NG'ATUTIK 12 - Bukuit Ne Tilil

Ng'atuutyet agobo ole-tiliil

¹ “Chu kirwoogutik ak atebosyek che tuun oriibe oyae eng' emet ne ki koonok Kamuktaindet ne Toroor, Kamuktaindetap kwanisyeguk, kobunjiin kotee osaptosi eng' ng'wony.

² Ong'em anyun ak owong'u oldinwek tugul ole kioote kanamonikwak pororyosyek che oluule. Ong'em oldinwek chooto tugul che mi tuloonook che kooen, che mi legemosyek ak che mi keetiik che tuonen keel.

³ Obut kapkorosusyekwak ak otonaton tolochikwak ak obeel lumeiwegap Aserik. Oluul kanamonikwak che ki kiwai, ong'em ak obet kainennywa eng' olooto.

⁴ “Amoyachi Kamuktaindet ne Toroor Kamuktaindeng'wong' ko uu ye yachin icheek kamuktaikwak.

⁵ Ocheeng' anyun ole menyei Kamuktaindet ne Toroor Kamuktaindeng'wong' eng' ole leweni ineendet eng' ortinwekwok tugul kole konde kainennyi. Yooto ye nyolu obe,

⁶ oibe kagoochinoikwok che kibeelei, tiseiywekwok, kebeberwekwok, kagoochinetap eunekwok ne kinamjin parak, kaarortaosyekwok, kagoochinoigap chamyet ak che twatei tuukwok ak keechiirekwok.

⁷ Oamisye eng' olooto eng' taitap Kamuktaindet ne Toroor Kamuktaindeng'wong', okweek ak piikwok kibagenge, oboiboitune tugul che kiberuurwok Kamuktaindet ne Toroor Kamuktaindeng'wong'.

⁸ “Amat oyai tuguuk ko uu ye kiyae rani ko uu ye keerei chii age tugul kochamei,

⁹ amu tomo oit kamuung'et ak poroteet ne koonok Kamuktaindet ne Toroor Kamuktaindeng'wong'.

¹⁰ Ago ye kaolande eng' Jordan obe omeny emet ne koonok Kamuktaindet ne Toroor Kamuktaindeng'wong' onyaban ak kogoonok kamuung'et eng' puunikwok tugul che mi komoswek tugul, si omeng'iisyei eng' kaalyeet.

¹¹ Egu anyun ole leweni Kamuktaindet ne Toroor Kamuktaindeng'wong' konde kainennyi kotebee, ole oibe koba tugul che ang'atook; kagoochinoikwok che kibeelei, tiseiywekwok, kebeberwekwok, kagoochinetap eunekwok ne kinamjin parak ak kaarortaosyekwok tugul che oarorchini Kamuktaindet ne Toroor.

¹² Oboiboitu eng' olooto eng' taitap Kamuktaindet ne Toroor Kamuktaindeng'wong', okweek kobooto weeriikwok, tiibiikwok, otwogikwok che murenik kobooto otwogikwok che tiibiik ak Lawindet ne mi kurgotikwok, amu ma tinyei ineendet kebeberta anan poroteet kobootok.

¹³ Riipkei si megoite kagoochinoiguk che kibeelei eng' oldo tugul ole igeere,

¹⁴ ago eng' ole leweni Kamuktaindet ne Toroor eng' age ne po ortinweguk, igoite eng' kagoochinoiguk che kibeelei ak iyai eng' olooto tugul che ang'atiin.

¹⁵ “Ago imuuchi ieny ak iam panyeek eng' ole imenye ko uu ye machei muguleldang'ung', ko uu kaberuretap Kamuktaindet ne Toroor Kamuktaindeng'ung' ne ki kogoonin. Imuuchi koam ne ng'waan ak ne ma ng'waan ko ye ki ame kenyeleet anan teweretyot.

¹⁶ Ago amat oam korotiik, ago otumji ng'wony ko uu peek.

¹⁷ Amat oam eng' kurgotikwok kebebertap peeguk, anan ne po divaiguk anan ne po mwaniguk anan che twatei tuguuk anan che po keechiireguk anan kaarortaosyeguk alak tugul che iarortoi anan kagoochinoiguk che po chamyet anan kagoochinetap eunekwok ne kinamjin parak.

¹⁸ Ago iame tuguuchooto eng' taitap Kamuktaindet ne Toroor Kamuktaindeng'ung' inyee, weeriing'ung', cheptong'ung' ak otwogeng'ung' ne muren ak ne tye ak Lawindet ne mi kurgotiguk. Ak ibaibaitu eng' taitap Kamuktaindet ne Toroor Kamuktaindeng'ung' eng' kiy age tugul ne iyae euneguk.

¹⁹ Riipkei amebagaakte Lawindet ko tee isabe eng' emeng'ung'.

²⁰ “Ye katesun Kamuktaindet ne Toroor Kamuktaindeng'ung' kiwoteet ko uu ye ki iarorun, ak ile, ‘Amache aam panyeek, amu machei saboondanyu panyeek,’ imuuchi iam panyeek che tee che machei saboondang'ung'.

²¹ Ngot ko loo eng' inyee ole leweni Kamuktaindet ne Toroor Kamuktaindeng'ung' konde kainennyi, ieny anyun che po akweeng'ung' ak che po keechiireguk che ki kogoonin Kamuktaindet ne Toroor ko uu ye ki ang'atiin ak iam eng' kurgotiguk, ko uu ye machei saboondang'ung'.

²² Ko uu ye ki amei kenyeleet ak teweretyot iam anyun ko uu nooto. Amei che ng'woneen ak che ma ng'woneen.

²³ Kobatee amat iam korotiik. Amu saboondo korotiik ara anyun meam saboondo kobooto panyeek.

²⁴ Amat iam, ago tumji ng'wony ko uu peek.

²⁵ Amat iam si komyeeit eng' inyee ak eng' lagoguk che piitu let ye iyae nooto myee eng' taitap Kamuktaindet ne Toroor.

²⁶ Koek kityo iibe tuguuguk che tiliileen che itinye, ak kaarortaosyeguk ak iwe ole leweni Kamuktaindet ne Toroor,

²⁷ ak igoite kagoochinoiguk che kibeelei, panyeek kobooto korotiik eng' kaptisisyetap Kamuktaindet ne Toroor Kamuktaindeng'ung'. Iroong'jin korotiigap tiseiyweguk kaptisisyetap Kamuktaindet ne Toroor Kamuktaindeng'ung' yeityo iam panyeek.

²⁸ Riip ak iepchi iit ng'aleechu tugul che kang'atiin si komyeeit eng' inyee ak eng' lagoguk che piitu let agoi koigeny, ye iyae ne myee ak ne po iman eng' taitap Kamuktaindet ne Toroor Kamuktaindeng'ung'.

Meoot kanamonik

²⁹ “Ye tuun ing'eto eng' taing'ung' Kamuktaindet ne Toroor Kamuktaindeng'ung' pororyosyek che iwendi inam si kobunjiin chooto, ye inam ak imeny emennywa,

³⁰ iriipkei anyun si ma riichin ak isup icheek, kogageng'em pichooto eng' taing'ung': ye iteep agobo kanamonikwak ile, ‘Ootitoi ano pororyosyechu kanamonikwak? Amache ayai agane ko uu nooto.’

³¹ Ameyachi ko uu nooto Kamuktaindet ne Toroor Kamuktaindeng'ung'. Amu kiy age tugul ne wegot eng' Kamuktaindet ne Toroor ne wechei ineendet, ko ki yachi ko uu nooto icheek kanamonikwak, amu peelei agot weeriikwak ak tiibiikwak kobeeljin kanamonikwak.

³² “Oriip kiy age tugul ne ang'atook oyai. Amat otes anan ichuchuch.