NG'ATUTIK 28 - Bukuit Ne Tilil

Kaberuuroik ne piitu amu kasetap iit

¹ “Ago ngiepchi iit kutitap Kamuktaindet ne Toroor Kamuktaindeng'ung' eng' kagiiletapkei, iriip ng'atuutikyik tugul che kaang'atiin rani, koeetin anyun Kamuktaindet ne Toroor Kamuktaindeng'ung' isiir pororyosyek tugul che mi ng'wony.

² Pwonjinin kaberurosyechu tugul ak koityin ngiepchi iit kutitap Kamuktaindet ne Toroor Kamuktaindeng'ung'.

³ “Kiberuurin eng' nganaseet kiberuurin eng' mbar.

⁴ “Kiberuuri iyoteng'ung', iyoteetap emeng'ung' ak iyoteetap akwotisyeguk, ne po tuguuk ak aaregap keechiireguk.

⁵ “Kiberuuri kitongeng'ung' ak tereeng'ung' ne kikwong'e peek.

⁶ Kiberuurin ye imong'u ak kiberuurin ye imandoi saang'.

⁷ Igoitoi `Kamuktaindet ne Toroor puuniguk che ng'eetyinin kiterteer eng' taing'ung'. Ipookyinin eng' ooreet agenge, ago mwee ortinwek tisap eng' taing'ung'.

⁸ Ng'atei Kamuktaindet ne Toroor perurto konyonjin eng' chogeniguk ak eng' tugul che iyai eng' eung'ung' ak iberuurin eng' emet ne koonin Kamuktaindet ne Toroor Kamuktaindeng'ung'.

⁹ “Ngiriip ng'atuutigap Kamuktaindet ne Toroor Kamuktaindeng'ung', iwendote ortinwekyik, kogimitin Kamuktaindet ne Toroor iegu pororyennyi ne tiliil ko uu ye ki iyasyeun.

¹⁰ Ye keer pororyosyek tugul che po ng'wony kole kiguurtoenen kainetap Kamuktaindet ne Toroor, koiywein.

¹¹ Iyabin Kamuktaindet ne Toroor ibaraitu iegu ne nyiitaat myeeindo, eng' iyoteng'ung', eng' iyoteetap akwotisyeguk ak eng' iyoteetap koreng'ung' eng' emet ne ki iyasyechi Kamuktaindet ne Toroor kwanisyeguk kole koonin.

¹² Amu yaatun Kamuktaindet ne Toroor konorwennyi ne karaaran nooto ko kipsengwet korobonji emeng'ung' eng' peetuusyekyik ak koberuur poisyonik tugul che po euneguk. Ibesendochini pororyosyek che chaang' ago mebeseni.

¹³ Yain Kamuktaindet ne Toroor iegu metit ago meegu katutyet ak iegu ne mi parak kityo ago meegu ne mi ng'wony, ngiepchi iit ng'atuutigap Kamuktaindet ne Toroor Kamuktaindeng'ung' che ang'atiin rani, iriip ak iyai,

¹⁴ ne meistoegei ng'olyoo age tugul ne ang'atiin rani, iwe tai anan kaataam isup kanamonik ioot.

Chubisyosyek che piitu amu pistoet

¹⁵ “Ago ngo meepchi iit kutitap Kamuktaindet ne Toroor Kamuktaindeng'ung' iriip ak iyai ko uu ng'atuutikyik tugul ak kaneetisyosyekyik che ang'atiin rani, kobwonjin anyun ak koityin chubisyosyechu tugul:

¹⁶ Kichubin eng' nganaseet ak kichubin eng' mbar.

¹⁷ Kichubei kitongeng'ung' ak tereeng'ung' ne kikwonge peek.

¹⁸ Kichubei iyoteng'ung', iyoteetap emeng'ung', ak ne po tuguuk ak aaregap keechiireguk.

¹⁹ Kichubin ye imong'u ak kichubin ye imandoi saang'.

²⁰ “Iyogun Kamuktaindet ne Toroor chubisyet, nyalilda ak kereetap kong' eng' tugul che iyae euneguk agoi kong'emin ak agoi ilus ichakte, amu yaityetap poisyoniguk ne kigoonin ibagaakta.

²¹ Koonin Kamuktaindet ne Toroor koroito konamin agoi kowong'un eng' emet ne iwendi iname kobunjiin.

²² Pirin Kamuktaindet ne Toroor eng' chebuonit, maat ne mi poorto, kabwanet, maat ne ng'waan, rotwetap chok ak chelalityet, ak uchatet; onotin chooto agoi ilus.

²³ Yamei ko aiegeitu sugunwet kipsengwet ne mi paragung'ung' ak kogergeitu ak karnet ng'wony ne ityeche.

²⁴ Yaei Kamuktaindet ne Toroor roptap emeng'ung' koek temburyek ak ng'ung'unyek ak kochoorchiningei chooto eng' kipsengwet agoi igeesuge.

²⁵ “Igoitoin Kamuktaindet ne Toroor koterteerin puuniguk. Ibookyini eng' ooreet agenge ak imwee eng' tainnywa eng' ortinwek tisap ak konaatiin laitornatosyek tugul che po ng'wony.

²⁶ Ak koek muustong'ung' amditap toriitik tugul che po parak ak tyong'ik che po ng'wony. Ma piitu chii ne iyestoi.

²⁷ Pirenen Kamuktaindet ne Toroor ondirik che po Misiri ak kabwondo, kochek ak simbiryek che ma kimuuchi kisoobun.

²⁸ Pirenen Kamuktaindet ne Toroor iywek, korateet ak kaiyweisyet ne po muguleldo.

²⁹ Iwendi isabsabisyoti peet kween ko uu ye sabsabisyoti kipkoraatyat eng' mesundeito, ama kiberuurin eng' ortinweguk. Kinyaliilin kityo ak kerebenen tuguuguk kotugul ama piitu ne saruun.

³⁰ “Ituni osotyot ak koipkei ak chiito age. Iteeche koot, amemenye. Imiine mbareetap sabibuk, amebute logoekwak.

³¹ Kienyei eitang'ung' igeere ameame panyeekyik. Kirebenen sigiryeng'ung' eng' koroomnateet igeere, ama kiweegun. Kigoochin keechiireguk puuniguk ama piitu chii ne saruun.

³² Kigoochin pororyet age weeriiguk ak tiibiiguk, ak keerei konyeguk ak koamjin emo icheek peetuut komugul, ametinye kimnateet eng' eung'ung'.

³³ “Amei pororyet ne mengen logoegap emeng'ung' ak poisyoniguk tugul. Kinyaliilin ak ketyekyinin ng'wony kotugul,

³⁴ agoi koamin iywek amu tugul che igeere eng' konyeguk.

³⁵ Pirei `Kamuktaindet ne Toroor kutung'oiguk ak keelyeguk eng' ondirik che ng'woneen che ma kimuuchi kisoobun, kobooch keldebesyet agoi metit parak.

³⁶ “Imutin Kamuktaindet ne Toroor kobooto laitoryandeng'ung' ne tuun indoi koboun agoi iit pororyet ne mengen inyee anan kwanisyeguk, ak ioot kanamonik che po keetiik ak koik eng' olooto.

³⁷ Ak iegu kwang'utyet, kalewenet ak atindyot, eng' kwenutap piik tugul ole imutyinin Kamuktaindet ne Toroor.

³⁸ Iibe kesweek che chaang' mbar ago igese che ng'ering'; amu tarei chereng'endet.

³⁹ Imiine mbareenigap sabibuk ak isemberi ago mee divaikyik anan ibut logoek, amu amei kuutik.

⁴⁰ Itinye mseituni eng' kiwotosyeguk tugul, ago meilegei mwanikwak, amu iroroi logoekwak che po emitiguk.

⁴¹ Isiche weeriik ak tiibiik ago ma egu cheguuk, amu kiluulei.

⁴² Punjin chereng'endet keetiiguk tugul ak ruroteetap emeng'ung'.

⁴³ “Tororitu toondet ne mi kwenung'ung' kosiirin; ak iming'initu miising'.

⁴⁴ Pesendoun ineendet ago mebesendochini. Egu ineendet metit ak iegu katutyet.

⁴⁵ “Pwonjinin anyun chubisyosyechu tugul, koonaatiin agoi konamin ak kong'emin. Amu ma iepchi iit kutitap Kamuktaindet ne Toroor Kamuktaindeng'ung' iriip ng'atuutikyik ak kaneetisyosyekyik che king'atin

⁴⁶ Tebenen chooto koek kaboorunet ak kwang'utyet, ak kotebee iyoteng'ung' agoi koigeny.

⁴⁷ “Amu meboisyechini Kamuktaindet ne Toroor Kamuktaindeng'ung' eng' poiboiyet, ak eng' kagasetapkei ne po muguleldo amu chaang'indap tuguuk tugul.

⁴⁸ Iote anyun puuniguk che imutun Kamuktaindet ne Toroor kong'eetyin eng' rubeet, eng' melelda, eng' aach ngorit ak eng' rerunetap tuguuk tugul. Indoi chogitap karnet kaating'ung' agoi kobarin.

⁴⁹ “Imutun Kamuktaindet ne Toroor pororyet ne punu ole loo eng' tabandap ng'wony ne megase ng'aleekwak konyo ko uu ye tirireni kipsiichit inyoo koboryenen

⁵⁰ pororyet ne koroom igeere ne meiiti chii ne oos ama riiree lakwa.

⁵¹ Amei iyoteetap tuguuk ak ruroteetap emeng'ung', agoi kowong'un. Ma pagaagun peek anan divaik anan mwanik anan iyoteetap tuguuk anan aaregap keechiireguk, agoi kolusin.

⁵² Yiemin eng' kurgotiguk tugul agoi koluulyo irimoiguk che kooen che ng'ootaatiin che imang'u eng' emeng'ung' komugul. Yiemin eng' kurgotiguk tugul eng' emeng'ung' komugul ne ki kogoonin Kamuktaindet ne Toroor Kamuktaindeng'ung'.

⁵³ Eng' pichiindo ne ibu yiemet ne yiemin puuniguk, iame iyoteng'ung', panyeegap weeriiguk ak tiibiiguk che ki koonin Kamuktaindet ne Toroor Kamuktaindeng'ung'

⁵⁴ Keere kong' ne ya chiito ne ko kiptalbisyo ak ko ng'arng'ar moo ne mi kwenung'wong' ng'eetap kamet ak osotyonnyi ne chamei ak lagokyik che kang'et,

⁵⁵ kot koma chamei kobutyi chii age tugul eng' icheek panyeegap lagokyik che amei, amu ma ng'etyi kiy ineendet; amu yiemet ak pichiindo ne ibun puuniguk eng' kurgotiguk tugul.

⁵⁶ Agot kwony ne mi kwenung'wong' ne cheptalbisyo ak ko ng'arng'ar moo ne ma chamei kotyegaat ng'wony amu talbistanyi ak ng'arng'arindap moo, ko keere kong' ne ya manong'otyondennyi ne chamei, weeriinnyi ak cheptonyi;

⁵⁷ ak eng' sindaryet ne sichei ineendet ak eng' lagokyik che sichei. Amei eng' ung'oot amu pananda amu kamuutetap nganaseet ak amu rubeet amu keret ne kerei kurgotiguk puuniguk.

⁵⁸ “Ngo meriip iyai ng'aleek tugul che po ng'atuutyoni che ki kisirchi kitabuuni, si kobiit igonyit kainani po teegisto, kainet ne kiywei Kamuktaindet ne Toroor Kamuktaindeng'ung';

⁵⁹ koyai anyun Kamuktaindet ne Toroor korotweguk koek che kikwong'ee ak korotwegap iyoteng'ung', korotwek che eecheen, che tebyei keny ak myanwogik che yaacheen, che tebyei keny.

⁶⁰ Iweekyinin myanwogik tugul che po Misiri che ki iywei ak konamin.

⁶¹ Kogeny ko ibun Kamuktaindet ne Toroor myando age tugul ak koroito age tugul ne ma ki sirchi bukuitap ng'atuutyoni, agoi kiwong'un.

⁶² Si ong'etu che ng'ering' eng' che ki aechin chaang'indang'wong' ak kecheigap kipsengwet. Amu ki ma iepchi iit kutitap Kamuktaindet ne Toroor Kamuktaindeng'ung'.

⁶³ Ko uu ye ki paibait Kamuktaindet ne Toroor eng' okweek koyaiywok ne myee ak kotesak, ko uu nooto ko poiboitu Kamuktaindet ne Toroor eng' okweek kolusak, kowong'wok ak kitutok eng' emet ne iwendi iname kobunjiin.

⁶⁴ Ak koiyestak Kamuktaindet ne Toroor obe pororyosyek tugul, kobooch tabanda age ne po ng'wony agoi tabanda age. Iote kanamonik eng' olooto che po keetiik ak che po koik, che mengen inyee anan kwanisyeguk.

⁶⁵ Amenyooru kamuung'et eng' pororyosyechooto, menyooru ole imuung'ee keeldong'ung'. Ago koonin Kamuktaindet ne Toroor eng' olooto muguleldo ne rugrugeni, koonyek che kortos ak muguleldo ne ichuchui.

⁶⁶ “Menae ole teptoi sabeeng'ung' ak iyweisyei kemoi ak peet ak menae ole itei saboondang'ung'.

⁶⁷ Ileen karon, ‘Kata kaigai nda ka koskoleny nguno!’ Ak ile koskoleny, ‘Kata kaigai nda kaeech.’ Amu kaiyweisyetap muguleldang'ung' ne iyweisyei ak amu tuguuk che keerei konyeguk che tuun igeere.

⁶⁸ Ak koweekyin `Kamuktaindet ne Toroor Misiri kogeny eng' melisyek, eng' ooreet ne ki amwaun, ale, ‘Ma igeere kogeny.’ Oaldochinigei puunikwok eng' olooto oegu otwogik che murenik ak che kobogorisyek, ago ma piitu chii ne alok.”