NG'ATUTIK 18 - Bukuit Ne Tilil

Kebebertap Lawiik ak tisiik

¹ Ki ng'alaalji Musa piigap Israel Koleenji, “Ma nyooru kebeberta anan poroteet kobooto Israel tisiik, ooreet komugul ne po Lawi. Amei kagoochinoigap Kamuktaindet ne Toroor che punei maat kigoochin ak porotennyi.

² Ma nyooru poroteet eng' tupchosyekwak amu porotennywa Kamuktaindet ne Toroor ko uu ye ki mwachi.

³ “Ni melektap tisiik eng' che koonu piik eng' tiseiywegap icheeget che igoitoi eito anan keechiir: kusto ak tagilgilik tuwai ak moet.

⁴ Igoochi ineendet tongoanigap peeguk, divaiguk, mwaniguk ak koroorik che po tai che po keechiireguk.

⁵ Amu kalewen Kamuktaindet ne Toroor Kamuktaindeng'ung' ineendet eng' ortinweguk tugul kobois eng' kainetap Kamuktaindet ne Toroor ineendet ak weeriikyik koigeny.

⁶ “Ngo pun Lawindet kurgotiguk alak tugul eng' Israel, komong' eng' ole menyei eng' chamyennyi tugul ne po saboondanyi ak kwo ole leweni Kamuktaindet ne Toroor,

⁷ ko ingobois anyun eng' kainetap Kamuktaindet ne Toroor Kamuktaindennyi ko uu ye yaei tupchosyekyik tugul; Lawiik che tonondos eng' olooto eng' taitap Kamuktaindet ne Toroor.

⁸ Ingoam kebeberwek che aechin kobooto che nyoorunee aldaetap tuguuk che po kwandanyi.

⁹ “Ye kaiit emet ne koonin Kamuktaindet ne Toroor Kamuktaindeng'ung', ko meneetkei iyai che yaacheen che yaei pororyosyechooto.

¹⁰ Amat kobiit eng' okweek ne igoitoi weeriinnyi anan cheptonyi kobun maat anan ne poisyee ng'oorset anan sageiywek anan ne isagisyei anan poonindet,

¹¹ anan ne abusisyei anan ne ng'alaali ak oik anan poonindet anan ne ng'alaali ak che ki kobek.

¹² Amu wechei Kamuktaindet ne Toroor chii age tugul ne yaei tuguuchooto. Oone Kamuktaindet ne Toroor Kamuktaindeng'ung' icheek eng' taing'ung' amu tuguuchu wechei.

¹³ Egu ne ititaat eng' Kamuktaindet ne Toroor Kamuktaindeng'ung'.

Kayomiset agobo maotyot

¹⁴ “Amu pororyosyechu tuun iluule, koyani che poisyee sogeinateet ak che ng'oorsei. Ago ma chamun inyee Kamuktaindet ne Toroor Kamuktaindeng'ung' iyai chooto.

¹⁵ “Tuun ing'eetun Kamuktaindet ne Toroor Kamuktaindeng'ung' maotyot eng' che otupche ak eng' kwenung'ung' ne uu anee.

¹⁶ Ara anyun ogas iit ineendet. Niito ko kosupkei ak tugul che ki imach eng' Kamuktaindet ne Toroor Kamuktaindeng'ung' eng' peetuutap tuiyet eng' Horeb ile, ‘Amat kota agas kogeny kutitap Kamuktaindet ne Toroor Kamuktaindennyu anan kota ageer mai oo kogeny si ma mei.’

¹⁷ Ak ki leenjo Kamuktaindet ne Toroor, ‘Kamwa komyee chooto kamwa.

¹⁸ Ang'eetyini anyun maotyot eng' tupchosyekwak ne uu inyee ak ande ng'aleekyuk kutinnyin, ak komwachi icheek tugul che ang'ate ineendet.

¹⁹ Ak age tugul ne ma machei kogas ng'aleekyuk che tuun mwaei eng' kainennyu ko tuun ateebee ineendet.

²⁰ Ago maotyot ne mwaei ng'olyoo eng' menoteetapkei eng' kainennyu ne ma ang'at ineendet komwa anan ne ng'alaali eng' kainaigap kamuktaik alak komeei.’ ”

²¹ “Ak ngile eng' muguleldang'ung', ‘Kinae nee ng'olyoot ne ma mwa Kamuktaindet ne Toroor?’

²² Ye kang'alaal maotyot eng' kainetap Kamuktaindet ne Toroor, ngo mayaak kioto anan kosulda, ko nooto ne ma mwa Kamuktaindet ne Toroor. Ago kamwa maotyot eng' menoteet. Ara anyun amat iywei ineendet.”