SEKARIA 10 - Bukuit Ne Tilil

Kaweegunetap Judah ak Israel

¹ Osoom Kamuktaindet ne Toroor ropta eng' peetuusyek che po ropta ne po let, Kamuktaindet ne Toroor ne yaei kalyelosyek; si kogoochi icheek ropta ne inesi, ak kogoochi chii age tugul susweek eng' emet.

² Amu ki komwa terapik tangoita, ak ki kogeer piik che ng'oorsei lembechek, ak ki komwa icheek karwotitaosyek che po lembech, igoigoisyei puch; pendoti ko uu keechiirek, kinyaliili amu ma tinyei mestowot.

³ Anereekyini mestoweek, ak abire kwesik: amu karutoochi Kamuktaindet ne Toroor ne po lugoosyek akweennyi ne po keechiirek, kootap Judah, ak koyai icheek koigei paraisinnyi ne myee eng' pooryeet.

⁴ Mang'une `ineendet koita ne po luuita, mang'une `ineendet kipchumaryat, mang'une `ineendet kwangetap pooryeet, mang'une `ineendet age tugul ne usiisyei kibagenge.

⁵ Ak koigei piik che nyigoonen, che tyechei puunikwak eng' ng'atateegap ortinwek eng' pooryeet; ak kobargei, amu mi Kamuktaindet ne Toroor kobooto icheek: ak kotoptobenso piik che ketei paraisisyek.

⁶ Ak agimiit kootap Judah, ak asaru kootap Joseph, ak amutu icheek kogeny, amu ariiree icheek; ak koigei ye ki ma amete icheek: amu aa Kamuktaindet ne Toroor kamuktaindennywa, ak agas icheek.

⁷ Ak koigei icheek che po Ephraim chiito ne nyigan, ak koboiboitu mugulelwekwak ko uu che kaei divaik: ee, keerei lagokwok nooto, ak koboiboitu; igasegei mugulelwekwak eng' Kamuktaindet ne Toroor.

⁸ Aititenjini icheek, ak ayum, amu ki atyach icheek: ak kotesagis ko uu ye kiga kotesagis.

⁹ Ak agool icheek eng' kwenutap pororyosyek; ak kobwaata komi emotinwek che looen: ak komeng'iis kobooto lagokwak, ak koweigei.

¹⁰ Amutu icheek kogeny komang'une emetap Misiri, ak ayum icheek komong' eng' Assyria; ak amutu icheek kobwa emetap Gilead ak Lebanon; ama piitu ole yamei icheek.

¹¹ Ak peek che mildogei eng' nyanjet, ak koteenyo rirosyek tugul che po aineet: ak kiming'in menoteetap Assyria, ak koistogei kirokto ne po Misiri.

¹² Agimiiti icheek eng' Kamuktaindet ne Toroor; ak kobendatee kainennyi, mwaei Kamuktaindet ne Toroor.