SEPANIA 3 - Bukuit Ne Tilil

Yaityetap Jerusalem

¹ Pwo! Ineendet ne ngelelyot ne ki kong'wanit, nganaseet ne usiisyei!

² Ki ma kas iit mwaet; kimataach katigonet; ki ma imang' Kamuktaindet ne Toroor; ki ma riikyi Kamuktaindennyi.

³ Uu pounikyik che mi kwenunnyi ng'etunyik che porisendos, ak ko uu suigap koskoleny kirwoogikyik, che ma ituuchi kiy agoi koeech.

⁴ Piik che tangusen ak koberberisyei maotikyik: ki komurwon tisiikyik ole-tiliil, Ki kong'em ng'atuutik.

⁵ Po iman Kamuktaindet ne Toroor ne mi kwenunnyi; ma yaei tengekto; iboortoi kirwoogennyi karonet age tugul, yaei kosulda; ago ma ililandos piik che ma po iman.

⁶ Ki abar pororyosyek; Ki kong'emogis irimoikwak che torooreen; ki abut ortinwekwak kot koma kobunei chii: Ki kong'emogis nganasookwak kot koma komi chii, kot koma komi chii ne menyei.

⁷ Ki amwa ale, iywea iman, itaache katigonet; si ma ki isto meng'ootennyi, ko uu tugul che ki ang'at agobo ineendet. Ne katanooto kotestai koyai koyagitu miising' poisyonikwak tugul.

Kergong'yet ak waletapkei ne po pororyosyek

⁸ Ogeno anyun, mwaei Kamuktaindet ne Toroor, kot koit peetuut ne aipchini kirwooget. Ye katil ayum pororyosyek, ale atuiyo pounatosyek, si aroong'ji icheek nereegekyuk, nereegekyuk tugul che koroomen. Ne matiny ko tuun kibeelei ng'wony tugul eng' maatap ng'etkondanyu.

⁹ Amu tuun aweekyini anyun piik eng' peetuunooto kutit ne myee, si koguur tugul kainetap Kamuktaindet ne Toroor, ak koboisyechi eng' mageet agenge.

¹⁰ Tuun ibwo kagoochinennyu piikyuk che saa, cheptap piikyuk che ki koyesta, kobunu pitoniin eng' ainoosyegap Kush.

¹¹ Ma tuun ililani eng' peetuunooto amu poisyoniguk tugul che ki iyaiywo eng' pistoet. Tuun aistoi komong' eng' kwenung'ung' menotik ak che itoroorigei, si ma ichaugei kogeny eng' tulweennyu ne tiliil.

¹² Ago abagachi eng' kwenung'ung' piik che kinyaliili ak ko kibananook, ak komong' icheek kainetap Kamuktaindet ne Toroor.

¹³ Ma koyaei tengekto piik che ki ng'et che po Israel, ama komwaei lembechek; ama kinyoorchin ng'olyoot ne po ng'aalseet kutusweekwak. Ago tuun amisyei ak koruiyo, ama piitu chii ne imui icheek.

¹⁴ Tyen, ee cheptap Zion; waach, ee Israel! Igaskei ak ibaibaitu eng' muguleldang'ung' tugul, ee cheptap Jerusalem!

¹⁵ Kagoisto Kamuktaindet ne Toroor kirwoogutiguk, ki koon punyondeng'ung'. Mi kwenung'ung' laitoryatap Israel, ineendet Kamuktaindet ne Toroor; ma iywei yaityet agoi.

¹⁶ Kimwachin Jerusalem eng' peetuunooto keleenjin: “Meiywei, ee Zion, amat ingochorirenso euneguk.

¹⁷ Mi kwenung'ung' Kamuktaindet ne Toroor Kamuktaindeng'ung', ineendet Kiplugotyot ne koonu katerteerisyet. Poiboitunenen eng' poiboiyet, siisei eng' chamyennyi. Poiboitunenen eng' tyendo,

¹⁸ ko uu eng' peetuutap igoorto.” Ayumi icheek che aragendos agobo tuiyet ne po kaming'inetapkei, che ki chechuuk, che ki kas nyigiisindo eng' chotisyonooto.

¹⁹ Keero, aborye eng' peetuusyechooto icheek tugul che inyaliilin. Ak asaru ineendet ne ing'wali, ak amutu ineendet ne ki kioon; ak awale kalilanennywa koek kalasunet ak konaak kainennywa eng' ng'wony tugul.

²⁰ Amutwok eng' peetuusyechooto, ak ayumak eng' peetuusyechooto: amu ayaok onaage ak olasunage eng' kwenutap pororyosyek tugul che po ng'wony, ak tuun aweekwok poroteet ogeere, mwaei Kamuktaindet ne Toroor.