PILEMON 1 - Bukuit Ne Tilil

¹ Paulo, kimonjororyotap Kristo Jeso, ak Timoteo tupchennyo, kisirchini Philemon chamanennyo ne kiboityot ne kiboisyei tugul,

² ak Apia chepkamennyo, ak Arkipa asigarindet ne kiboisyei tugul, ak kaniset ne mi koong'ung':

³ Ingotep myeeindo kobootok ak kaalyeet, che punu Kamuktaindet Kwandanyo ak Kiptaiyat Jeso Kristo.

Chamyet ak kayaneetap Philemon

⁴ Amwachini Kamuktaindet nenyu kongoi kotugul, amwain eng' saautikyuk,

⁵ agase agobo chamyeng'ung', ak kayaneet ne itinye eng' Kiptaiyat Jeso, ak eng' che tiliileen tugul.

⁶ Asaae ale si koek yamdaetap kayaneng'ung' ne poisye komyee, ye inai kiy age tugul ne myee si keyai agobo Kristo.

⁷ Amu ki atinye poiboiyet ne oo ak kagaigaet eng' chamyeng'ung', amu kigonyoor kamuung'et mugulelwegap piik che tiliileen agobo inyee, ne kitupche.

Saaet agobo Onesmus

⁸ Nooto anyun, agot nga ndatinye nyiganateet eng' Kristo si ang'atiin agobo nooto ne nyolu,

⁹ ago, amu chamyet asoomin miising', anee Paulo ne koaositu, ak nguno kogeny ko aa kimonjororyot ne po Kristo Jeso.

¹⁰ Asoomin miising' agobo lakweennyu Onesmus, ne ki asich eng' monjorornatosyekyuk,

¹¹ Eng' tai ko ki ma kotoretin ineendet eng' kiy, ago nguno kotoretin ak kotoreta.

¹² Kaaweegun ineendet ne muguleldanyu.

¹³ Ki tamache ale araany ketebi tuwai, si kotoreta kogeerenengei eng' monjorornatosyegap logoiywek che myach;

¹⁴ ago ma amach ayai kiy kotom agas kiit ne ibwaati; si ma pun myeeindong'ung' torchinet, ago chamdaeng'ung'.

¹⁵ Amu abeere ki ibesyenengei eng' peetuusyek che matya, si kobiit otebi tuwai kogeny agoi;

¹⁶ ma ko uu otwogin kogeny ago kogosiir otwogin, tupchet ne chamat, miising' ko eng' anee ago siirei ne tya anyun eng' inyee, eng' poorto ak eng' Kiptaiyat.

¹⁷ Nooto anyun ngiita ile ki agenge eng' poisyet, itaach anyun ko uu ye imuuchi itaacha aneendet.

¹⁸ Ago ngo ki koyaun kiy ne ya, anan ngo ki kobesenin kiy, iitya nooto;

¹⁹ aneendet Paulo ne kasir eng' eunnyu, ale ayaagun; ago ma mwaun ale itinye pesendanyu, uu keele, inyeendet nooto.

²⁰ Ee, tupchennyu, inganyoorunenen poiboiyet eng' Kiptaiyat. Imuung'ji muguleldanyu eng' Kristo.

²¹ Kasirun amu amang'u kaseng'ung' po iit, angen ale iyae agot che siirei che amwae.

²² Ago kobooto chooto ichobwa ole anyoo arue: amu amang'u ale eng' saautikwok amuuchi keeweekwo Anyoonjok.

Kagatyosyek che po let

²³ Igatin Epapra ne ki kimonjororinik tuwai, eng' Kristo Jeso;

²⁴ ko uu nooto Mariko, Aristarko, Dema, ak Luka, che ki kiboitiinik tugul.

²⁵ Ingotep myeeindap Kiptaiyandennyo Jeso Kristo kobooto saboonwekwok. Amen.