutu eng' piik konom che po iman, ko tos ing'em nganaseet komugul amu piik muut che ma mi?” Ak ki le, “Ma ng'eme ngot anyoorchi piik artam ak muut.”

²⁹ Kita kong'alaalji kogeny koleenji, “Ngot anyun kenyoorchi artam?” Kowol kole, “Ma yae kiy amu chooto artam.”

³⁰ Kole, “Amat konereech Kiptaiyat, si kota ang'alaal. Ngot anyun kenyoorchi sosom.” Kole, “Ma yae kiy, ngot anyoorchi sosom.”

³¹ Kole, “Keero, kaagany ang'alaalji Kiptaiyat. Ngot anyun kenyoorchi tiptem olooto?” Kole, “Ma ng'eme amu chooto tiptem.”

³² Kole, “Amat konereech Kiptaiyat, si kota amwa ni kityo. Ngot kenyoorchi taman olooto?” Kole, “Ma ng'eme amu chooto taman.”

³³ Ye kingo tar anyun Kamuktaindet ne Toroor kong'alaaldos ak Abraham, kwo pandanyi; ak ki week Abraham kwo kaa.