PILIPIK 4 - Bukuit Ne Tilil

Katigonutik

¹ Nooto anyun, tupchosyekyuk chamanik, che ating'ee emosto, poiboiyennyu ak kuutweennyu, olumdegei anyun eng' Kiptaiyat, chamanikyuk.

² Asoome miising' Euodia, ak asoome miising' Suntuke, koek che po kabwaatet agenge eng' Kiptaiyat.

³ Ee, asoomin aginye, kiboityot ne po iman kobooto, ale toret kobogoryosyechu, amu ki kiboisyei tugul eng' logoiywek che myach, kobooto Klement agine, ak chuun alak che ki kiboitiinik tugul, che mi kainaikwak bukuitap saboondo.

⁴ Oboiboitu eng' Kiptaiyat kotugul: ak amwae kogeny ale, Oboiboitu.

⁵ Ingonaak mutyoneng'wong' eng' piik tugul. Kagoriik Kiptaiyat.

⁶ Amogereeri met eng' kiy age tugul; ago eng' kiy age tugul ko eng' saaet ak soomet kobooto kongoi, ingonaak soomutikwok eng' Kamuktaindet.

⁷ Ak riibei kaalyeetap Kamuktaindet, ne siirei kaguiyet tugul, mugulelwekwok ak kabwaatutikwok eng' Kristo Jeso.

⁸ Ne po let anyun, che kitupche, tuguuk alak tugul che po imanda, alak tugul che po teegisto, alak tugul che po imanda, alak tugul che tiliileen, alak tugul che chamaatiin, alak tugul che kimwaitoe ne myee; ngo mi myeein age tugul, ak ngo mi kalasunet age tugul, obwaat tuguuchuuto.

⁹ Tuguuk che ki oneetkei ak che ki otaach ak che ki ogas ak che ki ogeer eng' anee, oyai tuguuchooto: ak kotep kobootok Kamuktaindet ne po kaalyeet.

Mwaetap kongoi agobo konunoikwak

¹⁰ Ago koabaibaitu miising' eng' Kiptaiyat, ale koobwaata kogeny nguno, ko kagobata peetuusyek che chaang'; ko uu ye kootinye kabwaatonooto iman, ago ki ma otinye poroindo.

¹¹ Ma ng'alaali amu ma tinye kiy: amu ki aneetkei, eng' atebeet age tugul ne atinye ale, yama ko uu nooto.

¹² Angen ole ateptoi eng' terterindo, ak angen ole ateptoi ye katesak tuguuk: eng' kiy age tugul ak eng' tuguuk tugul, ko ki aneetkei ung'ootyetap piyendo ak rugutet, anyoor che chaang' ak abanan.

¹³ Amuuchi ayai tuguuk tugul eng' ineendet ne igimita.

¹⁴ Ago ki oyai ne myee, amu ki otinye yamdaet eng' nyalildanyu.

¹⁵ Ak ongen okweeget okweek Philippik, ole eng' taunetap logoiywek che myach, ye kinga we eng' Makedonia, koma piit kaniset ne ki tinyei yamdaet kobooto eng' ng'olyootap kagoitoet ak taaget, kobatee okweegei kityo;

¹⁶ amu agot eng' Thessalonika ko ki oyookwo atkai tugul tuguuk che ki ma atinye.

¹⁷ Ma keele acheeng'e konunet; ago acheeng'e logoek che tesoksei eng' koiiteng'wong'.

¹⁸ Ago atinye tuguuk tugul, ak che siirtoot: aa piyong'ot, amu ki ataach eng' Epaphroditus tuguuk che kibunwok, che po ng'uunet ne nyamdut, korosyot ne taagaksei, ne iboiboi Kamuktaindet.

¹⁹ Ago inyiitwok Kamuktaindet nenyu kiit age tugul ne obononi ko uu mogornatosyekyik eng' toroornatet eng' Kristo Jeso.

²⁰ Nguno anyun ingobunji Kamuktaindet nenyo, ineendet Kwandanyo, toroornatet koigeny ak koigeny. Amen.

Ng'aleek che po let

²¹ Ogat age tugul ne tiliil eng' Kristo Jeso. Igatok tupchosyek che mi kobooto.

²² Igatok tugul che tiliileen, miising' ko icheeget che mi kootap laitoryat.

²³ Ingotep myeeindap Kiptaiyat Jeso Kristo kobooto saboonwekwok.