RIREKAB JEREMIA 2 - Bukuit Ne Tilil

Kateunoigap Kamuktaindet

¹ Kalya si kotuge Kiptaiyat cheptap Zion pooldet eng' nereegekyik! Ki kotim karaaranindap Israel eng' kipsengwet konyo ng'wony, amata kobwaat ng'echereetap keelyekyik eng' peetuutap nereegekyik.

² Kigong'em Kiptaiyat meng'otosyek tugul che po Jakobo ama riiree. Ki kobut eng' nereegekyik irimoigap cheptap Judah. Ki koturuur icheek kobwa ng'wony eng' kalilanet pounateet ak pounikyik.

³ Ki kotil kimnateetap Israel eng' nereegekyik che ng'woneen. Ki koweech eunnyi ne po tai konyo eng' taitap puunik. Ki kolal ineendet ko uu maat ne liplibeni eng' Jakobo, ne peelei komoswek tugul.

⁴ Ki koriich kwangennyi ko uu puunyoot, ki tonon kochuul eunnyi ne po tai ko uu puunyoot, ki kobar tugul che iboiboi koonyek; eng' emaitap cheptap Zion; ko ki koroong'ji nereegekyik che koroomen ko uu maat.

⁵ Ki igei Kiptaiyat puunyoot, Ki kong'em Israel; Ki kolugui kooriikyik tugul che po laitorinik, ki kobut irimoikyik. Ki kotesyi cheptap Judah riirek ak kateiyet.

⁶ Ki koisto emainnyi eng' koroomnateet ko uu mbareet, Ki kong'em oldanyi ole kituiyechin. Ki koisto Kamuktaindet ne Toroor tuiyet ne ki king'at ak sabato eng' Zion, ak eng' nyitatetap nereegekyik ko ki kogas laitoryat ak tisiindet.

⁷ Ki kotiimda Kiptaiyat kaptisisyennyi, ak ki kometo oldanyi ne tiliil. Ki konde eutap puunyoot irimoigap kooriikyik che po laitorinik. Ki kobolyo eng' kootap Kamuktaindet ne Toroor, ko uu eng' peetuutap tuiyet ne ki king'at.

⁸ Ki kochop Kamuktaindet ne Toroor kong'em irimeetap cheptap Zion; Ki kokwerto kiit ne kikwaise, tomo koaruny eunnyi eng' ng'emisyet: ki kogoochi irimeet ak tooteet kooteeiyo; ng'emaksei tuwai.

⁹ Isuwe kobendi ng'wony ormariichokyik; ki ng'em ak koiri temeleiywekyik. Mi laitoryandennyi ak pounikyik kwenutap pororyosyek ole ma mi ng'atuutyet; ma nyooru maotikyik ng'ang'utyet ne punu Kamuktaindet ne Toroor.

¹⁰ Tebyei ng'wony poisyegap cheptap Zion, siistos; Ki koseerchi temburyek metowekwak ki kogermenegei kuniok. Pergeinigap Jerusalem ko kagoabuch metowekwak.

¹¹ Ibwandos konyekyuk amu peegap kong', nyalili moennyu. Ki koroong'jigei ng'wony koitonyu, amu ng'emisyetap piikyuk; amu tanuitos lagok ak che reryei eng' ortinwegap nganaseet.

¹² Riirchin kametwagikwak koleenjin, “Mi ano amitwogik ak divaik?” Ye katanuiso ko uu che kagiguoten eng' ortinwegap nganaseet, ye karoong'jigei saboonwekwak tegetigap kametwagikwak.

¹³ Abaoryanun aleen nee? Aragenen nee, ee cheptap Jerusalem? Aaechindosin ak nee, si kobiit agaigain, ee pergeiyat cheptap Zion? Amu oo ko uu nyanjet ole ki putok eng' inyee; ng'oo ne imuuchi konyain?

¹⁴ Ki kogeer maotiguk ng'ang'utik agobo inyee che po tangoita ak perberyo; ak tomo kong'aany kotook tengektong'ung', si koweechin kogeny eng' ole ki kiluuljin, ago ki kogeer agobo inyee lautik che po puch ak ng'aleek che po kamaaset.

¹⁵ Icheek tugul che siirtoi ko iraprapchin eunek; reng'sei ak kolelechi metowekwak agobo cheptap Jerusalem, koleen: “Tos nganasaniito ne kiguure piik, ne ititaat eng' korooronindo, ne poiboiyetap ng'wony komugul?”

¹⁶ Puuniguk tugul ko kagoyatyin kutusweekwak; reng'sei ak kosusei kelek; mwaei kole, “Ki kelugui ineendet! Iman, niito peetuut ne ki kicheeng'e; kagenyooru ak kagegeer!”

¹⁷ Ki koyai Kamuktaindet ne Toroor nooto ki kochop; kagoyai ng'olyoondennyi kosulda ko uu ye kiga ng'at eng' peetuusyek che po keny; kagowiirta kwo ng'wony ama riiree; kagogoochi puunyoot koboiboitunenen, ak kagotoroor kimnateetap puuniguk.

¹⁸ Ki riirchi `mugulelwekwak Kiptaiyat: ee irimeetap cheptap Zion! Ingotenden peegap kong' ko uu aineet peet ak kemoi! Amemuuny, amengosiis laptetap kondang'ung'!

¹⁹ Ng'eet, waach kemoi eng' taunetap saisyegap kemoi! Rong'u muguleldang'ung' ko uu peek eng' taitap Kiptaiyat! Namji parak euneguk tokyi ineendet agobo saboonwegap lagoguk, che tanuitos eng' rubeet eng' tabandap ooreet age tugul.

²⁰ Keero, ee Kamuktaindet ne Toroor, ak ibwaat, Tos ng'oo ne ki iyachi ko uu nooto? Tos amei kwonyiik iyotennywa, lagok che namei eng' eunekwak? Tos kibarchin tisiindet ak maotyot kaptisisyetap Kiptaiyat?

²¹ Ruitos ng'wony murenik ak poisyek eng' ortinwek; kagebar pergeinikyuk ak neranikyuk eng' rotwetap chok; Ki ibar icheek eng' peetuutap nereegeguk, ki ibar ama iriiree.

²² Ki iguur puunikyuk eng' komosta age tugul, ko uu eng' peetuutap tuiyet ne ki king'at. Eng' peetuutap nereegegap Kamuktaindet ne Toroor koma piit chii ne ki chilil anan ne ki ng'et. Icheeget che ki aname ak ariibe kobooch ko mengech ko ki koges punyondennyu.