ROMANIK 7 - Bukuit Ne Tilil

Kaboorunet ne punu katunisyet

¹ Anan mongen okweek, che kitupche (amu ang'alaaljini piik che ingen Ng'atuutyet), ole tinyei ng'atuutyet pounateet eng' chiito eng' peetuusyek tugul che po sabeennyi?

² Amu kobogoryot ne tinyei manong'otyot koratei ng'atuutik eng' manong'otyot eng' peetuusyek tugul che po sabeennyi; ago ngo me manong'otyot, kotyagak anyun eng' ng'atuutyetap manong'otyot.

³ Nooto anyun, ye ta kosabei manong'otyot, ak konamgei ak chiito age, keguure ineendet chebaigeiyat: ago ngo kagome manong'otyot, kotyagak eng' ng'atuutyet, eng' nooto anyun, koma keguure chebaigeiyat, agot ngo tuun chiito age ineendet.

⁴ Nooto anyun, che kitupche, kigeyaak obegu eng' Ng'atuutyet eng' poortap Kristo; si kobiit obunji chiito age, ineendet ne ki king'eet komang'une che ki pek, si keiichi Kamuktaindet logoek.

⁵ Amu ye kingota kemi eng' poorto ko ki poisyei maguutik che po tengek eng' kebeberwegap poorwekyok, che kimi amu Ng'atuutyet, si koiiyo logoek che ityin meet.

⁶ Ago nguno, ko ki kityaachech eng' Ng'atuutyet, ko kagebekyi nooto ne kiga ratech; si kobiit keotisye eng' leelindap Kabuuset ne Tiliil, ma eng' osindap ng'atuutik che siraatiin.

Ng'atuutyet ak tengek

⁷ Kimwae nee anyun? Tos tengek Ng'atuutyet? Achicha, ma uu nooto. Ago ki ma kota anae tengek nda ki ma ko eng' Ng'atuutyet: amu ki ma kota anai kasetap myat nda ki ma mwa Ng'atuutyet kole, “Amegase myat.”

⁸ Ago kinyoor tengek poroindo eng' ng'atuutyet koyai eng' anee kasetap myat age tugul: amu ye ma mi Ng'atuutyet ko meat tengekto.

⁹ Ak ki asabe eng' tai ye ki ma komi Ng'atuutyet: ago ye kingo nyo ng'atuutyet, kosap kogeny tengekto, amee anyun;

¹⁰ ak ki ageer ale ki punji meet ng'atuutyet ne ki po saboondo:

¹¹ amu kinyoor tengek poroindo eng' ng'atuutyet kong'ala, ak kobara eng' nooto.

¹² Nooto anyun tiliil Ng'atuutyet, ak ko tiliil kayomiset, ak ko po imanda, ak ko myee.

¹³ Tos ki ek anyun nooto myee meet eng' anee? Achicha, ma uu nooto. Ago si koboorgei tengekto keele tengekto, kogiyai meet eng' anee eng' nooto myee; si kobiit koek `tengekto tengekto inne eng' ng'atuutyet.

Poryet ne mi oriit

¹⁴ Amu kingen keele po Ng'atuutyet saboondo; ago aa chiitap poorto, ne kigealdochi tengek.

¹⁵ Amu mangen ne ayae: amu ma ne amache, ne ayae; ago ne aweche, ko nooto ne ayae.

¹⁶ Ago ngayai nooto ma mache, ayan anyun ale myee Ng'atuutyet.

¹⁷ Nguno anyun koma ko anee ne ayae, ago tengekto ne menya.

¹⁸ Amu angen ale eng' anee, nooto ko eng' poortanyu, koma menyei kiy ne myee: amu mi chameet kobooto, ago ale ayai nooto myee, koma yae.

¹⁹ Amu nooto myee ne kata ayae, koma yae: ago yaityet ne ma mache, ko nooto ne cham ayae.

²⁰ Ago ngot ayae ne ma mache, koma ko anee ne yaei, ago tengekto ne menya.

²¹ Ageere anyun ng'atuutyet, ale, eng' anee, ne kata ayae ne myee, komiitei yaityet kobooto.

²² Amu abaibai eng' Ng'atuutyetap Kamuktaindet eng' chiito ne po oriit:

²³ ago ageere ng'atuutyet ne teer eng' kebeberwegap poortanyu, kobortos ak ng'atuutyetap ng'omnatennyu, koyaa aek luulenetap ng'atuutyet ne po tengekto ne miitei kebeberwegap poortanyu.

²⁴ Ee, anee ne nyalili! Ng'oo ne ityaacha eng' poortap meoni?

²⁵ Amwachini Kamuktaindet kongoi eng' Jeso Kristo Kiptaiyandennyo. Nooto anyun, aoote eng' ng'omnatennyu ng'atuutyetap Kamuktaindet, ago eng' poorto aoote ng'atuutigap tengekto.