ROMANIK 2 - Bukuit Ne Tilil

Kirwoogetap Kamuktaindet

¹ Nooto anyun, metinye lotania, ee, inyee chii age tugul ne irwoochi: amu nooto irwookyine age, irwookyinegei inyeendet; amu inyee ne irwoochi, iyae aginye tuguuchooto.

² Ak kingen keele namegei kirwoogetap Kamuktaindet ak imanit agobo icheek che yaei tuguuk che uu chooto.

³ Ee, inyee chii, tos iiti inyee, ile ichilile kirwoogetap Kamuktaindet, inyee ne irwookyini icheek che yaei tuguuk che uu chooto, ak iyae aginye chooto?

⁴ Anan isase mogornatosyek che po myeeindonyi ak muitaennyi ak talasyennyi ama inai ile imutyinin siguunet myeeindap Kamuktaindet?

⁵ Ago eng' uindang'ung' ak muguleldang'ung' ne ma tinyei siguunet, igonorchinigei nereeknateet kobunji peetuutap nereeknateet ak ng'ang'utyetap kirwooget ne po imanda ne po Kamuktaindet;

⁶ ne tuun igoochin chii tugul ko uu poisyonikyik:

⁷ igoochin saboondap koigeny icheek che cheeng'ei eng' muitaet ak eng' poisyonik che myach, toroornatet ak teegisto ak che ma ng'emaksei;

⁸ ago eng' icheek che ngelelik, ama kase iit imanit, ago che kase iit ne ma po imanda, koegu nyitatet ak nereeknateet,

⁹ nyalilda ak pichiindo, eng' saboondap chii age tugul ne yaei yaityo, ne po Yahudyot korook, ak ne po Yunanindet agine;

¹⁰ ago toroornatet ak teegisto ak kaalyeet eng' chii age tugul ne yaei ne myee, po Yahudyot korook ak Yunanindet agine:

¹¹ amu ma tiytiy `Kamuktaindet piik.

¹² Amu tugul che ki yai tengek koma mi Ng'atuutyet, ko tuun lustos ama eng' Ng'atuutyet: ak tugul che ki yai tengek komi eng' Ng'atuutyet, ko tuun kirwookyin eng' Ng'atuutyet;

¹³ amu ma icheek che kasei Ng'atuutyet ko che po imanda eng' taitap Kamuktaindet, ago icheek che yaei Ng'atuutyet, kiityin imanda.

¹⁴ Amu ye yaei Pororyosyek, che ma tinyei Ng'atuutyet, eng' piteennywa, tuguuk che po Ng'atuutyet, chuuto, pichooto ma tinyei Ng'atuutyet, kobougei icheegei;

¹⁵ iboortoi eng' nooto poisyetap Ng'atuutyet ne siraat eng' mugulelwekwak, kobaoryanjin ak icheek nautikwak, ak komwaitogei icheegei eng' icheegei eng' kabwaatutikwak, anan kosarugei;

¹⁶ eng' peetuut ne tuun irwookyin Kamuktaindet ung'ootigap piik, ko uu logoiywekyuk che myach, eng' Jeso Kristo.

Yahudik ak Ng'atuutyet

¹⁷ Ago ngeguurenen Yahudyot, ak itiegei Ng'atuutyet, ak ichouge eng' Kamuktaindet,

¹⁸ ak ingen magennyi, ak ichame komyee tuguuk che korooron kosiir, amu ki kineetin Ng'atuutyet,

¹⁹ ak iiti ile ii kandoindet ne po che koryotiin, lapkeiyetap icheeget che mi mesundeito,

²⁰ kotigonindet ne po che perber, kaneetindet ne po manyurunik, ne itinye eng' Ng'atuutyet kergeindap naet ak imanit;

²¹ inyeendet anyun ne ineeti age, ko meneetige? Inyee ne iamdoi ile amat kochoorse chii, ko tos ichoorsei inyee?

²² Inyee ne imwae ile amat oipkei, ko tos iyae inyee? Inyee ne iweche kanamonik, ko tos irebe che mi kooriigap kanamonik?

²³ Inyee ne ichouge eng' Ng'atuutyet, ko tos iteweeri Kamuktaindet eng' pistoeng'ung' ne ibistoe Ng'atuutyet?

²⁴ Amu kichubei kainetap Kamuktaindet eng' kwenutap Pororyosyek, amu okweek, ko uu ye ki kisir.

²⁵ Amu toreti iman kamuratanet, ngo ii yaindetap Ng'atuutyet: ago ngot ko ii putindetap Ng'atuutyet, ko kagoek kamurataneng'ung' ne ma kamuratano.

²⁶ Ngot koriibei anyun tetuutigap Ng'atuutik ineendet ne ma kimuratan, ko tos ma kiiti ne ma kimuratan keele imuratanat?

²⁷ Ak tos ma tuun irwogun ineendet ne ma kimuratan eng' atebeennyi, ngot koyai Ng'atuutyet kosulda, inyeendet ne ii putindetap Ng'atuutyet ak itinye ng'atuutik che siraatiin ak kamuratanet?

²⁸ Amu ma Yahudyot ineendet ne Yahudyot eng' poorto parak, ama kamuratanet nooto po poorto parak;

²⁹ ago Yahudyot ineendet ne Yahudyot eng' oriit; ak kamuratanet ko nooto po muguleldo, eng' saboondo, ma eng' sireet; ne kalasunennyi koma po piik, ago po Kamuktaindet.