NG'ANG'UTYET 18 - Bukuit Ne Tilil

Luuleetap Babilon

¹ Kingo pata tuguuchu, ageer malaikaiyat age kochoorugei eng' kipsengwet, ne tinyei kimnateet ne oo; ak kooluu ng'wony eng' liilindanyi.

² Ak kiwaach eng' kutit ne kiim kole, “Kagoluul, kagoluul Babilon ne oo, ak kagoek ole menyei oik, ak irimeetap tamirmiryet age tugul ne murwoon, ak irimeetap toriit age tugul ne murwoon ak ne kiwechei.

³ Kagobutyo pororyosyek tugul amu divaigap koroomnatetap soksennyi. Ak kisokso laitorinigap ng'wony ak ineendet, ak ki ek mogoreek chemung'arainigap ng'wony eng' kimnateetap kaseretap tuguukyik.”

⁴ Ak ki agas kutit age kobunu kipsengwet, kole, “Omang'une ineendet, okweek piikyuk, si moyamde tengekwogikyik, si monyooru korotwekyik.

⁵ Amu ki koit tengekwogikyik kipsengwet, ak kagobwaat Kamuktaindet tengekwogikyik.

⁶ Oweekyi ineendet ko uu ye ki koyai, ak oyaakyi ineendet konyil aeng' ko uu poisyonikyik; kigombet ne kiburuge, oburukyi ineendet konyil aeng'.

⁷ Ko uu ye ki iloskei ak koser tuguukyik, ogoochi ineendet ng'wanindo ak arageneet ko uu nooto. Amu mwaei ineendet eng' muguleldanyi kole, ‘Atebye ko aa laitoryat ne kwondo, ma aa mosok ak ma koi ageer riirek.’

⁸ Nooto anyun itu korotwekyik eng' peetuunak, meet, riirek, ak rubeet; ak kebeel ineendet eng' maat kogeskei; amu kiim Kiptaiyat Kamuktaindet ne ki irwookyi ineendet.”

⁹ Ak riirtos ak koteeitos agobo ineendet laitorinigap ng'wony, che kisokso ak kotebyei kobooto ineendet eng' kaseretap tuguuk, ye keer iyetap lalennyi,

¹⁰ kotonondos eng' ole loo amu kayweetap ng'wanindanyi, koleen, “Pwo! Pwo! Wee nganaseet ne oo, Babilon, nganaseet ne kiim! Amu kait kirwoogeng'ung' eng' sait agenge.”

¹¹ Ak koriirtos chemung'arainigap ng'wony ak koteeitos agobo ineendet, amu ma koalei chii kogeny tuguukwak che aldoi;

¹² tuguugap thahabu, ak fedha, ak koik che pichiien eng' alet, ak sonoek che korooron, ak katanisyek che korooron, ak ngoroik che arusen ne piriir, ak aririsyek, ak ngoroik che piriireen; ak keetit age tugul ne nyamdut, ak kiit age tugul ne po kelegap peeleek, ak kiit age tugul ne ki kiyae keetit ne po kamanuutyet ne oo, ak che po sugunonik, ak kariik, ak koik che leelachen;

¹³ ak kinamon, ak nyamdutik, ak nyamdutik che kibeelei, ak mwanik che ki ilegei, ak tuguuk che nyamdut, ak divaik, ak mwanik, ak peek che ng'ootiin che tambulul, ak nganuuk, ak tuuga, ak keechiirek; ak paraisisyek ak chepkichutisyek ak mutwoorik; ak saboonwegap piik.

¹⁴ Ak ki kobetenen logoek che kigase myat saboondang'ung' ak ki kobetenen tuguuk tugul che anyiny ak che myachen, ama kenyooru kogeny agoi.

¹⁵ Tonondos eng' ole loo chemung'arainigap tuguuchuuto, che ki ek mogoreek eng' ineendet, amu kayweetap ng'wanindanyi, ak koriirtos ak koteeitos;

¹⁶ koleen, “Pwo! Pwo! Wee nganaseet ne oo, ne ki ilaachi katanisyek che korooron, ak ngoroik che arusen ne piriir ak che piriireen, ne ki kilelesanjine thahabu ak koik che po kamanuutyet ne oo ak sonoek che korooron!

¹⁷ Amu kabetyo eng' sait agenge mogornatosyek che eecheen che uu chooto.” Ak kitonondos eng' ole loo kiptaiyat age tugul ne po moinget, ak age tugul ne punei moinget kowendi oldo tugul, ak piik che poisyei eng' melisyek, ak tugul che nyooru porotennywa eng' nyanjet,

¹⁸ ak koriiryo ye kingo keer iyetap lalennyi, kole, “Mi nee ne kergei ak nganasani oo?”

¹⁹ Ak kolakyin temburyek metowekwak, ak kowaachei, koriirtos ak koteeitos, koleen, “Pwo! Pwo! Wee nganasani oo, ole ki egune mogore piik tugul che ki tinyei melisyekwak eng' nyanjet amu ooindap kamanuutyennyi! Amu kait ng'emisyennyi eng' sait agenge.

²⁰ “Paibaitu eng' ineendet inyee kipsengwet, ak okweek che oo tiliileen, ak okweek che kiyooktoi, ak okweek maotik; amu kagorwookyi `Kamuktaindet ineendet amu okweek.”

²¹ Ak kisut malaikaiyat ne kiim koita ne uu koitap pai ne oo, ak kowiirchi nyanjet, kole, “Ki wiirtoi Babilon nganaseet ne oo, kobut ko uu nooto eng' kabutet ne oo, ama kenyooru kogeny agoi.

²² Ama kegasei kogeny eng' inyee putigap ketubosyek ak che tyendos ak putigap ndurerusyek ak che kuutei iryagook; ama kenyooru musogindet ne po musoknateet age tugul eng' inyee kogeny agoi; ama kegasei cheetap koitap pai eng' inyee kogeny agoi;

²³ ama kokweng'sei lapkeiyetap tait eng' inyee kogeny agoi; ama kegasei kutitap sandet ak murereet eng' inyee kogeny agoi; amu ki piik che eecheen che po ng'wony chemung'arainiguk; amu ki kiberber pororyosyek tugul eng' panisyeng'ung'.”

²⁴ Ak ki kinyoorchi ineendet korotiigap maotik ak che po piik che tiliileen, ak che po tugul che ki kibar eng' ng'wony.