TAUNET 11 - Bukuit Ne Tilil

Teekseetap Babel

¹ Ki ng'alaali ng'wony komugul kutit agenge ak ng'alaalet agenge.

² Ak ye kingo ta kobendi kong'etee kong'asiis, konyoor atebweet eng' emetap Shinar, ak ki meny olooto.

³ Ki ng'alaaljigei anyun icheegei kole, “Ong'eetyee keyai ak kebeel matubaruk kobelogis.” Ki poisyee matubaruk ne kita koik, ak meneet ne kita ng'enda.

⁴ Yeityo komwachigei kole, “Obwa keteekyigei nganaseet ak keteech koot ne kooi ne togostoi parak, ne itei kimonjogunnyi parak kipsengwet, si keyaigei keegu che taagunotiin, si mata keyeste eng' ng'wony komugul.”

⁵ Ki choorgei Kamuktaindet ne Toroor konyo kooro nganaseet ak teekseet ne kooi ne ki togosta kwo parak, ne kiga koteech weeriigap piik.

⁶ Ki le Kamuktaindet ne Toroor, “Ogeero, agenge pichu ak ko po tugul kutit agenge, ak kagotoi koyai kiy ne uu ni. Ma mi kiy ne tos etee icheek si ma yai kiy ne machei.

⁷ Ongebe, kechoortegei anyun ak kitoiye kutusweekwak si mata kogasyin icheegei eng' ng'alaalet!”

⁸ Ko uu nooto anyun, koiyestaat `Kamuktaindet ne Toroor icheek koyom ng'wony komugul; ak kimeto icheek teekseetap nganaseet.

⁹ Ki kiguure nganasanooto Babel, amu ki itoiye yooto Kamuktaindet ne Toroor kutusweek che po ng'wony komugul; ak ki iyeesta `ineendet icheek koyom ng'wony komugul.

Piik che po Ooreetap Shem

¹⁰ Chu isubi komwaiwech agobo ortinwegap Shem; ye kingo po Shem kenyiisyek pogol, ko ki sich Arbaksat eng' kenyiit ne po aeng' kogagobata maraneet.

¹¹ Ki meng'iis Shem kenyiisyek pogol muut ye kingo kagosich Arbaksat, ak ki sich weeriik ak tiibiik.

¹² Ki meng'iis Arbaksat kenyiisyek sosom ak muut, kosich Shelah.

¹³ Ki meng'iis Arbaksat kenyiisyek pogol ang'wan ak somok ye kingo kagosich Shelah, ak ki sich weeriik ak tiibiik.

¹⁴ Ki meng'iis Shelah kenyiisyek sosom, kosich Eber.

¹⁵ Kotar Shelah kenyiisyek pogol ang'wan ak somok ye kingo kagosich Eber, ak ki sich weeriik ak tiibiik.

¹⁶ Ki meng'iis Eber kenyiisyek sosom ak ang'wan, kosich Peleg.

¹⁷ Ak ki tar Eber kenyiisyek pogol ang'wan ak sosom ye kingo kagosich Peleg, ak ki sich weeriik ak tiibiik.

¹⁸ Ki meng'iis Peleg kenyiisyek sosom, kosich Reu.

¹⁹ Ki tar Peleg kenyiisyek pogol aeng' ak sogool ye kingo kagosich Reu, ak ki sich weeriik ak tiibiik.

²⁰ Ki meng'iis Reu kenyiisyek sosom ak aeng', kosich Serug.

²¹ Ak ki tar Reu kenyiisyek pogol aeng' ak tisap ye kingo kagosich Serug, ak ki sich weeriik ak tiibiik.

²² Ki meng'iis Serug kenyiisyek sosom, kosich Nahor.

²³ Ak ki tar Serug kenyiisyek pogol aeng' ye kingo kagosich Nahor, ak ki sich weeriik ak tiibiik.

²⁴ Ki meng'iis Nahor kenyiisyek tiptem ak sogool, kosich Tera.

²⁵ Ak ki tar Nahor kenyiisyek pogol ak taman ak sogool ye kingo kagosich Tera, ak ki sich weeriik ak tiibiik.

²⁶ Ki meng'iis Tera kenyiisyek tamanwogik tisap, kosich Abram, Nahor, ak Haran.

Iyoteetap Tera

²⁷ Chu ko ortinwegap Tera; ki sich `Tera Abram, Nahor, ak Haran, kosich `Haran Lot.

²⁸ Ki me Haran eng' taitap kwandanyi Tera eng' emet ne ki kisikyin, eng' Ur emetap Kaldeik.

²⁹ Ki itunis Abram ak Nahor. Chebyosetap Abram ko ki kiguure Sarai, ak ne po Nahor keguure Milkah, cheptap Haran, kwanitap Milkah ak Iska.

³⁰ Ki sonen Sarai; ki ma kotinyei lakwa.

³¹ Ki imut `Tera weeriinnyi Abram, ak Lot weeriitap weeriinnyi Haran, ak Sarai kwondap weeriinnyi Abram. Ki pa tugul emetap Ur ne po Kaldeik, koba agoi emetap Kanaan, ak ye kingo it Haran, komeny olooto.

³² Peetuusyegap sabeetap Tera, ko ki kenyiisyek pogol aeng' ak muut; ak ki me ineendet eng' Haran.