NG'ATUTIK 33 - Bukuit Ne Tilil

Koberuuri `Musa pororyosyek

¹ Ni kaberuret ne ki iberuur `Musa chiitap Kamuktaindet piigap Israel kotom kome:

² Ki toi komwa kole, “Ki nyo Kamuktaindet ne Toroor eng' Sinai, king'eet eng' Seir amu icheek. Ki iluu eng' tulweetap Paran, Ki nyo eng' tamanusyegap eliphusyegap che tiliileen: ki mi eunnyi ne po tai ng'atuutyet ne uu maat eng' icheek.

³ Ee, ichame pororyosyeguk; mi eung'ung' piikyik tugul che tiliileen. Ing'uruukyin ole po keelyeguk, ak taachei age tugul eng' ng'aleeguk.

⁴ King'atwech `Musa ng'atuutyet, poroteetap tuiyetap Jakobo,

⁵ Ki ek Kamuktaindet ne Toroor laitoryat eng' Jesurun, Ye kingo yumjigei pounigap piik, ak ye kingo yumjigei ortinwek tugul che po Israel.”

⁶ Ki mwa ni anyun Musa agobo Reuben: “Ingosap Reuben, ma meei; Ago ingong'ering'itu piikyik.”

⁷ Ni kaberuretap Judah: ki le, “Kas ee `Kamuktaindet ne Toroor kutitap Judah, Imutu ineendet konyo ole mi piikyik. Igimiit si kosargei eng' eunnyi. Ak iegu toretindennyi eng' puunikyik.”

⁸ Ki mwa ni `Musa agobo Lawi, “Ki igoochi Tumim neng'ung' ak Urim neng'ung', kiboityong'ung' ne tiliil, Ne ki ityem eng' Massah, Ak ki oborye ak ineendet eng' peegap Meribah;

⁹ Ne ki mwa agobo kwandanyi ak kamennyi kole, ‘Ma ageer ineendet’; Ama nai che tupcho, Ama nai lagokyik: Amu ki isup icheek ng'olyoondeng'ung', Ak ki riip kayomiseng'ung'.

¹⁰ Ineeti Jakobo kirwoogutiguk, Ak koneeti Israel ng'atuutyeng'ung': Indoi taing'ung' nyamdutik che kibeelei, Ak konde kagoochinet ne kibeelei komugul kaptisisyeng'ung'.

¹¹ Ee, Kamuktaindet ne Toroor, iberuur tuguukyik, Ak itaach poisyonigap eunekyik. Pir suenutigap icheeget che ng'eetyin, Ak che po icheeget che wechei ineendet si ma ng'eetyo kogeny.”

¹² Ki le agobo Benjamin, “Meng'iisyei chamaneetap Kamuktaindet ne Toroor eng' kaalyeet eng' ye neegitee ineendet. Tuchei peet komugul, Ak komenyei kwenutap tigigoikyik.”

¹³ Ak ki le agobo Joseph, “Iberuurot eng' Kamuktaindet ne Toroor emennyi; Amu tuguuk che korooron kot che po roptap kipsengwet, ak amu rewoot ak rireet ne mi kurere.

¹⁴ Ingiberuur eng' tuguuk che korooron kot che po logoegap asiista, ak tuguuk che korooron kot che po ruroteetap arawek.

¹⁵ Ingiberuur eng' tuguuk che eecheen miising' che po tuloonoogap keny, ak tuguuk che korooron che po tuloonook che mengeechen che po koigeny.

¹⁶ Iberuurot amu tuguuk che korooron che po ng'wony ak nyiennyi, ak mageet ne myee ne po ineendet ne ki menyei sondiit. Ingonyonji metitap Joseph perurto, ak eng' metitap ineendet ne ki kitabaane tupchosyekyik.

¹⁷ Twateiyot ne punu kirginnyi kotinyei toroornatet; ak kuinoikyik ko kuinoigap soet. Toortoe chooto pororyosyek tugul agoi ole poochin ng'wony. Chooto tamanusyegap eliphusyegap Ephraim, ak chooto eliphuusyek che po Manasseh.”

¹⁸ Yeityo kole Musa agobo Zebulun, “Paibaitu, ee Zebulun, eng' mandaeng'ung'; Ee, ingotunen Issakar, eng' emaisyek.

¹⁹ Kuurei icheek pororyosyek kobwa tulweet, si kogoito eng' olooto tiseiywek che po imanda. Amu chuchuni icheek chaang'indap nyanjosyek, ak konoraik che ung'ootiin che po ng'aniek.”

²⁰ Kingo tar kole agobo Gad, “Iberuurot ineendet ne ibaroi Gad, meng'iisyei ineendet ko uu ng'etundo ne kotoy. Pachei euut, ee, ak metit parak.

²¹ Ki lewenjigei kebeberta ne po tai, amu ki kigonor eng' olooto kebebertap ne igoitoi ng'atuutik. Ki nyo kobooto pounigap piik, ki yai imandap Kamuktaindet ne Toroor, ak kirwoogutikyik eng' Israel.”

²² Yeityo kole agobo Dan, “Aarwetap ng'etundo Dan. Torombenoti kobunu Bashan.”

²³ Ye rup komwa ni agobo Naphtali kole, “Ee Naphtali ne ki ibiye chameet, ak ne nyiitaat kaberuretap Kamuktaindet ne Toroor: Ingobunjin cherongo ak murot tai.”

²⁴ Ak ki le agobo Asher, “Ingiberuurchi Asher lagok; ingochamak ineendet eng' che tupcho, ak ingorooch keldanyi mwaita.

²⁵ Egu kweoniguk kariik ak sugunonik, ak tebyei kimnateng'ung' ko uu peetuusyeguk.”

²⁶ “Ee Jesurun, ma mi ne uu Kamuktaindet, ne laanyei kipsengwet si kotoretin, ak laanyei parak eng' telunatennyi.

²⁷ Meng'ateng'ung' Kamuktaindet ne po koigeny, ak kanabin eunek che po koigeny. Toortoi puunik eng' taing'ung'. Ineendet ne leen, ‘Ng'em icheeget.’

²⁸ Meng'iisyei anyun Israel eng' kaalyeet, Kondap peek ne po Jakobo ineegei. Eng' emet ne po peek ak divaik. Ee, isau kipsengwetisyekyik rewoot.

²⁹ Ee Israel, igasigei: Ogergei ak ng'oo, pororyet ne ki sar Kamuktaindet ne Toroor? Ineendet ne long'eet ne toretin, ak ko rotweng'ung' po chok, ne po telunateng'ung'! Yaigei puuniguk koigei che kase iit, si ityech oldinwekwak che sutotin.”