NG'ANG'UTYET 19 - Bukuit Ne Tilil

¹ Kingo pata tuguuchu, agas kiit ne uu kutit ne oo ne po tuiyet ne oo eng' kipsengwet, kole, “Haleluya! Po Kamuktaindet nenyo yetunet, toroornatet, ak kamuktaet;

² amu po iman ak ko po imanda kirwoogutikyik; amu kagorwookyi chepkugoniot ne oo, ne ki imurwon ng'wony eng' soksennyi, ak kagoyaakta mugetuut ne po korotiigap otwogikyik eng' eutap kwonyooto.”

³ Ak ki mwa kogeny ne po aeng' kole, “Haleluya! Togostoi iyetanyi koigeny ak koigeny.”

⁴ Ak ki ibutyi ng'wony poisyek tiptemu ak ang'wan che saptos ak kolas Kamuktaindet ne tebee ng'echereetap laitornatet, komwaei koleen, “Amen! Haleluya!”

Poiboiyet ne po Katunisyetap Aarwet

⁵ Ak ki mong' kutit eng' ng'echereetap laitornatet, kole, “Olasu Kamuktaindet nenyo, okweek tugul otwogikyik che oiywei ineendet, che mengeechen ak che eecheen.”

⁶ Ak ki agas kiit ne uu kutitap tuiyet ne oo, ak ko uu cheetap peek che chaang', ak ko uu cheetap tuloosyek che kiimeen, kole, “Haleluya! Amu laitorani Kiptaiyat Kamuktaindennyo Ne po Kamuktaet.

⁷ Ongeboiboitu ak kigaske miising', ak kigoochi toroornatet ineendet. Amu kagoit katunisyetap Aarwet, ak kagochopkei osotyonnyi.

⁸ Ki kigoochi ineendet kolaachkei eng' katanit ne karaaran, ne leel kot ak ko tiliil.” Amu katanit ne karaaran ko poisyonigap imanda che po piik che tiliileen.

⁹ Ak koleenjo, “Sir ile: Poiboen icheek che keguurchin igoortap katunisyetap Aarwet.” Ak ki leenjo, “Chu ko ng'aleegap iman che po Kamuktaindet.”

¹⁰ Ak ki abutyi keelyekyik alasu ineendet. Ak koleenjo, “Ameyai ko uu nooto! Ki otwogik tuwai kobooto tupchosyeguk che tinyei paornateet ne po Jeso. Ilasu Kamuktaindet: amu paornateetap Jeso ko Kabuusetap maonateet.”

Paraisiit ne leel

¹¹ Ak ki ageer koyaatak kipsengwet, ak ogeero, paraisiit ne leel, ak ineendet ne kitebee, ko ki kiguuree Ne Kiyani ak ko Iman; ak korwoochi ak koyaei lugeet eng' imanda.

¹² Ak ki uu konyekyik liplibenetap maat, ak ki mi metinnyi naryosyek che chaang'; ak kotinyei kainet ne ki kisir, ne ma mi chii ne ingen kobatee ineendet ineegei.

¹³ Ak ki ilaachi ngoryeet ne ki kiroong'ji korotiik: ak kiguure kainennyi “Ng'olyootap Kamuktaindet.”

¹⁴ Ak ki isubi ineendet lugoosyek che mi kipsengwet che ketei paraisisyek che leelach, kolaachi katanisyek che korooron che leelach kot ak ko tiliileen.

¹⁵ Ak ki mang'une kutinnyi rotwetap chok ne ng'atip, si kobiit kobire pororyosyek: ak koboi icheek eng' kirokto ne po karnet: ak kotyech sabibuk eng' ole kituisye che po koroomnateet ne po nereegegap Kamuktaindet Ne po Kamuktaet.

¹⁶ Ak kotinyei eng' ngoryennyi ak eng' kubestanyi kainet ne ki kisir kole, “Laitoryat ne po Laitorinik ak Kiptaiyat ne po Kiptainik.”

¹⁷ Ak ki ageer malaikaiyat kotononi eng' asiista; ak kiwaach eng' kutit ne oo, koleenji toriitik tugul che tirirendos eng' kwenutap kipsengwet, “Obwa otuiyechi igoorto ne oo ne po Kamuktaindet,

¹⁸ si kobiit oam poorwegap laitorinik, ak poorwegap kiptainigap lugeet, ak poorwegap piik che kiimeen, ak poorwegap paraisisyek ak che po che laanyei icheek, ak poorwegap piik tugul, che ityagotiin ak che ratotiin, ak che mengeechen ak che eecheen.”

¹⁹ Ki ageer tyondo ak laitorinigap ng'wony kobooto lugosyekwak, ko kaiyomogei koyai lugeet ak ineendet ne kiga tebee paraisiit, ak lugeennyi.

²⁰ Ak ki kinam tyondo, kobooto maotyondonooto ki po lembech ne kiyaei kaboorunoik eng' tainnyi, ne ki iberberi che kiga kinde perutyetap tyondo, ak icheek che ki ilasu kanamwennyi. Ki kiwiirchi chooto tuwai kosaptos araraita ne po maat ne lalei eng' koik che laldos.

²¹ Ak ki kibar icheek che ki ng'et eng' rotwetap chok ne ki mang'une kutitap ineendet ne kitebee paraisiit, ak kibiyong'so toriitik tugul eng' poorwekwak.