RIREKAB JEREMIA 4 - Bukuit Ne Tilil

Kergong'yetap Zion

¹ Kalya si komurwoniitu thahabu! Kalya si kowalagiis thahabu che tiliileen miising'! Kagirong' koigap ole-tiliil eng' tabandap ooreet age tugul.

² Weeriigap Zion che po kamanuut ne oo ak ko uu thahabu che korooron, kalya si kiyanie icheek tereen, che poisyonigap eunegap cheptereniot!

³ Agot lelwek kogoochin aarekwak kinet kochuchun, ago kagogolgolit piikyuk, ko uu tyong'igap songolik eng' surkwen.

⁴ Yaamjin ng'elyeptap lakweet ne reryei kutinnyi amu melelda; soomei lagok amitwogik, ama mi chii ne putyin.

⁵ Icheeget che paegei amitwogigap talbisto kemetoi eng' ortinwek; icheeget che kinerta kalaaksetap ngoroik che piriireen ko tebee kapng'atat.

⁶ Amu ki koeet piretap piikyuk kosiir kergong'yetap Sodom, ne ki king'em kigabui eng' sait ne matya, ama twa chii.

⁷ Ki tiliileen piikyik che taagunotiin kosiir teluji, ak ki leelachen kosiir cheego. Poorwekwak ko ki piriireen kosiir koik che kiguure peninim, ki sitatiin ko uu koita ne kiguure sapphire.

⁸ Ago eng' ra, ko tuuen togoochikwak kosiir nesek; ma kinyiti eng' ortinwek. Namegei irireenikwak ak kawekwak; ki koyaam kogoigei keetit ne yamaat.

⁹ Kaigaen icheeget che parei rotwetap chok kosiir icheeget che parei rupeet; che mandoi sabeet mutyo, amu ma nyoor amitwogigap mbar.

¹⁰ Ki konam kwonyiik che ki tinyei rireenet lagokwak koyo; ki ek chooto amitwogikwak eng' ng'emisyetap piikyuk.

¹¹ Ki koyai Kamuktaindet ne Toroor nereegekyik che ng'woneen kosulda, ki korong' nereegekyik che koroomen; ak ki konaam maat eng' Zion, ne ki kobeel lumeiywekyik.

¹² Ki ma koyani laitorinigap ng'wony, anan piik tugul che menyei ng'wony, kole imuuchi usiindet anan puunyoot kochut ormariichogap Jerusalem.

¹³ Ki piit ko uu niito amu tengekwogigap maotikyik, ak yaitwogigap tisiikyik, che kitumda korotiigap piik che po iman eng' kwenunnyi.

¹⁴ Ombenioti eng' ortinwek ko uu kipkoratinik, ki komurwanitu amu korotiik, kot koma ko kanyei chii kotiny ngoroikwak.

¹⁵ Ki wokyi piik koleenji, “Oistegei, murwonen! Oistegei, oistegei, amatotiny!” Ara ki ek che mweisoti ak ko ombeniot, ak ki leenjigei piigap pororyosyek, “Ma kotebyei olito kogeny.”

¹⁶ Ki koseerseer `Kamuktaindet ne Toroor ineendet icheek; ma koiti `Inee icheek kogeny; ma koiti tisiik koek kiy, ama kotinyei konyit poisyek.

¹⁷ Kagong'etyo konyekyok kigeni toreteet ne ma kigeere; ki kigen eng' kagenisyet kowelelegei pororyet ne ka ma imuuchi kosar chii.

¹⁸ Ki cheeng' kakwautikyok, kot ko ki mata kimuuchi keebe eng' ortinwekyok. Kagesunennyo ko ki riik, peetuusyekyok ko ki kiiti amu ki kagoit let nenyo.

¹⁹ Che ki onatech ko ki chepcheben kosiir kipsichinigap parak, ki onatech eng' tuloonook, ki ripistos kogenech eng' surkwen.

²⁰ Ineendet ne iilaat ne po Kamuktaindet ne Toroor, kabusetap saboonwekyok, ko ki namji keriingonikwak, ne ki kimwae acheek keleen, “Eng' urwetap kebebaikyik ko ki menyei kwenutap pororyosyek.”

²¹ Paibaitu ak igaskei, ee cheptap Edom, ne imenye emetap Uz; amu agot aginye ko ityinin kigombet; ibogiti ak iputkei itebi aach ngor.

²² Piretap tengektong'ung', ee cheptap Zion ko kagosulda; ma komutin kogeny keluulin: ago tengektong'ung', ee cheptap Edom, ko iityin ineendet pireet, ng'aanyei tengekwogiguk kotook.