NG'ANG'UTYET 3 - Bukuit Ne Tilil

Ng'aleek agobo Kaniset ne mi Sardis

¹ “Ak isirchi malaikaiyatap kaniset ne mi Sardis, ileenji: Mwaei tuguuchu ineendet ne tinyei saboonwek tisap che po Kamuktaindet ak kecheik tisap: Angen poisyoniguk, angen ale itinye kainet keele isabe, ago kaimei.

² Ng'eet! Igimiit tuguuk che ng'etunotiin, che machei kobek, amu tomo anyooru poisyoniguk che ki kosulda eng' taitap Kamuktaindet nenyu.

³ Ibwaat anyun nooto kiitaach ak ki igas; iriip, ak isigu. Ngot ko meriipse anyun, anyoone ko uu choriindet, amenae sait ne anyoonjinenen.

⁴ Ago itinye kainaik che ng'ering' eng' Sardis che ma imurwon ngoroikwak. Tuun pendoti icheek kobooto kolaagoti ngoroik che leelach; amu nyolu icheek.

⁵ “Ineendet ne iterteeri kotun kilaakyin ko uu nooto ngoroik che leelach; ak ma koi abuch kainennyi eng' bukuitap saboondo, ago ang'aanye kainennyi eng' taitap Abba ak eng' taitap malaikaisyekyik.

⁶ “Ineendet ne tinyei itit, kogas kiit ne mwachin Kabuuset ne Tiliil kanisosyek.

Ng'aleek agobo kaniset ne mi Philadephia

⁷ “Ak isirchi malaikaiyatap kaniset ne mi eng' Philadephia, ileenji: Mwaei tuguuchu ineendet ne tiliil, ineendet ne po iman, ineendet ne tinyei yaateiwotap Daudi, ineendet ne yaatei, ama kerei chii, ak ne kerei, ama yaatei chii.

⁸ Angen poisyoniguk. Keero, kaande taing'ung' kurgeet ne yaataat, ne ma imuuchi chii koger. Angen ale itinye kimnateet ne ming'in, ak ki iriip ng'olyoondennyu, ama ieesye kainennyu.

⁹ Agoochini che po sinagogitap Setani, icheeget che mwaei kole ki Yahudik, ago ma icheek, kenu, keero, agoochini icheek kobwa kogutuny eng' keelyeguk, ak konai kole ki achamin.

¹⁰ Amu ki iriip ng'olyootap muitaennyu, ariibin agane eng' saitap yoomseet ne nyoonjin ng'wony komugul, si kotyem icheek che menyei ng'wony.

¹¹ Anyoone achogu; nam miising' nooto itinye, si ma rebenen chii kuutweeng'ung'.

¹² “Ineendet ne iterteeri, ayae koek toloita eng' Hekaluut ne po Kamuktaindet nenyu, ama komandoi saang' kogeny. Asirchini ineendet kainetap Kamuktaindet nenyu, ak kainetap nganaseetap Kamuktaindet nenyu, nooto Jerusalem ne leel, ne choorugei eng' kipsengwet kobunu Kamuktaindet nenyu, ak kainennyu ne leel.

¹³ “Ineendet ne tinyei itit, kogas kiit ne mwachin Kabuuset ne Tiliil kanisosyek.

Ng'aleek agobo kaniset ne mi Laodikia

¹⁴ “Ak isirchi malaikaiyatap kaniset ne mi Laodikia, ileenji: “Mwaei tuguuchu ineendet ne Amen, paoryat ne kiyani ak ko po iman, taunetap yaetap Kamuktaindet:

¹⁵ “Angen poisyoniguk, ale ma ii kaitit ametinye maat; kata achame nda ka ii kaitit anan itinye maat.

¹⁶ Nooto anyun amu ii lalang', ametinye maat anan kaititindo, ang'ung'doin eng' kutinnyu.

¹⁷ Imwae ileen, ‘Aa mogoryo, ak ki asich mogornateet, ama abanani kiy.’ Mengen ile ii chiito ne ii kimnyalilyat ak itinye riirek ak ko ii kibananiat ak ko ii kipkoraatyat ak imi aach ngor.

¹⁸ Atigoonin anyun ale ialena thahabu ne ki kitiliile maat, si iegu mogoryot; ak ngoroik che leelach, si ilaaige, si ma took kalilanetap aach ngoring'ung'; ak kerichegap koonyek che iilee konyeguk si igeerte.

¹⁹ Agere kong' tugul che achame ak atigooni. Igiilgei anyun, ak isigu.

²⁰ Keero, atononi eng' kurgeet ak agongonyi; ngo kas chii kutinnyu ak koyaat kurgeet, awendi ole mi ineendet ak aamisye kobooto ineendet, ak koamis ineendet kobooto.

²¹ “Ineendet ne iterteeri, kotun agoochini kotebi kobooto eng' ng'echerennyu ne po laitornatet, ko uu ye ki aterteer agane ak ketebi ak Abba eng' ng'echerennyi ne po laitornatet.

²² “Ineendet ne tinyei itit, kogas kiit ne mwachin Kabuuset ne Tiliil kanisosyek.”