NG'ATUTIK 20 - Bukuit Ne Tilil

Ng'atuutik agobo lugoosyek

¹ “Ye iwe obargei ak puuniguk ak iroo kotinyei paraisisyek, kariisyek ak piik che chaang' kosiirok, ko mat iywei. Amu mi Kamuktaindet ne Toroor Kamuktaindeng'ung' ne ki imutun imong'u eng' emetap Misiri kobooten.

² Ye neegit iyai lugeet, koriik anyun tisiindet ak kong'alaalji piik koleenji,

³ ‘Ogaso, ee Israel koriikyi rani lugeet obargei ak pounikwok amogoochi mugulelwekwok kotanuiso, amoiywei anan obotanse, among' komuok pichooto.

⁴ Amu wendi kobootok Kamuktaindet ne Toroor Kamuktaindeng'wong' koyae pooryeet agobo okweek eng' puunikwok ak kosarwok.’

⁵ Ye ibata, kong'alaalji piik `kandoik koleenji, ‘Tos mi chii ne kateech ko ne leel ama igoochi Kamuktaindet? Ngo mi, ko ingoweek kwo koonnyi si ma me eng' pooryeet ak kogoochi chiito age Kamuktaindet koonnyi.

⁶ Tos mi chii ne kimin mbareetap sabibuk ak tomo kobut logoekyik? Ngo mi ko ingoweek kwo koonnyi si ma me eng' pooryeet ak koboisyee chiito age logoekyik.

⁷ Tos mi chii ne ki kigoochi chepto ak tomo kotun? Ngo mi, ko ingoweek kwo koonnyi si ma me eng' pooryeet ak kotun chiito age chebooto.’ ”

⁸ Ingong'alaalji `kandoik piik kogeny koleenji, “Ng'oo ne nyogoor ne machei kotanui? Ingoweek kwo koonnyi, si ma chootyo mugulelwegap tupchosyekyik ko uu nenyi.”

⁹ Ak ye kagogees kandoik ng'aleekwak eng' piik, kokwai anyun `kandoichooto kiptainigap lugoosyek kondochi piik.

¹⁰ Ye ibookyi nganaseet ne obaregei tuwai, iteebe korook piigap olooto ngo chamei koyai kaalyeet kobooten.

¹¹ Ak ngo waluun kole ma chamei koyai kaalyeet eng' kwenung'ung' ak icheeget ak koyatun kurgotikwak, koegu anyun piik tugul che po nganasanooto otwogiguk ak kootin.

¹² Ngo ma cham koyai kaalyeet kobooten ago komach koyai lugeet kobooten, iyiem anyun nganasanooto.

¹³ Ye kagondeun `Kamuktaindet ne Toroor Kamuktaindeng'ung' nganasanooto euneguk, ibar anyun muren age tugul ne mi olooto eng' rotwetap chok.

¹⁴ Ago luul kobunjiin kwony age tugul, lagok, tuuga ak tugul che mi nganaseet kobooto tuguuk tugul che mi olooto. Yeityo iam tuguugap puuniguk che kagoonin Kamuktaindet ne Toroor Kamuktaindeng'ung'.

¹⁵ Iyachini ko uu nooto nganasook tugul che looen miising' eng' inyee che ma nganasoogap pororyosyechu.

¹⁶ Ago eng' nganasook che po pororyosyechu che koonin Kamuktaindet ne Toroor Kamuktaindeng'ung' koek poroteet, ko memete kiy age tugul ne mi yooto kosap,

¹⁷ ago iwong'u kot koma ng'et; Hitik, Amorik, Kanaanik, Perisik, Hibik ak Jebusik ko uu ye ki kong'atin Kamuktaindet ne Toroor Kamuktaindeng'ung'.

¹⁸ Si ma ineetin isup iyai tuguukwak tugul che kiwechei, che ki koyachi kanamonikwak. Ngo yai ko uu nooto ko kochalwogenji Kamuktaindet ne Toroor kamuktaindeng'wong'.

¹⁹ “Ye kaiyiem nganaseet peetuusyek che chaang', imache ibar iluul, ko mat iep keetiikyik ing'em. Amu imuuchi iam che po keetichooto. Ameluul anyun, amu tos chii keetitap timiin ne tos iyiem?

²⁰ Ago keetiik che ingen ile ma ki amei, iluul anyun keetichooto ing'em ak ing'ote irimeet nganasanooto obaregei agoi koluul.”