NG'ATUTIK 25 - Bukuit Ne Tilil

Ng'atuutyet agobo tiyet

¹ “Ngopiit tiyet eng' piik ak kobwa kapkirwook korwookyi kirwoogik; ko ngo iityi imanda anyun ne po imanda ak kogikyi ne ya;

² ak ngo keer kirwoogindet kole nyoljin chiichooto ya pireet, komwachi koru ng'wony si kebir eng' tainnyi ko uu koitet ne yamegei ak yaityennyi.

³ Imuuchi kobir pirutik artam amat kotes. Amu ngo siir chooto ak kebir pirutik che chaang', ko egu tupcheng'ung' ne sasaat eng' inyee.”

⁴ “Amerat kutitap eito ye tyechei peek koboorei.”

⁵ Ngo meng'jindos che tupcho ak ngo me age ama sich weeriit, ko mat kotun chii ne po saang' ne kamee manong'otyot: ingondi ne tupcho ak koek manong'otyondennyi ak komutyigei koek osotyonnyi ak koyachi kwonyooto ne kota yachin ng'eetap kamet.

⁶ Ingetoochi weeriit ne po tai ne isip kosichei kwonyooto kainetap ng'eetap kam ne kime si ma purburenok kainennyi eng' Israel.

⁷ Ak ngo ma machei chiichooto kondi osotyotap ng'eetap kamet, ingowo anyun nooto po ng'eetap kam ole mi poisyek eng' ormariich koleenji, “Kaeesyo pamuru kotononji ne tupcho kainennyi eng' Israel, kaeesyo koyaiywo ne nyoljin tupchetap manong'otyonnyu.

⁸ Yeityo koguur poisyegap nganasennyi chiichooto kong'alaalsechi. Ak ngo tonon kole, ‘Ma chame andi.’

⁹ Kwo osotyotap ng'eetap kamet eng' taitap poisyek, ak kocher kweiyotap chiichooto ak kong'utyi togeennyi; ak kowol mosoganooto kole, ingeyachi ko uu nooto chiito ne eesyoi kolal maatap ng'eetap kamet.”

¹⁰ Ak keguure kainennyi eng' Israel, “Kootap ineendet ne ki kityage kweiyot.”

Ng'atuutik alak

¹¹ “Ngo pirgei piik ak kwo osotyotap age kosar manong'otyondennyi eng' ne pirei ak kosapchi konam kitik,

¹² itil anyun eunnyi amat iriiree.”

¹³ Amat inde loleng'ung' ratilisyek che teerchiin, ne oo ak ne ming'in.

¹⁴ Ametepte eng' koong'ung' tuguuk che teerchiin che kigeree peek; ne oo ak ne ming'in.

¹⁵ “Ago tepte ratilit ne nyolu ne po imanda ak itepte kiit ne kigeree peek ne nyolu ne po imanda. Si kochang'a peetuusyeguk eng' emet ne koonin Kamuktaindet ne Toroor Kamuktaindeng'ung'.

¹⁶ Amu wechei Kamuktaindet ne Toroor Kamuktaindeng'ung' tugul che yaei tuguuk che uu chooto tugul che yaei che ma po iman.”

¹⁷ “Ibwaat kiit ne kimwaun Amelek eng' ooreet ye ki obunu Misiri;

¹⁸ ko uu ye kinyoorchin ooreet ak kobar piiguk che ki mi let tugul che kinyalulyotin che kiletu ye ki neegit itanui ak ye kiga ing'et miising'. Ama iywei Amelek Kamuktaindet ne Toroor.

¹⁹ Ye tuun kagogoonin Kamuktaindet ne Toroor Kamuktaindeng'ung' kamuung'et eng' puuniguk tugul che mi komosweguk tugul, eng' emet ne koonin Kamuktaindet ne Toroor Kamuktaindeng'ung' koek poroteng'ung' kobunjiin, ko mat iutye ibukte anyun kabwaatetap Amelek eng' kurereetap kipsengwet.”