NG'ATUTIK 9 - Bukuit Ne Tilil

Pireet agobo ngelelnateet

¹ Ogas, ee Israel! Ilandoi rani eng' Jordan iwendi iluuli pororyosyek che eecheen ak ko kiimeen kosiirin, ak nganasook che eecheen che ki king'ote irimosyek che itei parak.

² Iluuli piik che eecheen ak ko kooen, weeriigap Anagik che ingen, che ki igase kemwaei keeleen ng'oo ne imuuchi kotonon eng' taitap weeriigap Anak?

³ Nai anyun rani ile, Kamuktaindet ne Toroor Kamuktaindeng'ung', ko landoi kondoenen ko uu maat ne oo ne liblibeni. Ng'emei pichooto ak kogoochi konyeratitu eng' taing'ung' si iluul ak ing'em ichokyi ko uu ye kimwaun Kamuktaindet ne Toroor.

⁴ Ye kagoon `Kamuktaindet ne Toroor icheek eng' taing'ung', ko mat imwa eng' muguleldang'ung'ile ki imutwaa Kamuktaindet ne Toroor ak kogoono emoni kobunjo amu imandanyu. Oone Kamuktaindet ne Toroor pororyosyechu eng' taing'ung' amu sogornatennywa.

⁵ Ma eng' imandang'ung' anan atebeeng'ung' ne myee, ne kagoonin inam emennywa. Ago oonei `Kamuktaindet ne Toroor Kamuktaindeng'ung' pororyosyechu eng' taing'ung' amu sogornatennywa, si kobiit kogimit Kamuktaindet ne Toroor ng'olyoot ne ki iyasyechi kwanisyeguk Abraham, Isak ak Jakobo.

⁶ Nai anyun ile ma koonin Kamuktaindet ne Toroor Kamuktaindeng'ung' emoni myee kobunjiin amu imandang'ung'; amu okweek ko oo piich che uueen metowoi.

⁷ Ibwaat ameutyee tagisyet ne ki itach Kamuktaindet ne Toroor Kamuktaindeng'ung' eng' surkwen, ki ongelelji Kamuktaindet ne Toroor kobooch peetuut omong'u eng' emetap Misiri agoi oitu yu.

⁸ Ki otach Kamuktaindet ne Toroor eng' Horeb, kot konereech komach kobaraak.

⁹ Kinga togoste tulweet ibataach koik che lebeleen, che chooto ko koigap kayomiset ne ki yai Kamuktaindet ne Toroor kobootok, ko ki atebi eng' tulweet peetuusyek artam ak kemousyek artam, ak ma am amit amaee pei.

¹⁰ Ki koono Kamuktaindet ne Toroor koichooto aeng' che lebeleen che ki kisir eng' mornetap Kamuktaindet. Ki kisirchi koichooto ng'aleek tugul che kimwaiwok Kamuktaindet ne Toroor eng' tulweet, komang'une maat eng' peetuutap tuiyet.

¹¹ Ye kingo pata peetuusyechooto artamu ak kemousyek artam, kogoono Kamuktaindet ne Toroor koichooto aeng' po kayomiset.

¹² “Ki leenjo Kamuktaindet ne Toroor, Ng'eet choortegei ak ichakte, amu kagongelelso piiguk che ki imutuu eng' Misiri. Ko matyanit, ko kagomasta eng' ooreet ne ki ang'at ak koyachigei kanamwet ne kitaanyi.”

¹³ Ki ng'alaalwo Kamuktaindet ne Toroor kogeny kole kaageer pichu ale piich che uueen metowoi,

¹⁴ meto si awong' icheek, abukto kainennywa eng' kurereetap kipsengwet, ak ayain iegu pororyet ne kiim ak ko oo kosiir icheek.

¹⁵ Ki aweege anyun, achoorugei eng' tulweet ye kita kolalei maat, atinye koichooto aeng' po kayomiset eng' eunekyuk tuwai.

¹⁶ Ogeero, ki ageer ale ki oyachi Kamuktaindet ne Toroor Kamuktaindeng'wong' tengekto amu ki otang'jigei itoondap moita. Ki omaste ochakte omete ooreet ne king'ataak Kamuktaindet ne Toroor.

¹⁷ Ki anam koichooto tuwai ak awirte atui eng' taing'wong' ogeere.

¹⁸ Ki abutyi ng'wony eng' taitap Kamuktaindet ne Toroor peetuusyek artam ko uu ye ki ayai eng' tai. Ma aam amit anan aee pei amu tengektong'wong' tugul ne ki oyai. Ki oyai ne ya eng' Kamuktaindet ne Toroor otach ineendet.

¹⁹ Ki aiywei nereegek ak nyitatet ne ng'waan ne kinereekyok Kamuktaindet ne Toroor komachei kobaraak. Ago kigasa iit Kamuktaindet ne Toroor peetuunooto agine.

²⁰ Ki nereekyi `Kamuktaindet ne Toroor miising' Aron komachei kobar, ago ki asaa agobo Aron eng' yooto agine.

²¹ Ki aip anyun tengegoto ng'wong' po kanamwetap moita ne kiga oyai ak abeel. Ki atui komengegitu ak ang'aa agoi kotambululitu, yeityo aroong'ji kereruut ne rootune tulweet.

²² “Ki otach Kamuktaindet ne Toroor kogeny, eng' Tabera, eng' Massah ak eng' Kibrot-hataaba.

²³ Ye kingo yootok Kamuktaindet ne Toroor eng' Kadesh-barnea koleenjok, otogoste onam emet ne ki agoonok, obistoe nooto kang'atak Kamuktaindet ne Toroor Kamuktaindeng'wong', ama oyan ineendet anan ogas iit kutinnyi.

²⁴ Ki ongelelji Kamuktaindet ne Toroor kobooch peetuut ne ki anaak.

²⁵ “Ki abutyi ng'wony eng' taitap Kamuktaindet ne Toroor eng' peetuusyechooto artam ak kemousyechooto artam amu ki kale Kamuktaindet ne Toroor iwong'wok.

²⁶ Ki asaa Kamuktaindet ne Toroor aleenji, ‘Ee Kiptaiyat Kamuktaindet ne Toroor, amewong'u piiguk che poroteng'ung', che ki itaach eng' etunateng'ung', che ki imong'u eng' Misiri eng' euut ne kiim.

²⁷ Amat igeer uuindap met ne po pichu anan yaityennywa, anan tengektonywa. Ago ibwaat kiboitiniguk Abraham, Isak ak Jakobo.

²⁸ Ngot ibar iwong'u, koleen emet ne ki imoong'unenech ma imuuch Kamuktaindet ne Toroor komut icheek koit emet ne ki iarorchi, ak amu wechei, ko ki imong' si kobiit kobar icheek eng' surkwen.

²⁹ Icheeget ko piiguk ak ko poroteng'ung' che ki imoong'u eng' kimnateng'ung' ne oo, ak eng' eung'ung' ne chuulaat.’