NG'ANG'UTYET 5 - Bukuit Ne Tilil

Bukuit ne mamanat ak Aarwet

¹ Ki ageer eng' eutap tai ne po ineendet ne kitebee ng'echeranooto po laitornatet, bukuit ne ki kisir oriit ak patai, ne ki king'ooch kogerak eng' ng'ooksosyek tisap.

² Ak ki ageer malaikaiyat ne kiim komwaitoi eng' kutit ne oo, kole, “Ng'oo ne nyolu koyaat bukuit ak kotyach ng'ooksosyekyik?”

³ Ak ki ma komi chii kipsengwet, anan ng'wony, anan kurereet ne po ng'wony ne ki imuuchi koyaat bukuinooto, anan kogeer oriit.

⁴ Ak ki ariir miising', amu ki ma piit chii ne nyolu koyaat bukuinooto, anan kogeer oriit.

⁵ Ki leenjo age eng' poisyechugai, “Merire! Keero, ki koterter Ng'etundo ne po ooreetap Judah, Tigityot ne po Daudi, si kobiit koyaat bukuinooto ak ng'ooksosyechooto tisap.”

⁶ Ak ki ageer eng' kwenutap ng'echeranooto po laitornatet ak tyong'ichooto ang'wan saptos, ak eng' kwenutap poisyechooto, kotonone Aarwet ko uu ne kageeny, kotinyei kuinoik tisap, ak koonyek tisap, che saboonwek tisap che po Kamuktaindet, che ki kiyookto koba ng'wony komugul.

⁷ Ki nyo ak koip bukuit eng' eutap tai ne po ineendet ne tebee ng'echeranooto po laitornatet.

⁸ Ak ye kingo kagoip bukuinooto, kobutyi taitap Aarwet `tyong'ichooto ang'wanu saptos ak poisyechooto tiptem ak ang'wan, kotinyei age tugul ketubet, ak taabook che po thahabu che nyiitootiin nyamdutik che kebeelei, che chooto ko saautigap piik che tiliileen.

⁹ Ak kotyeni tyendo ne leel, koleen: “Nyoljinin inam bukuit, ak iyat ng'ooksosyekyik, amu ki kibarin, ak eng' korotiguk ko ki ialji Kamuktaindet piik kobun pororyet age tugul, kutit age tugul, piik alak tugul ak emet age tugul.

¹⁰ Ki iyai icheek koek pororyet ak tisiik eng' Kamuktaindet nenyo, ak tuun laitorani icheek eng' ng'wony.”

¹¹ Ki ageer, ak agas kutitap malaikaisyek che chaang' che kaiitennywa ko ki eliphuusyek taman konyil eliphuusyek taman, ak eliphuusyek konyil eliphuusyek. Ki kayiem `icheek ng'echeranooto po laitornatet ak tyong'ichu kasaptos ak poisyechugai;

¹² komwaei eng' kutit ne oo kole: “Nyoljin Aarwet ne ki kibar konyoor kimnateet, ak mogornatosyek ak utaatyet, ak kamuktaet, ak teegisto, ak toroornatet ak kaberuret.”

¹³ Ak ki agas kiit age tugul ne ki kiyai ne mi kipsengwet, ak ne mi ng'wony, ak ne mi kurereetap ng'wony, ak eng' nyanjet, ak tuguuk tugul che mi oriitinnywa koleen: “Ingobunji ineendet ne tebee ng'echereetap laitornatet ak Arwanooto, kalasunet, ak teegisto, ak toroornatet, ak pounateet, koigeny ak koigeny.”

¹⁴ Ak ki mwa tyong'ichooto ang'wanu saptos kole, “Amen!” Ak kobutyi ng'wony poisyechooto ak kolas.