NG'ANG'UTYET 9 - Bukuit Ne Tilil

¹ Ki kuut malaikaiyatap muut, ak ki ageer kecheiyat kobunu kipsengwet kobutyi ng'wony. Ak ki kigoochi ineendet yaateiwot ne po keriinget ne ma igoksei.

² Kingo yaat keriingonooto; kotogosta iyeto komang'une yooto, ne uu iyeto ne po maat ne oo miising'. Ak ki imenit asiista ak soet amu iyetap keriingonooto.

³ Ak ki mang'une chereng'enyinik iyeto kobwa ng'wony; ak ki kigoochi icheek kimnateet, ko uu ye tinyei kimnateet melmelwegap ng'wony.

⁴ Ki kimwachi icheek keleenji amat kong'em susweegap ng'wony, anan kiy age tugul ne tuon, anan ko keetit age tugul, ago pichooto icheegei che ma tinyei ng'ooksetap Kamuktaindet eng' togoochikwak.

⁵ Ki king'at icheek ko mat kobar pichooto, ago si kobiit konyaliil icheek arawek muut. Ki uu kanyalilennywa kanyaliiletap melmeldo, ye kauut chiito.

⁶ Ak tuun cheeng'ei piik meet eng' peetuusyechooto ago ma nyooru; ak machei kole kobek, ago mweei meet eng' icheek.

⁷ Ki uu itoonwegap chereng'enyinichooto paraisisyek che chobootiin koba lugeet. Ak ki uu yo mi metowekwak kutonook che kergei ak thahabu, ak ki uu togoochikwak togoochigap piik.

⁸ Ki tinyei suumeek che uu suumeegap kwonyiik ak ki uu kelekwak kelegap ng'etuunyik.

⁹ Ak ki tinyei tuguuk che ki ilaakyi tegeet ko uu che po kariik; ak ki uu cheetap kebebaikwak cheetap chepkichutisyek, che po paraisisyek che chaang' che rwaei kobendi lugeet.

¹⁰ Ak kotinyei katutaik ak katook che uu che po melmelwek, ak mi kimnateennywa katutaikwak ne inyaliile piik eng' arawek muut.

¹¹ Ki tinyei icheek laitoryat ne pou, nooto ko malaikaiyatap keriinget ne ma igoksei; ne kainennyi eng' kutitap Yahudik ko, ak eng' Yunanik ko Apollyon.

¹² Kagosiirto nyalilda ne po tai; ak pwanei nyalilwogik alage aeng'u.

¹³ Ki kuut malaikaiyatap lo, ak ki agas kutit ne mang'une kuinoigap kapkorosutap thahabu ne mi taitap Kamuktaindet,

¹⁴ komwachin age malaikaiyandanooto po lo, ne ki tinyei iryageet, koleenji, “Ityach malaikaisyek ang'wan che ratotiin eng' aineet ne po Yufrets.”

¹⁵ Ki kityaach anyun malaikaisyechooto ang'wan, che kiga kechop agobo sait ak peetuut ak arawet ak kenyiit, si kobar kebeberta agenge eng' somok ne po piik.

¹⁶ Ak ki ek koitetap lugoosyek che po piik che ketei paraisisyek million pogol aeng'; ki agas koiitennywa.

¹⁷ Ki ageer eng' ng'ang'utyet paraisisyek ak icheeget che ketei, kotinyei tuguuk che kilaakyin tegetik che uu maat ak che uu huakinto ak che uu koik che laldos. Ak ki uu metowegap paraisisyek metowegap ng'etuunyik, ak komang'une kutusweekwak maat ak iyeto ak koik che laldos.

¹⁸ Ak ki kibare `korotwechooto somok kebeberta agenge eng' somok ne po piik, eng' maat, iyeto ak eng' koik che laldos che ki mang'une kutusweekwak.

¹⁹ Amu mi kimnateetap paraisisyek kutusweekwak ak katutaikwak, amu kergei katutaikwak ak erenook, ak kotinyei metowek; ak konyalilsye tuguuchooto.

²⁰ Ak ma sik piik che kiga ng'et, che ki ma ki par eng' korotwechooto eng' poisyonigap eunekwak; ak ma meto kosa oik, ak kanamonigap thahabu, ak che po fedha, ak che po sugunonik, ak che po koik, ak che po keetiik; kanamonik che ma imuuchi kogeerto, anan kogasta anan kobendat.

²¹ Ak ma sik eng' rumisyosyekwak, anan eng' panisyosyekwak, anan eng' soksennywa, anan eng' choorsosyekwak.