SEKARIA 8 - Bukuit Ne Tilil

Kayomisutigap Kamuktaindet ne Toroor agobo Jerusalem

¹ Ki nyoonjo ng'olyootap Kamuktaindet ne Toroor ne po lugoosyek koleenjo,

² Mwaei Kamuktaindet ne Toroor ne po lugoosyek kole: “Amo ng'etkong' agobo Zion, ng'etkonda ne oo, ak amo ng'etkong' agobo ineendet eng' nereegek che ng'woneen miising'.

³ Mwaei Kamuktaindet ne Toroor kole: Kaaweekyigei Zion, ak ameny kwenutap Jerusalem: ak keguure Jerusalem ‘Nganaseet ne po iman’; ak keguure tulweetap Kamuktaindet ne Toroor ne po lugoosyek, ‘Tulweet ne tiliil.’

⁴ Mwaei Kamuktaindet ne Toroor ne po lugoosyek kole: Ta komenyei poisyek ak chebyosok ortinwegap Jerusalem kotinyei chii age tugul kiroktonyi amu osindo?

⁵ Ak konyi ortinwek che po nganaseet ng'etiik ak tiibiik che urerendos eng' ortinwechooto?

⁶ Mwaei Kamuktaindet ne Toroor ne po lugoosyek kole: Ngot ko po kwong'eet eng' konyegap piik che ng'etu eng' pichu eng' peetuusyechooto, ko tos ma po kwong'eet agine eng' konyekyuk? Mwaei Kamuktaindet ne Toroor ne po lugoosyek.

⁷ Mwaei Kamuktaindet ne Toroor ne po lugoosyek kole: Ogeero, asaru piikyuk eng' emet ne po kong'asiis ak eng' emet ne po cherongo;

⁸ ak amutu icheek ak komeny kwenutap Jerusalem. Ak koek `icheek piikyuk ak aegu Kamuktaindennywa, eng' imanit ak eng' imanda.”

⁹ Mwaei Kamuktaindet ne Toroor ne po lugoosyek kole: “Ingogimegitu eunekwok, okweek che ogase ng'aleechu eng' peetuusyechu eng' maotik che ki mi eng' peetuut ne ki kiluumei lumeiywot ketau keteechei kogeny kootap Kamuktaindet ne Toroor ne po lugoosyek, nooto ko Hekaluut.

¹⁰ Amu kingo tomo koit peetuusyechooto ko ki ma konyooru chii melekto, ak ki ma keyaaktoi kiy agobo tyony. Ki ma komi kaalyeet eng' ineendet ne mandoi ak eng' ineendet ne nyoonei amu puunyoot; amu ki agoochi koboryo chii age tugul ak chiitap kokwennyi.

¹¹ Ago nguno koma ayachini ichu ki ng'et ko uu eng' peetuusyek che po tai, mwaei Kamuktaindet ne Toroor ne po lugoosyek.

¹² Amu tuun piitu keswootap kaalyeet; tuun yiei keetitap sabibuk, ak koruryo tuguuk eng' emet, ak kogoon kipsengwet rewoot; ak agoochi piik che ki ng'et eng' pichu konam tuguuchu tugul koek porotennywa.

¹³ Ak ko uu ye ki oegu che chubootiin eng' pororyosyek, ee kootap Judah ak kootap Israel, asarwok anyun, si oegu kaberuret. Amoiywei, ago ingogimegitu eunekwok.”

¹⁴ Amu mwaei Kamuktaindet ne Toroor ne po lugoosyek kole: “Ko uu ye kigabwaat ayaiywok yaityet, ye ki katacha kwanisyekwok kot anereech, mwaei Kamuktaindet ne Toroor ne po lugoosyek, ak ki ma awal kabwaatutikyuk;

¹⁵ kaabwaat anyun kogeny eng' peetuusyechuuto ayachi ne myee Jerusalem kobooto kootap Judah; amoiywei.

¹⁶ Chu tuguuk che tuun oyae: Ingomwachi chii age tugul eng' okweek chiitap kokwennyi imanit; oyai kirwooget ne po imanit ak kaalyeet eng' ormariichokwok.

¹⁷ Amat kobwaat chii age tugul eng' okweek yaityet eng' muguleldanyi agobo chiitap kokwennyi, amocham kayasyoet age tugul ne po lembech; amu aweche tuguuchuuto tugul, mwaei Kamuktaindet ne Toroor.”

¹⁸ Ak ki nyoonjo ng'olyootap Kamuktaindet ne Toroor ne po lugoosyek koleenjo,

¹⁹ “Mwaei Kamuktaindet ne Toroor ne po lugoosyek kole: Egu eng' kootap Judah poiboiyet ak kaagaasetapkei, ak igoorwegap poiboiyet, karugutetapkei ne po arawetap ang'wan, ak ne po arawetap muut, ak ne po arawetap tisap, ak ne po arawetap taman; ocham anyun imanit ak kaalyeet.”

²⁰ Mwaei Kamuktaindet ne Toroor ne po lugoosyek kole: “Tuun pwoonei pororyosyek ak piik che menyei nganasook che chaang';

²¹ ak koba piik che po nganaseet age nganaseet age koleenji, ‘Ongechakte keebe kesoom chameet eng' Kamuktaindet ne Toroor, ak kecheeng' Kamuktaindet ne Toroor ne po lugoosyek; awendi agane.’

²² Ee, pwoonei piik che chaang' ak pororyosyek che kiimeen kocheeng' Kamuktaindet ne Toroor ne po lugoosyek eng' Jerusalem, ak kosoom chameet eng' Kamuktaindet ne Toroor.

²³ Mwaei Kamuktaindet ne Toroor ne po lugoosyek kole: Tuun namei piik tamanu eng' peetuusyechooto, che punu kutusweek tugul che po pororyosyek, ngoryeetap Yahudyot ak koleenji, ‘Kibendi tugul kobooten, amu kigegas keele mi Kamuktaindet kobootok.’ ”