NG'ANG'UTYET 2 - Bukuit Ne Tilil

Ng'aleek agobo kaniset ne mi Epheso

¹ “Sirchi malaikaiyat ne po kaniset ne mi Epheso, ileenji: “Mwaei tuguuchu ineendet ne namei kecheik tisap eng' eunnyi ne po tai, ineendet ne wendote kwenutap keelyek tisap che po taisyek che po thahabu:

² Angen poisyoniguk, ak poisyeng'ung' ne nyigiis ak muitaeng'ung'. Angen ale memuuchi imuite agobo piik che yaacheen, ak kiityem icheek che kuuregei che kiyooktoi ago ma chooto, ak ki inai ile kiplembechonik.

³ Angen kora ale itinye muitaet ak ki imuite agobo kainennyu, ak meng'ete.

⁴ Ago ating'enen ng'olyoo: ale ki imete chamyeng'ung' ne po tai.

⁵ Ibwaat anyun ole ki ibute, ak isigu, ak iyai poisyonik che po tai. Ngot ko mesigu, anyoonjin ak anemu keldap taing'ung' eng' komostanyi.

⁶ Ago itinye ni: ale iweche poisyonigap Nikolaitik, che aweche agane.

⁷ “Ineendet ne tinyei itit, kogas kiit ne mwachin Kabuuset ne Tiliil kanisosyek. Ineendet ne iterteeri, agoochini koam che po keetitap saboondo ne mi Paradiso ne po Kamuktaindet.

Ng'aleek agobo kaniset ne mi Smyrna

⁸ “Ak isirchi malaikaiyatap kaniset ne mi Smyrna, ileenji: “Mwaei tuguuchu ineendet ne po tai ak ko ne po let, ne kime ak kosap kogeny:

⁹ “Angen nyalildang'ung' ak panandang'ung' nganda ii mogoryo. Angen chombilisyetap icheek che mwaei kole ki Yahudik, nga icheek ko sinagogitap Setani.

¹⁰ Ameiywei nyalilwogik che neegit inyooru. Machei chesawilyet kotoorchi korgoreet alak eng' okweek si kobiit ketyemak; ak osich nyalilda eng' peetuusyek taman. Egu ne kiyani agoi meet, si agoonin kuutweet ne po saboondo.

¹¹ “Ineendet ne tinyei itit, kogas kiit ne mwachin Kabuuset ne Tiliil kanisosyek. Ineendet ne iterteeri koma nyooru ng'wanindo eng' meet ne po aeng'.

Ng'aleek agobo kaniset ne mi Pergamo

¹² “Ak isirchi malaikaiyatap kaniset ne mi Pergamo, ileenji: “Mwaei tuguuchu ineendet ne tinyei rotwetap chok ne ng'atiben komoswek tuwai:

¹³ “Angen ole imenye, ole mi ng'echereetap laitornatet ne po Setani. Iname kainennyu miising', ama ieesye kayanennyu, agot eng' peetuusyegap Antipa paoryandennyu, nenyu ne po iman, ne ki kibar eng' kwenung'wong', ole menyei Setani.

¹⁴ Ago ating'enen ng'aleek tutigin: itinye alak eng' olooto che isubi kaneetisyetap Balaam, ne ki ineet Balak konde kanagutyet taitap piigap Israel, si koam tuguuk che kigoochin kanamonik ak kosokso.

¹⁵ Itinye aginye ko uu nooto alak che isubi kaneetisyetap Nikolaitik.

¹⁶ Sigu anyun! Ngo ma uu nooto, anyoonjin achogu, ak anyoo aborye icheek eng' rotwetap chok ne po kutinnyu.

¹⁷ “Ineendet ne tinyei itit, kogas kiit ne mwachin Kabuuset ne Tiliil kanisosyek. Ineendet ne iterteeri, agoochini che po mana che ung'ootiin, ak agoochi koita ne leel, ak ki kisirchi koyata kainet ne leel, ne ma ingen chii kobatee ineendet ne taachei.

Ng'aleek agobo kaniset ne mi Thyatira

¹⁸ “Ak isirchi malaikaiyatap kaniset ne mi Thyatira, ileenji: “Mwaei tuguuchu Weeriitap Kamuktaindet, ne tinyei koonyek che uu liplibenetap maat, ak ko uu keelyekyik sugunwet ne sitaat.

¹⁹ “Angen poisyoniguk, angen chamyeng'ung' ak kayaneng'ung', otisyeng'ung' ak muitaeng'ung', ak angen ale chaang' poisyoniguk che po let kosiir che po tai.

²⁰ Ago ating'enen ng'olyoo: ale ichamjini kobogoryot Jesebel, ne kuuregei maotyo; ak koneeti otwogikyuk ak kogoigoi kosokso, ak koam tuguuk che kigoochin kanamonik.

²¹ Ki agoochi ineendet poroindo ale si kosik; ago ma chamei kosik eng' soksennyi.

²² Ogeero, awirchini itoogut, ak icheek che ibegei kobooto ineendet koba nyalilda ne oo, ngot ko masik eng' poisyonikyik.

²³ Abare lagokyik meet; si konai kanisosyek tugul kole aneendet ne isyachi kabwaatutik ak mugulelwek, ak agoochini age tugul eng' okweek ko uu poisyonikwok.

²⁴ “Ago amwaiwok okweek che oo ng'etunotiin eng' Thyatira, tugul che ma tinyei kaneetisyoni, che ma ingen tuguuk che po oriit che po Setani, ko uu ye mwaei icheek; ale ma andook mileet age.

²⁵ Ago onam miising' nooto otinye kot aitu.

²⁶ “Ak ineendet ne iterteeri, ak koriibei poisyonikyuk agoi kagesunet, kotun agoochini kimnateet koboi pororyosyek:

²⁷ ak koboi eng' koroktap karnet; ko uu ye kituei tereenigap cheptereniot komengegitu;

²⁸ ko uu ye ki ataach agane eng' Abba. Agoochini ineendet taboiyat ne po karon.

²⁹ “Ineendet ne tinyei itit, kogas kiit ne mwachin Kabuuset ne Tiliil kanisosyek.