NG'ANG'UTYET 20 - Bukuit Ne Tilil

Kenyiisyek eliphuut agenge

¹ Ak ki ageer malaikaiyat kochoorugei eng' kipsengwet, kotinyei yaateiwotap keriinget ne ma igoksei ak sirimdo ne oo eng' eunnyi.

² Ak konam maswetit, ereneet ne ki po keny, ne ineendet ko Chesawilyet ak ko Setani, ak korat ineendet kenyiisyek eliphuut agenge,

³ ak kowiirchi ineendet keriinget ne ma igoksei, ak koger, ak kong'ooch paragunnyi, si mata koberber pororyosyek kogeny, agoi kogeskei kenyiisyek eliphuut agenge. Ye ibata nooto kityaach ne matya.

⁴ Ak ki ageer ng'echerogap laitornatet, ak kitebee icheek, ak ki kigoochi icheek korwooch. Ak ki ageer saboonwegap icheek che ki kitil metowek amu paornateetap Jeso, ak agobo ng'olyootap Kamuktaindet, ak icheek che ki ma kolasu tyondo, anan kanamwennyi, ak che ki ma nyoor perutyet eng' togoochikwak anan eng' eunekwak; ak kisopcho ak kolaitoran kobooto Kristo kenyiisyek eliphuut.

⁵ Ma sapcho che kiga kobek agoi kogeskei kenyiisyek eliphuut agenge. Niito ko ng'eetyeet ne po tai.

⁶ Paibai ak ko tiliil ne tinyei yamdaet eng' ng'eetyeet ne po tai. Mabou icheek meet ne po aeng'; ago egu icheek tisiigap Kamuktaindet ak ko po Kristo, ak kolaitoran ak ineendet kenyiisyek eliphuut agenge.

Kewiirchin oindet araraita ne po maat

⁷ Ye igeskei kenyiisyek eliphuut agenge, kityaach Setani komong' eng' korgorennyi,

⁸ ak komong' koberber pororyosyek che miitei luukwek ang'wan che po ng'wony, Gog ak Magog, koyumji icheek lugeet; che tee koiitennywa ng'aniegap nyanjet.

⁹ Ak kotogosta koyom ng'wony ak koyiem ye mi che tiliileen, ak nganaseet ne chamat; ak ki choorgei maat eng' kipsengwet, ak kobeel icheek.

¹⁰ Ak ki kiwiirchi chesawilyet ne ki iberber icheek araraitap maat ak koik che laldos, ole miitei ak icheek tyondo ak maotyot ne po lembech; ak kinyaliili peet ak kemoi agoi koigeny ak koigeny.

Kirwooget ne po let

¹¹ Ki ageer ng'echereet ne oo ak ko leel ne po laitornatet, ak ineendet ne kitebee, ne kimwee togeennyi ng'wony ak kipsengwet; ama ki sikyi ole tebee.

¹² Ak ki ageer che ki kobek, che eecheen ak che mengeechen, kotonondos eng' taitap ng'echereetap laitornatet; ak ki kiyaat bukuisyek. Ki kiyat kora bukuit age, nooto ko bukuitap saboondo. Ak ki kirwookyi che ki kobek eng' tuguuk che kiga kisirchi bukuisyechooto, ko uu poisyonikwak.

¹³ Ak kigon nyanjet che ki kobek che ki mi oriitinnyi; ak kigon meet ak ye mi che ki kobek, icheek che ki kobek che ki mi oriitinnywa, ak ki kirwookyi chii age tugul ko uu poisyonikyik.

¹⁴ Ak ki kiwiirchi meet ak ye mi che ki kobek, araraitap maat. Niito ko meet ne po aeng', araraitap maat.

¹⁵ Ak ngot kenyoor chii age tugul ne ki ma kisirchi bukuitap saboondo, kewiirchin araraitap maat.