SEPANIA 2 - Bukuit Ne Tilil

Nyoonjin kirwooget puunigap Israel

¹ Oyumgei, ee, oyumgei, ee pororyet ne ma tinyei kalilanet;

² kotom kosulda ng'atuutyet, kotom kosiirto peetuut ko uu meteteek, kotom kobwanjok nereegek che koroomen che po Kamuktaindet ne Toroor, kotom konyonjok peetuutap nereegegap Kamuktaindet ne Toroor.

³ Ocheeng' Kamuktaindet ne Toroor, okweek tugul che oo talaen, che oo po ng'wony, okweek che oyae kirwoogutikyik; ocheeng' imanda, ocheeng' talasyet: imuuch tuun kiunyok eng' peetuutap nereegegap Kamuktaindet ne Toroor.

⁴ Tuun kiuee Gaza, ak koek karaatya Askelon; ki oonei Ashdod ko katelel asiis, ak kitutu Ekron.

⁵ Pwo! Piik che menyei ngeguut, pororyetap Keretik! Poryenen ng'olyootap Kamuktaindet ne Toroor, ee Kanaan, emetap Philistiik; ang'emin kot koma komi chii ne meng'iisyei.

⁶ Ak koek ngeguusyek ole kiyagisye, ak ole mi kooriigap mestoweek kobooto piusyegap akwotisyegap keechiirek.

⁷ Ak kobunji ngeguut piik che ki ng'et che po kootap Judah; iyage akwotisyekwak olooto: eng' kooriigap Askelon koskoleny; amu rutochin Kamuktaindet ne Toroor Kamuktaindennywa, ak komut icheek kogeny eng' ole kiga kiluulji.

⁸ Ki agas chotisyetap Moab, ak churisyosyegap lagogap Ammon, che kichote piikyuk, ak kochaunegei kiwotennywa.

⁹ Mwaei anyun Kamuktaindet ne Toroor ne po lugoosyek, Kiptaiyat Kamuktaindetap Israel kole ko uu ye asabe, koigeitu Moab Sodom, ak koigei lagogap Ammon Gomorah, punjin siwek, ak keriingonigap muunyuk, ak koguber agoi: luulei piikyuk che ng'etu icheek, ak konam pororyennyu ne ki ng'et icheek koek porotennywa.

¹⁰ Nyooru niito amu menatennywa, amu kigochot ak kochaunegei piigap Kamuktaindet ne Toroor ne po lugoosyek.

¹¹ Egu Kamuktaindet ne Toroor kamuiset eng' icheek; amu iteenyi `ineendet kamuktaik tugul che po ng'wony, ak kolas piik tugul ineendet, ilasu chii age tugul eng' oldanyi, kobooto ngeguusyek tugul che po pororyosyek.

¹² Okweek Ethiopik, parok rotwennyu po chok.

¹³ Ak kochuul eunnyi kotokyi komostap kaataam, ak kong'em Assyria; ak koyai Nineveh koek karaatya, ak koyaam, ko uu surkwen.

¹⁴ Ak koruiye akwotisyek kwenunnyi, tyong'ik tugul che po pororyosyek: ak kotebee chebo kibabaa ak chepswererit metowegap tolochikwak: tyendos eng' tirisyok: tebee kubernateet tugatugik: amu kigong'aany tuguuk che ki kituge taragonik.

¹⁵ Ni nganaseet ne paibai ne ma iiti kiy, ne ki mwa eng' muguleldanyi kole anee kityo, ma mi age kobatena: kagoek karaatya ne tya, ole ruitos tyong'igap timiin! Reenyei ineendet age tugul ne siirtoi, ak kong'wereri.