ROMANIK 10 - Bukuit Ne Tilil

¹ Che kitupche, mageetap muguleldanyu ak soomennyu eng' Kamuktaindet agobo icheek ko ale kesar icheek.

² Amu abaoryani agobo icheek ale tinyei kagiiletapkei agobo Kamuktaindet, ago ma eng' naet.

³ Amu ye ki ma nai icheek imandap Kamuktaindet, ak ye ki cheeng' kogimit nenywa, koma kogas iit imandap Kamuktaindet.

⁴ Amu Kristo kagesunetap Ng'atuutyet agoi imanda eng' age tugul ne iyani.

Po piik tugul yetunet

⁵ Amu sirei Musa kole chii ne yaei imanda, ne punu Ng'atuutyet, kosabei eng' nooto.

⁶ Ago mwaei imanda nooto po kayaneet ko uu ni, “Amemwa eng' muguleldang'ung' ile, ‘Ng'oo ne togostoi kipsengwet?’ (Nooto ko komut Kristo kochoorgei)

⁷ anan, ‘Ng'oo ne wendi kochoortogei kebeberwegap ng'wony che looen?’ ” (Nooto ko komut Kristo kotogos eng' che ki pek.)

⁸ Ago mwaei nee? “Neegitenen ng'olyoot, mi kuting'ung' ak mi muguleldang'ung'.” nooto ko ng'olyootap kayaneet, ne ki amdoi;

⁹ amu nging'aany eng' kuting'ung' ile Jeso ko Kiptaiyat, ak iyani eng' muguleldang'ung' ile ki ing'eet `Kamuktaindet ineendet komang'une che ki pek, kesaruun.

¹⁰ Amu iyani chii eng' muguleldo agoi imanda; ak ng'aanyei eng' kutit agoi saruunet.

¹¹ Amu mwaei sireet kole, “Age tugul ne iyani ineendet koma kigoochin kolilaan.”

¹² Amu ma mi kabesyet eng' Yahudyot ak Yunanindet; amu Kiptaiyandanooto ko Kiptaiyatap tugul ak aiyeep eng' icheek tugul che kuurei ineendet.

¹³ Amu age tugul ne kuurei kainetap Kiptaiyat, kesaru.

¹⁴ Kuurtoi ano anyun ineendet `icheek che tomo koyan? Ak iyandoi ano ineendet `icheek che tomo kogas agobo ineendet? Ak kastoi ano ama amdoindet?

¹⁵ Ak amdoitoi ano, ngo ma kiyookto? Agot ko uu ye siraat kole, “Korooron ne tya keelyegap icheeget che ibu logoiywek che po poiboiyet, che po tuguuk che myach!”

¹⁶ Ago ki ma kas iit tugul logoiywek che myach. Amu mwaei Isaiah kole, “Kiptaiyat, ki koyan ng'oo ng'aleekyok?”

¹⁷ Nyoonei anyun kayaneet eng' kaseet, ak nyoonei kaseet eng' ng'olyootap Kristo.

¹⁸ Ago ateebee ale, tos ki ma kas? Ee, iman, “Ki wo tweguunennywa koyom emet komugul, ak ki pa ng'aleekwak agoi ole poochin ng'wony.”

¹⁹ Ago amwae ale, tos ki ma nai Israel? Ki sip komwa Musa kole, “Andeok ng'etkonda eng' nooto ne ma pororyet; atachok eng' pororyet ne ma tinyei naet.”

²⁰ Ak nyigan miising' Isaiah, ak mwaei kole, “Ki nyoorwo icheek che ki ma cheeng'a; ki ataagu eng' icheek che ma teeba.”

²¹ Ago mwaei agobo Israel kole, “Ki aitoochi eunekyuk eng' peetuut komugul piik che ma kase iit ak che ngelelik.”