ROMANIK 9 - Bukuit Ne Tilil

Lewenetap Kamuktaindet ne ineegei

¹ Amwae iman eng' Kristo, ma mwaei lembech, paoryani kabwaatutikyuk kobooto eng' Kabuuset ne Tiliil,

² ale atinye arageneet ne oo ak ng'wanindo ne ma igeesugei eng' muguleldanyu.

³ Amu kata amache ale king'wanita aneendet eng' Kristo agobo tupchosyekyuk, che piikyuk eng' poorto;

⁴ che Yahudik; che ki kiyai koek lagok, che neny wo toroornatet, ak kayomisutik, ak kagoitoetap Ng'atuutyet, ak otetap Kamuktaindet, ak arorutik;

⁵ ne chechwaak kwanisyek, ak nenywa Kristo eng' atebeetap poorto. Iberuurot koigeny Kamuktaindet, ne pou tugul. Amen.

⁶ Ago ma keele kogoek puch ng'olyootap Kamuktaindet. Amu ma Yahudik icheek tugul, che po Israel:

⁷ ama keele lagok icheek tugul, amu kesweegap Abraham: ago, Kiguurtoe Isak keswondeng'ung'.

⁸ Nooto anyun, icheek koma lagogap poorto che lagogap Kamuktaindet; ago lagogap arorutyet che kiiti koek keswoot.

⁹ Niito anyun ko ng'olyootap arorutyet, Anyoone tuun kapkora eng' kenyiit ne nyoonei, ak kosich Sara weeriit.

¹⁰ Ak ma uu nooto kityo; ago ye kingo kagomanach Rebeka agine eng' agenge, nooto kwandanyo Isak -

¹¹ amu ye ki tomo kesich lagok, koyai kiy age tugul ne myee anan ne ya, si kobiit kotonon mageetap Kamuktaindet ko uu lewenet, ama po poisyonik, ago po ineendet ne kuursei,

¹² ki kileenji ineendet, Otei ne oo ne ming'in.

¹³ Agot ko uu ye siraat, keele, Ki acham Jakobo, ago ki awech Esau.

¹⁴ Kimwae nee anyun? Mi ne ma po imanda eng' Kamuktaindet? Achicha, ma uu nooto.

¹⁵ Amu mwachin ineendet Musa koleenjin, Ariiree ineendet ne amache ariiree, ak atinye rireenetapkei eng' ineendet ne amache ariireegei.

¹⁶ Nooto anyun ma po ineendet ne machei, anan ineendet ne labati, ago po Kamuktaindet ne tinyei rireenetapkei.

¹⁷ Amu mwachin sireet Pharaoh koleenjin, “Kang'eetin amu ng'olyoondoniito ale, abartaenen kamuktaennyu, si keamdaat kainennyu eng' ng'wony komugul.”

¹⁸ Nooto anyun ineendet ne machei koriiree, koriiregei, ak ne machei kouiit, kouiiti.

Pou Kamuktaindet tuguuk tugul

¹⁹ Ileenjino anyun, Amu nee si kota kocheeng'ei lelutyet? Amu ng'oo ne kirindoi magennyi?

²⁰ Chiichi! Ii ng'oo ne tos iwolji Kamuktaindet kiy? Tos mwachin `kiit ne ki kimimii mimiindet koleenjin, “Amu nee si iyaa ko uu ni?”

²¹ Anan ma tinyei cheptereniot kimnateet eng' meneet, koyai eng' kebebertap menonooto tereet ne po teegisto, ak age ne ma po teegisto?

²² Tos nee anyun, ngo machei Kamuktaindet kobarta nereeknatennyi, ak kong'aany kimnateennyi, komuita eng' talasyet ne oo agobo tereenik che po nereegek che nyoljin ng'emisyet:

²³ ak si kobiit kobarta mogornatosyegap toroornatennyi eng' tereenik che po rireenetapkei che kiga sip kochopchi telunateet,

²⁴ agot acheek che ki kuurech, ma eng' Yahudik kityo, ago eng' Pororyosyek ak icheek?

²⁵ Ko uu ye mwaei agine eng' Hosea kole, “Aguure icheek piikyuk, che ki ma ko ‘piikyuk’; ak aguure ineendet chamaneet, ne ki ma ko ‘chamaneet.’ ”

²⁶ “Ak eng' olooto ole ki kimwachine, keleenji, ‘Ma oo piikyuk,’ keguure eng' olooto weeriigap Kamuktaindet ne sabei.”

²⁷ Ak ki mwa Isaiah eng' kutit ne oo agobo Israel, kole, “Agot ngo koitetap piigap Israel ko tee ng'aniegap nyanjet, kesaru che ki ng'et;

²⁸ amu yaei Kiptaiyat ng'olyoondennyi eng' ng'wony, kogees ak kotil konwagit.”

²⁹ Ak, ko uu ye kiga sip komwa Isaiah kole, “Nda ki ma pagaakwech Kiptaiyatap Lugoosyek keswoot, ta kiga kegergeitu ak Sodom, ak ta kiga keyaech keige Gomorah.”

Ma tinyei Israel kayaneet

³⁰ Kimwae nee anyun? Kimwae keele kigonor Pororyosyek imanda che ki ma kosubi imanda, nooto ko imanda ne po kayaneet:

³¹ ago Israel, ye kingo sup ng'atuutyetap imanda, koma ityi Ng'atuutyonooto.

³² Amu nee? Amu ki ma cheeng' eng' kayaneet, ago ko uu eng' poisyonik. Ki riich icheek koita ne riichei piich;

³³ ko uu ye siraat kole, Ogeero, andoi Zion koita ne riichei piich ak rwandet ne inachi piich: Ak ne iyani ineendet koma kigoochin kolilaan.