NG'ATUTIK 23 - Bukuit Ne Tilil

Ng'atuutik che terotin

¹ “Amat komanda ole mi tuiyetap Kamuktaindet ne Toroor chiito ne ki kitui kitik anan ne ki kitil toriityennyi.

² “Amat komanda ole mi tuiyetap Kamuktaindet ne Toroor chiito ne po sarbuch. Amat komanda tuiyetap Kamuktaindet ne Toroor agoi ibinda ne po taman.

³ “Amat komanda ole mi tuiyetap Kamuktaindet ne Toroor Amonindet anan Moabindet. Agot agoi eng' ibinda ne po taman, ko mat komanda ole mi tuiyetap Kamuktaindet ne Toroor age tugul eng' tilyonutikwak agoi koigeny.

⁴ Amu ki ma torogunenok icheek magatiinik ak peek ye ki omangune Misiri, ago ki al Balaam weeriitap Beor konyo eng' Petor ne mi Mesopotamia nyoo kochupin.

⁵ Nga ki yai ko uu nooto ko ki ma kasyi `Kamuktaindet ne Toroor Kamuktaindeng'ung' Balaam, ago ki iweech `Kamuktaindet ne Toroor Kamuktaindeng'ung' chubisyet koek kaberuret, amu ki chamin `Kamuktaindet ne Toroor Kamuktaindeng'ung'.

⁶ Amat icheeng' kalyennywa anan porotennywa eng' peetuusyeguk tugul koigeny.

⁷ “Amewech Edomindet amu ineendet ko ng'eetap kamet. Amewech Misirindet amu ki ii toondet eng' emennyi.

⁸ Ingomanda ole mi tuiyetap Kamuktaindet ne Toroor lagokwak che sichei eng' ibinda ne po somok.

Tiliilindo eng' nganaseet

⁹ “Ye kebokte nganaseet obargei ak puuniguk, iriibegei anyun yaityet age tugul.

¹⁰ Ngo mi chii age tugul eng' okweek ne murwoon amu rwondo ne ya kemoi, komanda anyun kwo saang'utap nganaseet, amat konyo nganaseet oriit.

¹¹ Ago ingouungei koskoleny ak ye kagororokta asiista konyo nganaseet oriit.

¹² “Nyolu agine itinye ole imasyini eng' saang'utap nganaseet,

¹³ ak ko myee itinye kiit ne uu mogombet kobooto kariguk si ye imache imaste ibaale ole imasyini ak ye kaigeesu itup.

¹⁴ Amu wendote `Kamuktaindet ne Toroor Kamuktaindeng'ung' kwenutap nganaseng'ung' kosaruun ak koon puuniguk eng' taing'ung'. Amu niito, ko ingotiliilit anyun nganaseng'ung' si ma keerchin kiy ne ma tiliil eng' inyee ak koweek kometen.

¹⁵ “Amat iweekyi otwogindet kiptaiyandennyi ne kimweune.

¹⁶ Ingomeny kobooten eng' kwenung'ung' eng' ole leweni eng' age ne po kurgotiguk ole machei, amat ius.

¹⁷ “Amat kobiit chepkugonio eng' tiibiigap Israel anan eng' weeriigap Israel.

¹⁸ Ameibu melektap chepkugoniot anan che ki ale seset kobwa kootap Kamuktaindet ne Toroor Kamuktaindeng'ung' eng' kaarorunet age tugul. Amu wechei `Kamuktaindet ne Toroor Kamuktaindeng'ung' chooto tuwai.

¹⁹ “Amebesendochi tupcheng'ung' ile tuun inyoorunee keljinet, ngo eng' pesendap silingisyek, amitwogik anan eng' pesendap kiy age tugul ne kibesendoi si kenyoorunee keljinet.

²⁰ Imuuchi ibesendochi punootyot si tuun inyoorunee keljinet. Ago mebesendochi ne otupche ile tuun inyoorunee keljinet, si koberuurin Kamuktaindet ne Toroor Kamuktaindeng'ung' eng' tuguuk tugul che iyae eng' eung'ung' eng' emet ne iwendi iname.”

²¹ “Ye iarorchi Kamuktaindet ne Toroor Kamuktaindeng'ung' kaarorunet ko mat igaegei, amu magenen Kamuktaindet ne Toroor Kamuktaindeng'ung' kioto iman; si ma ek tengekto eng' inyee.

²² Ago ngo ma iarorchi kiy koma egu tengek eng' inyee.

²³ Riip iyai ne kemwa eng' kuting'ung' ko uu ye ki arorchi Kamuktaindet ne Toroor Kamuktaindeng'ung' kagoochinetap chamyet ne kaiaroru eng' kuting'ung'.”

²⁴ “Ye iwe mbareetap sabibuk ne po chiitap kokweng'ung' iam anyun logoek agoi ibiye ko uu ye imache. Ago amat inde kitong'eng'ung'.

²⁵ Ye iwe mbareetap chiitap kokweng'ung' ne mi peek imuuchi ibach peek, ago amenamji chepkeswet ile iges peegap chiitap kokweng'ung'.”