NG'ATUTIK 13 - Bukuit Ne Tilil

¹ “Ngo piit maotyondo anan karwotitoindo ak koboorun tartet anan kaboorunet,

² koyaak tartanooto anan kaboorunonooto ne kimwaun kole, ‘Ongisup kanamonik che ki ma ongen, ak oot chooto,’

³ ko meepchi iit ng'aleegap maotyondonooto anan karwotitoindonooto. Amu tyemok Kamuktaindet ne Toroor Kamuktaindeng'wong' si konai ngo chame Kamuktaindet ne Toroor Kamuktaindeng'wong' eng' mugulelwekwok ak eng' saboonwekwok.

⁴ Obendate osup Kamuktaindet ne Toroor Kamuktaindeng'wong', oiywei ineendet ak oriip ng'atuutikyik ogas iit kutinnyi ak oboisyechi ak onamge ak ineendet.

⁵ Kibarei maotyondonooto anan karwotitoindonooto amu kamwa kiit ne ibeeti piik kobagaakta Kamuktaindet ne Toroor Kamuktaindeng'wong', ne ki imutwok omang'une emetap Misiri, ne ki ityaachak eng' kootap otwoknateet. Kibarei ineendet amu katyem kole komaasin eng' ooreet ne king'atin Kamuktaindet ne Toroor Kamuktaindeng'wong' iwendote. Iste anyun ko uu nooto yaityet eng' kwenung'ung'.

⁶ “Ngo kaigain eng' ung'oot ng'eetap kamenng'ung' anan weeriing'ung' anan cheptong'ung' anan osotyondeng'ung' ne ichame anan chorweng'ung' ne ichame ko uu ye ichame saboondang'ung' koleenjin, ‘Ngebe keoot kanamonik alak’ che ki ma ingen inyee anan kwanisyeguk,

⁷ kanamonigap pororyosyek che mi tabanwekwok, che neegiteenen anan che looenen kobooch tabanda age ne po ng'wony agoi tabanda age,

⁸ Ko ameyanji anan igasyi. Ama, ye igeer, iriiree anan ibagaakte anan iuny.

⁹ Ago par anyun ineendet iman. Ngo sip kobar ineendet eung'ung' ak ye ibata kobar piik tugul.

¹⁰ Lach eng' koik kot kome amu ki cheeng'ei komaasin imete Kamuktaindet ne Toroor Kamuktaindeng'ung' ne ki imutun imang'une emetap Misiri eng' kootap otwoknateet.

¹¹ Ye iyai ko uu niito, kogas Yahudik tugul ak koiyweis si mata koyai sogornateet ne uu niito kogeny eng' kwenung'ung'.

¹² “Ngigas keng'alaale age eng' nganasoguk ne koonin Kamuktaindet ne Toroor Kamuktaindeng'ung' imeny keleen,

¹³ Kamang'une kwenung'ung' piik alak che yaach, ak koba komaas piik che menyei nganasennywa koleenji, ‘Ongebe keoot kamuktaik che mongen,’

¹⁴ igililjigei anyun ak iteep anyun ak icheeng' igin, igiiljigei. Ngo imanit ko uu nooto ng'olyoondonooto, keele kogeyai kiit ne kiwechei eng' kwenung'ung',

¹⁵ ibar iwong'u anyun piigap nganasanooto, tuuga ak tuguuk tugul che miitei olooto eng' rotwetap chok.

¹⁶ Iyumji tuguukyik tugul kwenutap ooreetap nganasanooto ak ibeel nganaseet ak tuguukyik tugul kogeskei, ibeelji Kamuktaindet ne Toroor Kamuktaindeng'ung' ak koek tulwo koigeny ago ma keteechei kogeny.

¹⁷ Amenam eng' eung'ung' kiy age tugul ne kigeisto, si koweek Kamuktaindet ne Toroor kobagaach nereegekyik che koroomen ak korirenen, kochamin ak kobarain, ko uu ye ki koyasyechi kwanisyeguk.

¹⁸ Ye iepchi iit kutitap Kamuktaindet ne Toroor Kamuktaindeng'ung' ak iriip ng'atuutikyik tugul che kang'atiin rani, iyai nooto po iman eng' taitap Kamuktaindet ne Toroor Kamuktaindeng'ung'.