ROMANIK 3 - Bukuit Ne Tilil

¹ Tinyei porot nee anyun Yahudyot? Anan nee toreteet ne po kamuratanet?

² Oo eng' ooreet age tugul: ne po tai, ko amu ki kigoochi Yahudik kotononji ng'aleegap Kamuktaindet.

³ Amu egu nee ngot koma tinyei alage kayaneet? Kayanennywa ne ma mi, ko tos walei imandap Kamuktaindet koek puch?

⁴ Achicha: ma uu nooto: ingoek ne po iman Kamuktaindet, ago kiplembechwa chii age tugul; ko uu ye siraat kole, Si kobiit kindein imanda eng' ng'aleeguk, Ak imuuch ibelisye ye kirwoogun.

⁵ Ago ngot kogonyiti atebeennyo ne ma po imanda, imandap Kamuktaindet, kota kemwae nee anyun? Tos ma po imanda Kamuktaindet ne nyoonei eng' nereegek? (Ang'alaali ko uu piik.)

⁶ Achicha! Ma uu nooto; amu nda uu nooto korwookyindoi ano `Kamuktaindet ng'wony?

⁷ Ago ngo tesak imanitap Kamuktaindet eng' lembeitanyu agoi toroornatennyi, ko amu nee si kota kirwookwo ko uu kiptengekyo?

⁸ Ak amu nee si ma ki mwa (ko uu ye kimwaitaenech ne ya, ak ko uu ye iyani alage kole kimwae acheek) keele, Ongeyai che yaach si kobiit kobwa che myach? Po iman kirwoogennywa.

Ma mi ne po imanda

⁹ Nee anyun? Tos ki myachen kesiir icheek? Achicha, agot kitigin: amu kiga kisip kiityi Yahudik ak Yunanik keele mi icheek tugul eng' pounatetap tengekto;

¹⁰ ko uu ye siraat kole, Ma mi ne po imanda, achicha, ma mi agot agenge:

¹¹ Ma mi ne iguitos, Ma mi ne cheeng'ei Kamuktaindet;

¹² Ki komasta tugul, ki koek tugul che ma tilei kiy; Ma mi ne yaei ne myee, achicha, ma mi agot agenge:

¹³ Mookwekwak ko kererit ne yaataat; Kiboisyee keniisyet eng' ng'elyebwekwak: Mi ng'wonetap erenook kutusweekwak oriit:

¹⁴ Che nyiitaat kutusweekwak chubisyet ak ng'wanindo:

¹⁵ Chepchep keelyekwak kotumda korotiik;

¹⁶ Mi ortinwekwak ng'emisyet ak nyalilda;

¹⁷ Ama nai ooreetap kaalyeet:

¹⁸ Ma mi kaiyweisyet ne iywei Kamuktaindet taitap konyekwak.

¹⁹ Ak kingen keele tuguuk alak tugul che mwaei Ng'atuutyet, komwachin icheek che miitei eng' pounatetap Ng'atuutyet; si kobiit keger kutit age tugul, ak si ki mutyi ng'wony komugul kirwoogetap Kamuktaindet:

²⁰ amu ma mi chii ne kiityin imanda eng' tainnyi eng' poisyonigap Ng'atuutyet: amu punu naetap tengekto Ng'atuutyet.

Kinyooru imanda eng' kayaneet

²¹ Ago nguno ko kagong'ang'ak imandap Kamuktaindet ama eng' ng'atuutik, ne paoryani Ng'atuutyet ak maotik;

²² agot imandap Kamuktaindet ne mi eng' kayaneet eng' Jeso Kristo eng' icheeget tugul che iyani; amu ma mi kabesyet;

²³ amu ki koyai tugul tengek, ama ityin toroornatetap Kamuktaindet;

²⁴ che kiityin imanda puch eng' myeeindonyi eng' katyaget ne mi eng' Kristo Jeso:

²⁵ ne ki inde Kamuktaindet koek kaptisiisyo eng' kayaneet, eng' korotiikyik, si kobarta imandanyi, amu kachundaetap tengekwogik che ki kisip keyai, eng' muitaetap Kamuktaindet;

²⁶ amu kabartaetap imandanyi eng' peetuusyechuuto, si kobiit koek ineendet ne po imanda, ak koek ne iityin imanda ineendet ne tinyei kayaneet eng' Jeso.

²⁷ Mi ano anyun kachaunetapkei? Kigegerchi saang'. Eng' ng'atuutyet ne uu nee? Ne po poisyonik? Achicha: ago eng' ng'atuutyetap kayaneet.

²⁸ Ki iti anyun keele kiityin chii imanda eng' kayaneet ama poisyonigap ng'atuutik.

²⁹ Anan Kamuktaindet ko Kamuktaindet ne po Yahudik kityo? Ama Kamuktaindet ne po Pororyosyek ak icheek? Ee, po Pororyosyek ak icheek:

³⁰ ko uu ye agenge Kamuktaindet, ak koiityin imanda eng' kayaneet che ki kimuratan, ak koiityin imanda eng' kayaneet che ma kimuratan.

³¹ Tos ki yai anyun Ng'atuutyet koek ne ma tilei kiy amu kayaneet? Achicha, ma uu nooto: ki kimiti Ng'atuutyet.