NG'ANG'UTYET 7 - Bukuit Ne Tilil

Piik eliphuusyek pogol ak artam ak ang'wan che ki king'ooch

¹ Kingo pata niito ageer malaikaisyek ang'wan kotonondos eng' luukwek ang'wan che po ng'wony, konamei usoonaik ang'wan che po ng'wony, si mata kousyi usoonet ng'wony, anan nyanjet, anan keetit age tugul.

² Ak ki ageer malaikaiyat age kotogosta kobunei kong'asiis, kotinyei ng'ooksetap Kamuktaindet ne sabei. Ki mwachi ineendet eng' kutit ne oo malaikaisyek ang'wan che ki kigoochi kong'em ng'wony ak nyanjet

³ koleenji, “Among'em ng'wony, anan nyanjet, anan keetiik, kot kinde ng'ookset togoochigap otwogigap Kamuktaindet nenyo.”

⁴ Ak ki agas koitetap icheeget che ki king'ooch, ko ki ek eliphuusyek pogol ak artam ak ang'wan, che ki king'ooch eng' ooreet age tugul ne po piigap Israel.

⁵ Ki king'ooch eliphuusyek taman ak aeng' che po ooreetap Judah, che po ooreetap Reuben ko eliphuusyek taman ak aeng', che po ooreetap Gad ko eliphuusyek taman ak aeng',

⁶ che po ooreetap Asher ko eliphuusyek taman ak aeng', che po ooreetap Naphtali ko eliphuusyek taman ak aeng', che po ooreetap Manasseh ko eliphuusyek taman ak aeng',

⁷ che po ooreetap Simion ko eliphuusyek taman ak aeng', che po ooreetap Lawi ko eliphuusyek taman ak aeng', che po ooreetap Issakar eliphuusyek taman ak aeng',

⁸ che po ooreetap Zebulun ko eliphuusyek taman ak aeng', che po ooreetap Joseph ko eliphuusyek taman ak aeng', ak che po ooreetap Benjamin ko eliphuusyek taman ak aeng'.

Chaang'indap Piik che punu pororyet age tugul

⁹ Kingo pata tuguuchu, ageer tuiyet ne oo ne ki ma komuuchi chii koiit, che punu pororyet age tugul, ooreet age tugul, piik ak kutusweek, kotonondos eng' taitap ng'echereetap laitornatet ak eng' taitap Aarwet. Ki ilaachi ngoroik che leelach ak kotinyei mooriigap sosik eng' eunekwak.

¹⁰ Kimwaei eng' kutit ne oo koleen, “Po Yetunet Kamuktaindet nenyo ne tebee ng'echereetap laitornatet, ak ko po Aarwet.”

¹¹ Ak kitonondos malaikaisyek tugul ko kayiem ng'echereetap laitornatet ak ko kayiem poisyek ak tyong'ik ang'wan che saptos. Ki ibutyi ng'wony eng' taitap ng'echereetap laitornatet ak kolas Kamuktaindet,

¹² koleen, “Amen! Po Kamuktaindet nenyo kaberuret ak toroornatet, utaatyet ak kongoi ak teegisto, ak kamuktaet ak kimnateet, koigeny ak koigeny. Amen!”

¹³ Ak kimwaiwo age eng' poisyek, koleenjo, “Chu ilaachi ngoroik che leelachen ko ng'oo, ak kobunu ano?”

¹⁴ Ki aleenji ineendet, “Kiptaiyandennyu, ingen inyee.” Koleenjo anyun, “Chu ko icheek che punu nyalilda ne oo; ak ki komwet ngoroikwak koleelagitu eng' korotiigap Aarwet.

¹⁵ Mi anyun icheek taitap ng'echereetap laitornatet ne po Kamuktaindet, ak koboisyechin ineendet peet ak kemoi eng' hekalunnyi, ak koiito ineendet ne tebee ng'echereetap laitornatet emainnyi eng' paragunnywa.

¹⁶ Ma kogasei rubeet kogeny, ama koamei melelda kogeny. Ma kobirei icheek asiista, ama kobeelei icheek maat age tugul;

¹⁷ amu egu Mestowonnywa Aarwet ne mi kwenutap ng'echereetap laitornatet, ak kondochin icheek koba kong'igap peek che saptos. Ak kouus Kamuktaindet peegap kong' alak tugul eng' konyekwak.”