NG'ANG'UTYET 8 - Bukuit Ne Tilil

Ng'oksetap tisap ak kapkorosutap thahabu

¹ Ye kingo yaat ng'ookset ne po tisap, kosiis kipsengwet olo po kebebertap sait.

² Ak ki ageer malaikaisyek tisap che kitonondos eng' taitap Kamuktaindet; ak ki kigoochi iryagook tisap.

³ Ki nyo malaikaiyat age kotinyei tereet ne po thahabu ne kibeelee nyamdutik, konyo kotonone ole po kapkorosuut. Ki kigoochi nyamdutik che chaang' che kibeelei si kogoito kobooto saautigap che tiliileen tugul eng' kapkorosutap thahabu, ne ki mi taitap ng'echereetap laitornatet.

⁴ Ki togosta iyetap nyamdutik che kibeelei kobooto saautigap piik che tiliileen, eng' taitap Kamuktaindet eng' eutap malaikaiyat.

⁵ Ak ki ip malaikaiyat teronooto ak konde maatap kapkoros konyi, ak kowiirchi ng'wony; ak ki piit tuloosyek, ak kutusweek ak kalyelosyek, ak potaneetap ng'wony.

Iryagook tisap

⁶ Ak kochopkei malaikaisyek tisabu che ki tinyei iryagook tisap si koguut.

⁷ Ki kuut malaikaiyat ne po tai, ak ki piit koigap ropta ak maat che purugotin ak korotiik, ak ki kiwiirchi ng'wony; ak ki lal kebeberta agenge eng' somok ne po ng'wony, ak ki lal kebeberta agenge eng' somok ne po keetiik, ak kilalyo susweek tugul che tuonen.

⁸ Ki kuut malaikaiyatap aeng', ak ki kiwiirchi nyanjet kiit ne uu tulweet ne oo kolalei; ak ki ek korotiik kebeberta agenge eng' somok ne po nyanjet.

⁹ Kime kebeberta agenge eng' somok ne po tyong'ik che kisaptos che ki mi nyanjet, ak ki king'em kebeberta agenge eng' somok ne po melisyek.

¹⁰ Ki kuut malaikaiyatap somok, ak kirorok kecheiyat ne oo eng' kipsengwet, kolalei ko uu tait, ak ki ibutyi kebeberta agenge eng' somok ne po ainoosyek, ak kondametusyegap peek.

¹¹ Ki kiguure kainetap kecheiyandanooto Ng'wanindo. Ak king'wanit kebeberta agenge eng' somok ne po peek, ak ki pek piik che chaang' eng' peechooto, amu kiga kiyai kong'woneegitu.

¹² Ki kuut malaikaiyatap ang'wan, ak ki kikwer kebeberta agenge eng' somok ne po asiista, ak kebeberta agenge eng' somok ne po arawet, ak kebeberta agenge eng' somok ne po kecheik, si koimenit kebeberta agenge eng' somok ne po tuguuchooto. Ak kebeberta agenge eng' somok ne po peetuut koma iluu, ak koigei nooto agine kemout.

¹³ Ak ki ageer kipsiichit kotirireni eng' kwenutap kipsengwet, ak agas koleen eng' kutit ne oo, “Pwo! Pwo! Pwo agobo icheek che menyei ng'wony, amu cheosyek alak che po iryagook che po malaikaisyek somok che ta koguutei!”