SEKARIA 1 - Bukuit Ne Tilil

Teekseetap Hekaluut

¹ Eng' arawetap sisiit eng' kenyiit ne po aeng' ne po laitornatetap Darius ko ki nyoonji `ng'olyootap `Kamuktaindet ne Toroor maotyot Zekariah weeriitap Berekiah weeriitap Ido, koleenji

² ki konereekyi `Kamuktaindet ne Toroor miising' kwanisyekwok.

³ Mwachi anyun icheek ileenji, mwaei Kamuktaindet ne Toroor ne po lugoosyek kole: Oweekyagei, mwaei Kamuktaindet ne Toroor ne po lugoosyek, asi aweekyogei, mwaei Kamuktaindet ne Toroor ne po lugoosyek.

⁴ Amoigei kwanisyekwok, che kiga iteechi maotik che po tai, koleenji, “Mwaei Kamuktaindet ne Toroor ne po lugoosyek kole, ‘Oweege anyun nguno omete ortinwekwok che yaach ak poisyonikwok che yaach.’ ” Ago ki ma kas icheek anan koepcha iit, mwaei Kamuktaindet ne Toroor.

⁵ Kwanisyekwok, komi ano? Ang' maotik, tos saptos agoi?

⁶ Ago tos ki ma ityi kwanisyekwok ng'aleekyuk ak ng'atuutikyuk che ki ang'at otwogikyuk maotik? Ak ki week icheek ak kole, “Ki koyaiywech Kamuktaindet ne Toroor ne po lugoosyek ko uu ye kiga ibwaat kole yaiywech ko uu ortinwekyok, ak ko uu poisyonikyok.”

Ng'ang'utyet ne tai: Piik che kweryei paraisisyek

⁷ Eng' peetuutap tiptem ak ang'wan ne po arawetap taman ak agenge ne arawetap Sebat, eng' kenyiitap aeng' ne po Darius, ko ki nyoonji `ng'olyootap Kamuktaindet ne Toroor maotyot Zekariah weeriitap Berekiah, weeriitap Ido, koleenji:

⁸ Ki anyooru keereet kemoi agobo chiito ne ki kweryei paraisiit ne piriir ak kotonone keetiigap momonik oriit; ak ki mi patennyi paraisisyek alage che piriireen, che puusyenen, ak che leelachen.

⁹ Ki ale anyun, “Ee kiptaiyandennyu, nee chu?” Ak ki leenjo malaikaiyat ne ki ng'alaalwo, “Ta aboorun kiit ne po chuuto.”

¹⁰ Ki wol anyun chiito ne ki tonone kwenutap momonichooto kole, “Chuuto ko icheek che ki iyookto Kamuktaindet ne Toroor kobunoot komoswek tugul che po ng'wony.”

¹¹ Ak ki wolji `icheek malaikayatap Kamuktaindet ne Toroor ne ki tonone kwenutap momonichooto koleenji, “Ko kebunote komoswek tugul che po ng'wony, ak keero, tebyei ng'wony tugul kosiisei ak ko kalyandos.”

¹² Ki wol anyun malaikaiyatap Kamuktaindet ne Toroor kole, “Ee Kamuktaindet ne Toroor ne po lugoosyek, ta ieesyoi kot kotyanit si iriiree Jerusalem, ak nganasoogap Judah, che ki inereekyi kenyisyechu tamanwogik tisap?”

¹³ Ak ki wol Kamuktaindet ne Toroor eng' ng'aleek che myach ak ko po kagaigaet kowolji malaikaiyandanooto ki ng'alaalwo.

¹⁴ Ki leenjo anyun malaikaiyandanooto ki ng'alaalwo: “Ititenji ileenji, Mwaei Kamuktaindet ne Toroor ne po lugoosyek kole; ‘Ama ng'etkong' agobo Jerusalem ak agobo Zion eng' ng'etkonda ne oo.

¹⁵ Ak anereechi miising' agobo pororyosyek che kalyandos; amu ye kita anereechi kitigin, kotes icheeget yaityet.

¹⁶ Ko uu nooto mwaei Kamuktaindet ne Toroor ne po lugoosyek kole kaaweekyigei Jerusalem ariiree; ki teekyin koonnyu nganasanooto, ak kechuul porowet ne kikwaise eng' Jerusalem.’ ”

¹⁷ Itechi kogeny ileenji, “Mwaei Kamuktaindet ne Toroor ne po lugoosyek kole: ‘Kibaroi nganasookyuk eng' kaberuret; ak ta kogoigoi Kamuktaindet ne Toroor Zion ak ta koleweni Jerusalem.’ ”

¹⁸ Ak ki ang'eet met ak ageer, ogeero, kuinoik ang'wan.

Ng'ang'utyetap aeng': Kuinoik

¹⁹ Ki ateebee malaikaiyat ne ki ng'alaalwo aleenji, “Nee chu?” Ak ki wolwo koleenjo, “Chu ko kuinoik che ki iyeesta Judah, Israel, ak Jerusalem.”

²⁰ Ak ki iboorwo Kamuktaindet ne Toroor kitong'ik ang'wan.

²¹ Ki ateep anyun ale, “Pwoonei chuuto koyaei nee?” Ak ki wol kole, “Chu ko kuinoik che ki iyeesta Judah, kot ko mata kobiit chii ne yotei met; ago kabwa chuuto si kobiit komu icheek, ak kotimda kuinoigap pororyosyek, che ki namji parak kuinennywa koborye emetap Judah koiyesta.”