TAUNET 12 - Bukuit Ne Tilil

Kuursetap Abram

¹ Ki leenji anyun `Kamuktaindet ne Toroor Abram, “Ui inyee eng' emeng'ung', eng' kaptilyonutiguk ak eng' kootap kwandang'ung' agoi emet ne amache aboorun.

² Ayain iegu pororyet ne oo, ak aberuurin, ak atoroor kaineng'ung' koeet, si iegu kaberuret.

³ Aberuuri icheek che iberuurin, ak achube ineendet ne sasin; kiberuuri pororyosyek tugul che po ng'wony eng' inyee.”

⁴ Ki wo Abram anyun ko uu ye kiga komwachi Kamuktaindet ne Toroor, ak ki wo Lot kobooto ineendet. Ki po Abram kenyiisyek tamanwogik tisap ak muut ye kingo mandoi eng' Haran.

⁵ Ki imut `Abram chebyosennyi Sarai, kobooto Lot weeriitap ne tupcho, ak tuguukwak tugul che ki tinyei, ak piik che kiga konyoor eng' Haran. Ki manda koba emetap Kanaan ak ki it anyun emonooto.

⁶ Ki wo Abram kobun emet kween agoi koit ole mi keetitap Moreh eng' Shekem. Eng' peetuusyechooto ko ki mi Kanaanik emonooto.

⁷ Ki mong'ji anyun `Kamuktaindet ne Toroor Abram ak koleenji, “Agoochini iyoteng'ung' emoni.” Amu nooto koteekyi Abram kaptisisyet Kamuktaindet ne Toroor, ne kiga mong'ji ineendet.

⁸ Kiu kwo eng' olooto kotokyigei emetap tuloonook eng' komostap kong'asiis ne po Bethel, ak koteech emainnyi, si eng' komostap cherongo, ko ki mi Bethel, ko eng' komostap kong'asiis, ko Ai. Ki teekyi kaptisisyet Kamuktaindet ne Toroor eng' olooto, ak ki kuur kainetap Kamuktaindet ne Toroor.

⁹ Ki u Abram kogeny kotokyigei komostap Murot Tai.

Abram eng' Misiri

¹⁰ Ki piit rubeet eng' emonooto, ak kichoortagei anyun Abram kotokyigei Misiri, kwo korutoochi olooto amu kieet ak kong'wanit rubeet eng' emet.

¹¹ Ye ki neegit komong'ji Misiri, koleenji kwondonyi Sarai, “Kaigai, angen ale ii murereet ne karaaran,

¹² ak ye keerin piigap Misiri, ko agoi komwa icheek kole, ‘Kwondonyi ni,’ ak yeityo kobara ak kobagachin.

¹³ Kaigai mwaa ile ii tupchennyu, si komyeeit eng' anee agobo inyee, ak kosap saboondanyu amu inyee.”

¹⁴ Ye kingo it `Abram Misiri, kogeer piigap Misiri kole karaaran Sarai miising'.

¹⁵ Ak ye kingo keer pounigap Pharaoh, kochoi Sarai eng' tainnyi, ak ki kimut anyun ineendet kwo kootap Pharaoh.

¹⁶ Ak ki yachi `Pharaoh Abram ne myee agobo ineendet; kinyoor keechiirek ak tuuga, otwogik che murenik ak che tiibiik, kiruugik ak iyuogigap sigirok, ak tambeesik.

¹⁷ Ago ki pir anyun `Kamuktaindet ne Toroor Pharaoh ak piigap koonnyi eng' pirutik che eecheen amu Sarai, kwondap Abram.

¹⁸ Ki kuur Pharaoh anyun Abram ak koleenji, “Nee ni ki iyaiywo? Ki lya si memwaiwo ile Sarai ko kwondong'ung'?

¹⁹ Ki lya si imwa ile, ‘Ineendet ko tupchennyu?’ Ak ki amutyigei anyun amu nooto aleen koek kwondonyu. Ang'ni kwondong'ung', imut ak iwe!”

²⁰ Ki ng'at `Pharaoh piik komut ineendet eng' ooreet kobooto kwondonyi ak tuguuk tugul che ki tinyei.