OBADIA 1 - Bukuit Ne Tilil

Kiming'ini menoteetap Edom

¹ Ng'ang'utyetap Obadiah. Mwaei Kiptaiyat Kamuktaindet ne Toroor ko uu ni agobo Edom: Ki kegas ng'aleek che punu Kamuktaindet ne Toroor, ak ki kiyookto tononjinindet kwo ye mi pororyosyek, koleenji, ong'eetye! Ong'eetye kegirindee ineendet eng' lugeet.

² Keero, tuun aming'inin eng' pororyosyek; tuun kisasin miising'.

³ Ki koberberin menoteetap muguleldang'ung', ee, inyee ne imenye ole kibetak eng' rwandet, ne toroor meng'ootennyi; ne mwaei eng' muguleldanyi kole, “Ng'oo ne tururwa?”

⁴ Agot ngitiriren iwe parak miising' ko uu kipsiichit, agot ngiteech kesweng'ung' eng' ole mi kecheik, atururun eng' olooto, mwaei Kamuktaindet ne Toroor.

⁵ Ngot kobwonjin chooriik, ngot kobwonjin rebiik kemoi, kebarin ne tya anyun! Tos machoorsei kot konyoor che yamei? Ngot kobwonjin piik che putei sabibuk, ko tos ma pagaaktoi turoonik?

⁶ Kisiaktoi ano tuguugap Esau! Kicheeng'doi ano konoraikyik che ung'ootiin!

⁷ Ki kong'aalin che ki onamegei tugul, ki koonin icheek agoi iit kiwoto; ki koterterin piik che ki oting'egei kaalyeet; riigenen mesteet `icheek che amei amitwogiguk, ma tinyei kaguiyet ineendet.

⁸ Eng' peetuunooto, mwaei Kamuktaindet ne Toroor Ang'eme piik che utaatiin che po Edom, ak ang'em naet eng' tulweetap Esau?

⁹ Ak toptobendos mureniguk che nyigoonen, ee Teman, si kobiit kebar chii age tugul eng' tulweetap Esau eng' parisyet.

Kergong'yet agobo Edom

¹⁰ Tuchin teweernateet amu koroomnateet ne ki iyachi ng'eetap kamenng'ung' Jakobo, ak kebarin ak keisten koigeny.

¹¹ Eng' peetuut ne ki itononi eng' pitoniin, eng' peetuut ne ki ibe toek tuguukyik, ak kochut kipsagarek ormariichokyik, ak koseer parbareek agobo Jerusalem, ko ki iige inyee age eng' icheek.

¹² Ago amat igeer peetuutap ng'eetap kamenng'ung' eng' peetuutap tiritindanyi, amebaibaitu eng' lagogap Judah eng' peetuutap ng'emisyennywa; anan ing'alaal eng' menoteet eng' peetuutap pichiindo.

¹³ Amechut ormariichetap piikyuk eng' peetuutap nyalildanywa; ee, amegeer usiisyennywa eng' peetuutap nyalildanywa, anan onam tuguukwak eng' peetuutap nyalildanywa.

¹⁴ Ametonone ole tuiyechin ortinwek, ile itilde piikyik che chilildos; amegoite piikyik che ng'etu eng' peetuutap pichiindo.

Irwookyin `Kamuktaindet pororyosyek

¹⁵ Amu kariikyi `peetuutap Kamuktaindet ne Toroor pororyosyek tugul. Ko uu ye ki iyai, keyaun ko uu nooto; weekyingei meting'ung' poisyoniguk.

¹⁶ Amu ko uu ye ki oeisee eng' tulweennyu ne tiliil, eeisei ko uu nooto kotugul pororyosyek tugul, ee, eeisei ak koterteeryot, ak koigei tuguuk che ki ma komi.

Iterteerisyei piigap Israel

¹⁷ Ago piitu che chilildos eng' tulweetap Zion, ak kotiliilit; ak konam kootap Jakobo tuguugap pichooto, kobunji.

¹⁸ Ak koek kootap Jakobo maat, ak koek kootap Joseph liplibenet, ak koek kootap Esau mobeek, ak kolalyo eng' kwenunnywa ak kobeel kogees, ama ng'etu chii eng' kootap Esau; amu kagomwa Kamuktaindet ne Toroor ng'olyoondoniito.

¹⁹ Ak konam icheek che po murot tai tulweetap Esau kobunji; ak konam icheek che menyei emet ne soi ne po Philistiik; ak konam emetap Ephraim ak emetap Samaria kobunji, ak konam Benjamin emetap Gilead kobunji.

²⁰ Ak konam che kiga keluul che po lugoniito po piigap Israel che mi kwenutap Kanaanik, namei icheek kot koit Sarepat; ak namei che kiga keluul che po Jerusalem che mi Separad, nganasook che mi murot tai.

²¹ Ak togosu `saruunik tulweetap Zion korwookyi tulweetap Esau; ak kobunji pounateet `Kamuktaindet ne Toroor.