NG'ATUTIK 34 - Bukuit Ne Tilil

Meetap Musa

¹ Kingo pata, kotogosta anyun `Musa eng' warengetap Moab, kwo tulweetap Nebo agoi paragutap Piska, ne tokyingei Jeriko. Ki iboorchi `Kamuktaindet ne Toroor ineendet emet komugul ne po Gilead, agoi Dan,

² Naphtali komugul, emetap Ephraim ak Manasseh ak emet komugul ne po Judah agoi nyanjetap Mediterenian ne mi cherongo.

³ Ki iboorchi murot tai ak warenget ne po atebweet ne po Jeriko, nganaseet ne mi tiironigap sosik agoi Zoar.

⁴ Yeityo koleenji `Kamuktaindet ne Toroor, “Emoni ne ki ayosyechi Abraham, Isak ak Jakobo aleenji, ‘Agoochini iyoteng'ung'.’ Kaagoonin anyun igeer eng' konyeguk ago melandoi oliindo.”

⁵ Ki me anyun `Musa kiboityotap Kamuktaindet ne Toroor eng' olooto eng' emetap Moab ko uu ng'olyootap Kamuktaindet ne Toroor.

⁶ Ak ki tupchi `Kamuktaindet ne Toroor Musa atebweet eng' emetap Moab ole tokyingei Beth-peor. Ago ama mi chii ne ingen kererinnyi agoi rani.

⁷ Kiga kotar `Musa kenyiisyek pogol ak tiptem ye kimeei. Ki ma Kor ama igeskei kimnateennyi.

⁸ Ki riirchi piigap Israel Musa eng' warengetap Moab peetuusyek sosom. Ki igeskei anyun peetuusyegap kateiyet ak riirek agobo Musa.

⁹ Ki nyiitaat Joshua weeriitap Nun muguleldo ne po utaatyet. Amu kiga kogonoor Musa eunekyik ineendet. Ki kas iit anyun lagogap `Israel ineendet ak ki yai ko uu ye ki ng'at `Kamuktaindet ne Toroor Musa.

¹⁰ Tomo kobiit eng' Israel maotyot ne uu Musa ne ki nai Kamuktaindet ne Toroor kimni;

¹¹ eng' kaboorunoik tugul, ak kwang'utik, che ki iyooktoi `Kamuktaindet ne Toroor ineendet koyai eng' emetap Misiri, eng' Pharaoh, eng' otwogikyik tugul ak eng' emennyi komugul;

¹² Eng' euut komugul ne kiim ak kamuiset komugul ne oo, ko ki yai Musa eng' taitap Israel tugul.