SEKARIA 9 - Bukuit Ne Tilil

Kirwooget ne nyoonjin puunigap Israel

¹ Nyigiisindap ng'olyootap Kamuktaindet ne Toroor agobo emetap Hadrak, ak egu Damasko ole tebee. Amu tokyingei `Kamuktaindet ne Toroor piik tugul, ak pororyosyek tugul che po Israel;

² kobooto Hamath agine ne mi kiwotennyi, Tyro ak Sidon, nga keeregei ko utaatiin miising'.

³ Ak kiteekyigei Tyro irimeet, ak ki iyum fedha ko uu temburyek, ak koyum thahabu che korooron ko uu ng'atateegap ortinwek.

⁴ Ogeero, oonei Kiptaiyat ineendet, ak kowiirchi kimnateennyi nyanjet; ak kebeel.

⁵ Keerei Askelon ak koiyweis; keerei Gaza agine, ak konyoor ng'wanindo ne oo; ak Ekron agine, amu ililani eng' kamang'unennyi. Ak kobet laitoryat eng' Gaza, ama kemenyei Askelon.

⁶ Ak komeny `chiito ne po sarbuch Ashdod, ak ageesu menoteetap Philistiik.

⁷ Ak aiste korotiikyik eng' kutinnyi, ak aiste tuguukyik che kiweechei eng' kelekyik; ak punjin `ineendet agine ne ng'etu Kamuktaindennyo; ak koigei poror eng' Judah, ak koigei `Ekron Jebusindet.

⁸ Ak ameng'iisye ayiem koonnyu si agirinda lugeet, si ma pun chii yooto anan koweegegei. Ama mi usiindet ne punei kwenunnywa agoi, amu kaageer nguno eng' konyekyuk.

Laitoryat ne po kaalyeet

⁹ Paibaitu miising', ee cheptap Zion! Waach, ee cheptap Jerusalem! Keero, nyoonjinin laitoryandeng'ung'; po iman ineendet ak kotinyei yetunet; iming'inegei ak kolong'onu sigiryet, moitap sigiryet ne kirgit.

¹⁰ Ak ang'em chepkichutitap lugeet eng' Ephraim, kobooto paraisiit eng' Jerusalem, ak kigees kwangetap pooryeet; ak komwachi pororyosyek kaalyeet; ak pochitu pounatennyi nyanjet age agoi nyanjet age, ak koboochit aineet agoi ole poochin ng'wony.

¹¹ Ago eng' inyee, ko ki ayookte kimonjororiniguk eng' keriinget ne ma mi peek, amu korotiigap kayomiseng'ung'.

¹² Oweekyigei irimeet, ee okweek kimonjororinik che otinye kamang'unet; agot rani amwae ale, ageerun konyil aeng'.

¹³ Amu ki ariikyigei Judah ko uu kwanget, ak ayai Ephraim koek kipchabonikyik. Ang'eeti weeriiguk, ee Zion, kobargei ak weeriiguk, ee Greece, ak ayain iige rotwetap chok ne po chiito ne nyigan.

¹⁴ Ak kotook Kamuktaindet ne Toroor eng' paragunnywa, ak kwo ne kipchabennyi ko uu kalyeleet; ak koguut Kiptaiyat Kamuktaindet ne Toroor iryageet, ak kwo kobooto kipchurchurinik che po murot tai.

¹⁵ Ak koriip Kamuktaindet ne Toroor ne po lugoosyek icheek; ak kogees ak kotyekyi ng'wony koik che ki wiirtoe porowet; ak koeeiso ak kowaakyo ko uu che kae divaik, ak kinyiit ko uu taabook, ko uu luukwegap kaptisisyet.

¹⁶ Eng' peetuunooto, kosaru `Kamuktaindet ne Toroor Kamuktaindennywa icheek, ko uu akweetap keechiiregap piikyik; amu tuun kergeitu ak koik che po chepkulet, iluu icheek miising' eng' emennyi.

¹⁷ Amu oo ne tya myeeindonyi ak korooronindonyi! Igoochin `peek murenik koneryo, ak kogoochin `divaik che leelach tiibiik koneryo.