SEPANIA 1 - Bukuit Ne Tilil

¹ Ki nyoonji `ng'olyootap Kamuktaindet ne Toroor Zephaniah weeriitap Kusi, weeriitap Gedalia, weeriitap Amariah, weeriitap Hezekiah, eng' peetuusyegap Josiah weeriitap Ammon, laitoryatap Judah.

Kirwooget ne nyoonjin Judah

² Ageesu tuguuk tugul eng' ng'wony, mwaei Kamuktaindet ne Toroor.

³ Ageesu piik ak tyong'ik; ageesu toriitigap parak, ak njireenigap nyanjet, andachini kanagutik kiptengeginik; ak aiste piik eng' ng'wony, mwaei Kamuktaindet ne Toroor.

⁴ Aluukyini `eunnyu Judah, ak piik tugul che menyei Jerusalem; ak abar ng'etuunenigap Baal, kobooto kainetap Kemarik ak tisiik;

⁵ ak icheek che ilasu tuguuk tugul che po kipsengwet, eng' kooriik parak; kobooto icheeget che ilasu, che iyasyechin Kamuktaindet ne Toroor, ak koyastos eng' kainetap Malkam;

⁶ ak icheek che ki week kometo Kamuktaindet ne Toroor; kobooto icheek che ma cheeng' Kamuktaindet ne Toroor, anan koteepse ineendet.

⁷ Osisye eng' taitap Kiptaiyat Kamuktaindet ne Toroor: amu kagoriik peetuutap Kamuktaindet ne Toroor: amu kagochop Kamuktaindet ne Toroor tiseiywot, kagoanyiny toekyik.

⁸ Ak tuun abire eng' peetuutap tiseiywotap Kamuktaindet ne Toroor, pounik, weeriitap laitoryat, kobooto icheek tugul che ilaachi ngoroigap toek.

⁹ Ak abire eng' peetuunooto tugul che toroombenjin tugatuk, che inyiiti kootap kiptaiyannywa koroomnateet ak ng'aalseet.

¹⁰ Mwaei Kamuktaindet ne Toroor kole tuun piitu eng' peetuunooto waagaatap riirek ne punu ormariichetap njireenik, ak waagaat ne punu kebebertap nganaseet, kobooto cheet ne oo ne punu tuloonook che mengeechen.

¹¹ Owaach okweek piik che omenye Maktes, amu kabek chemung'arainik tugul: ak ki parei icheek tugul che ki tinyei fedhaisyek ng'iisyat.

¹² Ak asyaach Jerusalem eng' peetuusyechooto akweng'ate; ak abir piik che ki kotepto kimnateennywa ko uu divaik che mi ak misigiikyik, che mwaei eng' mugulelwekwak kole ma yaei Kamuktaindet ne Toroor ne myee, ama yaei yaityet.

¹³ Ak keluul mogornatennywa, ak koguber kooriikwak: ee, teechei kooriik, ago ma menyei; ak komiin mbareenigap sabibuk, ago ma eei divaikwak.

¹⁴ Kariik peetuut ne oo ne po Kamuktaindet ne Toroor, neegit ak kochogu miising', ak ko ng'waan tweguunet ne po peetuutap Kamuktaindet ne Toroor; riirei eng' olooto nyiganeet eng' tuugeet ne oo.

¹⁵ Egu peetuunooto peetuutap nereegek, peetuutap nyalilda ak ng'wanindo, peetuutap kubernateet ak ng'emisyet, peetuutap imeenindo ak mesundeito, peetuutap poolik ak imeenindo ne oo.

¹⁶ Peetuutap iryageet ak waagaat, agobo nganasook che ng'ootaatiin, ak irimoik che torooreen.

¹⁷ Ak aipchi piik pichiindo, kot kobendat ko uu piik che koryotiin, amu ki koyachi Kamuktaindet ne Toroor tengekto: ak ketumda korotiikwak ko uu temburyek, ak keraanda poorwekwak ko uu ng'atateek.

¹⁸ Ama imuuchi fedhaisyekwak anan thahabusyekwak kosar icheek eng' peetuutap nereegegap Kamuktaindet ne Toroor; ago kibeelei emet komugul eng' maatap ng'etkondanyi: igeesu, ee, igeesu eng' kamuiset icheek tugul che menyei emet.