SEKARIA 2 - Bukuit Ne Tilil

Chii ne tinyei porowet ne kikwaise

¹ Ki ang'eet met ak ageer, ogeero, chiito ne tinyei eng' eunnyi porowet ne kikwaise.

² Yeityo ateebee aleenji, “Iwendi ano?” Ak ki leenjo, “Awendi akwai Jerusalem, si kobiit anai ole tee tebeesindanyi ak koindonyi.”

³ Ki wo anyun malaikaiyandanooto ki ng'alaalwo, kwo kotuiyo ak malaikaiyat age ne kiganyonji ineendet,

⁴ ak koleenji ineendet, “Labat, ng'alaalji murenonin ileenji: Ki menyei Jerusalem ko uu ye ki menyei nganasook che mengeechen che ma tinyei irimoik, amu chaang'indap piik ak tuuga che mi.

⁵ Amu mwaei Kamuktaindet ne Toroor kole, Aegu irimeet ne po maat eng' komoswek tugul, ak aegu toroornatet eng' kwenunnyi.”

Soomut ne kisoomei luulenik

⁶ Mwaei Kamuktaindet ne Toroor kole “Eiye, eiye! Omwei eng' emetap murot kaataam, amu ki aseerak ko uu usoonaik ang'wan che po kipsengwet.

⁷ Ee mwechi Zion, sarugei inyee, ne omeng'iisyei ak cheptap Babilon.”

⁸ Mwaei Kamuktaindet ne Toroor ne po lugoosyek ne kagoyookta ineendet agobo toroornatennyi, awo ye mi pororyosyek che kiluulok, kole “Ee iman, ineendet ne twook, ko katwa laptetap kondanyi.

⁹ Ogeero, ang'warii icheek, ak koek luulenigap otiikwak icheek.” Niito ne onae ole ki iyookwo Kamuktaindet ne Toroor ne po lugoosyek.

¹⁰ Mwaei Kamuktaindet ne Toroor kole “Tyen ak ibaibaitu, ee cheptap Zion; amu, keero, anyoone amenye kwenung'ung'.

¹¹ Ak konamgei pororyosyek che chaang' ak Kamuktaindet ne Toroor eng' peetuunooto ak koek piikyuk; ak ameny kwenung'ung'.” Inae niito ile ki iyookwo Kamuktaindet ne Toroor ne po lugoosyek anyo ole imi.

¹² Ak konam Kamuktaindet ne Toroor Judah koek kebebertanyi eng' emet ne tiliil, ak kolewen kogeny Jerusalem.

¹³ Osisye, okweek piik tugul eng' taitap Kamuktaindet ne Toroor; amu kagong'eet eng' meng'ootennyi ne tiliil.