PILIPIK 1 - Bukuit Ne Tilil

Kagateet

¹ Paulo ak Timoteo, otwogigap Kristo Jeso, kisirchini tugul che tiliileen eng' Kristo Jeso che miitei Philippi kobooto riibiigap kaniset ak kiboitiinik:

² Ingotep myeeindo kobootok ak kaalyeet che punu Kamuktaindet Kwandanyo ak Kiptaiyat Jeso Kristo.

Saaet agobo Philipik

³ Amwachini Kamuktaindet nenyu kongoi agobo kabwaatennyu tugul ne abwaatok,

⁴ eng' soomennyu age tugul agobo okweek tugul, asoome eng' soomennyu eng' poiboiyet kotugul,

⁵ amu yamdaeng'wong', eng' logoiywek che myach kobooch peetuut ne po tai agoi peetuuni;

⁶ angen komyee ng'olyoondoniito, ale ineendet ne ki toi poisyet ne myee eng' okweek koyaei kosulda agoi peetuutap Jeso Kristo:

⁷ ko uu ye myee eng' anee abwaat ko uu niito agobo okweek tugul, amu omi muguleldanyu, amu eng' monjorornatennyu, ak eng' riipseet ak kagimitetap logoiywek che myach, okweek tugul ko oo yamdoik kobooto eng' myeeindo.

⁸ Amu Kamuktaindet paoryandennyu, ko uu ye ating'enok okweek tugul emosto eng' rireenosyegap Kristo Jeso.

⁹ Ak ni ko saaennyu ale kotesak chamyeng'wong' miising' inne eng' naet ak kaguiyet tugul;

¹⁰ si kobiit onai komyee tuguuk che po telunateet; si kobiit oegu che ma tinyei keniisyet, che ma tinyei kanagut agoi peetuutap Kristo;

¹¹ ko oo nyiitootiin eng' logoegap imanda, che punu Jeso Kristo, agoi toroornatet ak kalasunetap Kamuktaindet.

Paulo ak mwaitaetap logoiywek

¹² Ago amache, che kitupche, ale, onai ole tuguuk che kibwanjo, ko ki kotoret logoiywek che myach koba tai;

¹³ kot kotook monjorornatennyu agobo Kristo eng' kiplugotinik tugul che po kaplaitoryat, ak eng' piik alak tugul;

¹⁴ ak tinyei che chaang' eng' che kitupche eng' Kiptaiyat nyiganateet ne oo kosiir, komwaita ng'olyootap Kamuktaindet ama eng' kaiyweisyet, amu tinyei kamang'unet agobo monjorornatennyu.

¹⁵ Amdoi alage Kristo eng' ng'etkonda, ak suryet; koamdoi alage ak icheek eng' kabwaatutik che myach;

¹⁶ amdoi alage eng' chamyet, kongen kole ki kindea ariip logoiywek che myach:

¹⁷ ago amdoi alage Kristo eng' toiyet, ma eng' mugulelwek che leelach, koleen teswa nyalilda eng' monjorornatennyu.

¹⁸ Nee anyun? Kobatee kityo eng' ooreet age tugul, ngo eng' keniisyet anan ngo eng' imanit, keamdoi Kristo; ak abaibai eng' nooto, ee, ak ta abaibaitu.

¹⁹ Amu angen ale walaksei niito koegu yetunennyu, eng' soomeng'wong', ak ne koonu Kabuusetap Jeso Kristo.

²⁰ Ko uu eng' kagenisyennyu ne ageni miising' ak kamang'unennyu, ale ma kigoono alilan eng' kiy age tugul ago eng' nyiganateet tugul, ko uu kotugul, ko uu nooto agine nguno kitoroori Kristo eng' poortanyu, ngo eng' saboondo, anan eng' meet.

²¹ Amu eng' anee ngasabe ko Kristo, ak ngamee ko poroteet.

²² Ago ngasabe eng' poorto, ngo niito logoegap poisyennyu, ko mangen anyun ne aleweni.

²³ Amu kagigikyo kwenutap tuguuk aeng', atinye mageet awo ketebi ak Kristo; amu myee nooto miising' kosiir:

²⁴ ago ngatebi eng' poorto konyolu kosiir agobo okweek.

²⁵ Ak atinye kamang'unoni, ak angen ale atebye, ee, ak ta atebye kobootok okweek tugul, agobo teseng'wong' po tai ak poiboiyet eng' kayaneet;

²⁶ si kobiit kotesak kalasuneng'wong' eng' Kristo Jeso eng' anee, amu ami kobootok kogeny.

²⁷ Ago ingoek atebeeng'wong' ne nyoljin logoiywek che myach che po Kristo: si ngot anyoo ageerok anan ngo ma mi anee, amuuchi agas agobo atebeeng'wong', keele otonondosi komyee eng' sabeet agenge, eng' muguleldo agenge ogiiligei agobo kayaneetap logoiywek che myach;

²⁸ amat komuok puunik eng' kiy age tugul: nooto kaboorunet ne tagunoot ne po luseet eng' icheek, ago po yetuneng'wong', ak punu nooto Kamuktaindet;

²⁹ amu ki kigoonok agobo Kristo, ma oyan ineendet kityo, ago onyalilye agobo ineendet:

³⁰ otinye lugonooto ki ogeerena, ak ogase nguno keele mi eng' anee.