ROMANIK 6 - Bukuit Ne Tilil

Kisabe eng' Kristo

¹ Kimwae nee anyun? Ki testai ketebi eng' tengek, si kobiit kotesak myeeindo?

² Achicha, ma uu nooto. Acheek che kigebekyi tengek, kota kesoptoi ano eng' tengek?

³ Anan ma onai ole acheek tugul che ki kibatisanjech Jeso Kristo ko ki kibatisanjech meennyi?

⁴ Nooto anyun kigetubech kobooto ineendet eng' kabatisanet agoi meet: si ko uu ye ki king'eet Kristo eng' che ki pek eng' toroornatetap Kwanda, ko uu nooto, kibendoti agacheek eng' saboondo ne leel.

⁵ Amu ngo ki kituiyech ak ineendet eng' kergeindap meennyi, ke uu nooto agacheek eng' kergeindap ng'eetyeennyi;

⁶ kingen ni, keele ki kigartaat chiinyo ne po keny kobooto ineendet, si kong'emak poortap tengek, si mata koratech tengekto kogeny.

⁷ Amu ineendet ne ki kome kotyagat eng' tengek.

⁸ Ago ngo kigebegu kobooto Kristo, kiyani kora keele kisoptosi kobooto ineendet;

⁹ kingen keele ki king'eet Kristo komong' eng' che ki kobek: ma komeei kogeny; ma kotinyei meet pounateet eng' ineendet kogeny.

¹⁰ Amu meet ne kime, kogimechi tengek konyil agenge ak koyam; ago sabeet ne sabei ineendet kosabei eng' Kamuktaindet.

¹¹ Ko uu nooto oiityige ak okweek ole ki obekyi tengek, ago osaptosi eng' Kamuktaindet eng' Kristo Jeso.

¹² Nooto anyun amochamji tengek koboi poorwekwok che pegu, si ogas iit maguutikwak:

¹³ anan ogoochi tengek kebeberwegap poorwekwok koek kariik che ma po iman; ago ogoochigei Kamuktaindet, ko uu che saptos che kamang'une che ki pek, ak ogoochi Kamuktaindet kebeberwegap poorwekwok koek kariigap imanda.

¹⁴ Amu ma tinyei tengek pounateet eng' okweek: amu ma omi eng' Ng'atuutik, ago eng' myeeindo.

Otwogigap imanda

¹⁵ Nee anyun, ki yai tengek, amu ma kemi eng' Ng'atuutik, ago eng' myeeindo? Achicha, ma uu nooto.

¹⁶ Mongen ole, ineendet ne ogoochinigei oegu otwogik agoi kasetap iit, ko oo otwogigap ineendet ne ogase iit; ngo po tengekto agoi meet, anan ngo po kasetap iit agoi imanda?

¹⁷ Ago kimwachini Kamuktaindet kongoi, amu, okweek che ki oo otwogigap tengekto, ko ki ogas iit eng' muguleldo kaneetisyet ne uu ne kigegoonok okweek;

¹⁸ ak ye kingi tyachak eng' tengek, oegu otwogigap imanda.

¹⁹ Ang'alaali ko uu piteetap piik amu nyalulet ne po poorwekwok: amu ko uu ye ki ogoite kebeberwegap poorwekwok koek otwogigap murwoonindo ak tengek agoi tengek, ko uu nooto anyun ogoite kebeberwegap poorwekwok koek otwogigap imanda agoi tiliilindo.

²⁰ Amu ye kita ko oo otwogigap tengekto, ko ki otyagotin eng' imanda.

²¹ Ki otinye logoek nee eng' peetuusyechooto eng' tuguuk che olilane nguno? Amu kagesunetap tuguuchooto ko meet.

²² Ago nguno ko kagityaachak eng' tengekto, ak kaoegu otwogigap Kamuktaindet, otinye logoekwok agoi tiliilindo, ak kagesunet ko saboondap koigeny.

²³ Amu melektap tengek ko meet; ago konunetap chamyet ne po Kamuktaindet ko saboondap koigeny eng' Kristo Jeso Kiptaiyandennyo.