NG'ATUTIK 17 - Bukuit Ne Tilil

¹ “Ameeng'ji Kamuktaindet ne Toroor Kamuktaindeng'ung' eito anan keechiiryet ne tinyei peruut, anan kiy age tugul ne ya amu wechei nooto Kamuktaindet ne Toroor Kamuktaindeng'ung'.

² “Ngo pitunee kwenung'ung' eng' kurgotiguk alak tugul che koonin Kamuktaindet ne Toroor Kamuktaindeng'ung' chii ne muren anan ne kwony, ne yaei ne ya eng' taitap Kamuktaindet ne Toroor Kamuktaindeng'ung' kobistoe arorutyennyi,

³ ak kwo koot kanamonik kogutung'ji anan asiista anan arawet anan age tugul ne po chaang'indap kipsengwet ne ma ang'at,

⁴ ak kemwaun, isyach anyun eng' kagiiletapkei. Ngo po iman nooto ak ko uu nooto kioto keele kiyaei nooto ne kiwechei eng' Israel,

⁵ imutu anyun murenonooto anan kwonyooto ne kayai kioto ya konyo kurgotiguk si ilach eng' koik kot kome.

⁶ Kibarei chiichooto eng' ng'aleegap paorinik aeng' anan ko somok ama ki parei eng' paornateetap chiito agenge.

⁷ Ingosip kolach paorinichooto yeityo kolach anyun piik tugul. Iste anyun ko uu nooto yaityet eng' kwenung'ung'.

⁸ Ngo piit ng'olyoot ne uui eng' kirwooget ne temeneen, ne po korotiik eng' korotiik anan ng'olyoot eng' ng'olyoot, anan pireet eng' pireet, che kaek kabeletapkei eng' kurgotiguk, ing'eet anyun, iwe ole leweni Kamuktaindet ne Toroor Kamuktaindeng'ung';

⁹ ak inyoo ole mi tisiik Lawiik, ak kirwoogindet ne mi eng' peetuusyechooto yeityo iteep si koboorun icheeget ole teptoi kirwooget.

¹⁰ Iyae anyun kiy age tugul ne kamwaun ak che iboorun eng' komosta ne leweni Kamuktaindet ne Toroor, ak igeer iman ile keyai ko uu tugul che ineetin,

¹¹ Ye kagoweny ko uu ng'olyootap ng'atuutyet ne ineetin pichooto ak ko uu kirwooget ne mwaun, iyai anyun ko uu nooto. Amemaste eng' kirwooget ne iboorun iwe eutap tai anan kaataam.

¹² Chii age tugul ne yae kiy eng' menoteet ak koeesyo kogas ng'aleegap tisiindet ne tononi koboisyei eng' taitap Kamuktaindet ne Toroor Kamuktaindeng'ung' anan kirwoogindet, komeei si iiste yaityet eng' Israel.

¹³ Ak kogas piik tugul, ak koywei, si mata koyai chii kiy eng' menoteet kogeny.”

Ng'atuutik agobo laitorinigap Israel

¹⁴ “Ye kaiit emet ne koonin Kamuktaindet ne Toroor Kamuktaindeng'ung' ak inam kobunjiin ak imeny ak ile, ‘Kande laitoryat koboiywa, ko uu pororyosyek tugul che mi komoswekyuk,’

¹⁵ inde anyun ineendet ne leweni Kamuktaindet ne Toroor Kamuktaindeng'ung'. Inde age eng' tupchosyeguk koek laitoryat ne poun. Amat inde punootyot ko poun ne ma ne otupche.

¹⁶ Ago amat kotesyigei paraisisyek anan kogoochi piik koweektagei Misiri si kotesigei paraisisyek. Amu kimwaiwok Kamuktaindet ne Toroor kole, ‘Amata oweektage oranooto kogeny.’

¹⁷ Amat kotes osotik si ma kuskong' muguleldanyi, anan kotesyigei fedha ak thahabu che chaang'.

¹⁸ Ye kagotebee ng'echereetap laitornatennyi, kosirchi tisiik ng'atuutyoni konde bukuit koosup.

¹⁹ Ngo tepto ak kosoman ko tee kosabei, si koneetkei koywei Kamuktaindet ne Toroor Kamuktaindennyi, koriip ak koyai ng'aleek tugul che po ng'atuutyoni ak kaneetisyosyechu.

²⁰ Amat koeetkei eng' muguleldanyi kosiir tupchosyekyik anan ak komasta kometo ng'atuutyet, kwo eutap tai anan ne po kaataam, si kobiit kochang'a peetuusyekyik eng' laitornatennyi eng' ineendet ak eng' lagokyik eng' kwenutap Israel.”