NG'ANG'UTYET 16 - Bukuit Ne Tilil

Taabook tisap che po nereegegap Kamuktaindet

¹ Ki agas kutit ne oo kobunu Hekaluut, koleenjin malaikaisyechooto tisap, “Oba, oroong'ji emet taabook tisap che po nereegegap Kamuktaindet.”

² Ara ki wo malaikaiyat ne po tai, koroong'ji emet taabeennyi; ak ki ek mook che yaach ak ko ng'woneen eng' piik che tinyei perutyetap tyondo, ak che ki saaei kanamwennyi.

³ Kiroong'ji malaikaiyat ne po aeng' taabeennyi nyanjet; ak ki ek korotiik ko uu che po chii ne kagome; ak kime age tugul ne sabei, agot tugul che mi nyanjet.

⁴ Kiroong'ji malaikaiyat ne po somok taabeennyi ainoosyek ak kondametusyegap peek; ak ki ek korotiik.

⁵ Ak ki agas malaikaiyat ne po peek komwa kole, “Ii po imanda, Inyee ne Tiliil, inyee ne imi ak ko ki imi, amu ki irwooch ko uu nooto.

⁶ Amu kitumda korotiigap piik che tiliileen ak che po maotik, ak kaigoochi icheek korotiik koe; amu nyoljin icheek ko uu nooto.”

⁷ Ak ki agas kaptisisyet komwa kole, “Uu nooto, ee, Kiptaiyat Kamuktaindet, Ne po Kamuktaet, po iman ak ko po imanda kirwoogutiguk.”

⁸ Ak ki roong'ji malaikaiyat ne po ang'wan taabeennyi asiista; ak ki kigoochi kobeel piik eng' maat.

⁹ Ki kibeel piik eng' peelet ne oo; ak ki chup kainetap Kamuktaindet ne tinyei kimnateet koboi korotwechuuto; ak ma sik si kobiit kogoochi toroornatet.

¹⁰ Kiroong'ji malaikaiyat ne po muut taabeennyi ng'echereetap tyondo; ak koimenit laitornatennyi; ak kinyei ng'elyebwekwak amu ng'wanindo,

¹¹ ak ki chup Kamuktaindet ne po kipsengwet amu ng'waninwekwak ak mookwak; ama sik eng' poisyonikwak.

¹² Ak kiroong'ji malaikaiyat ne po lo taabeennyi aineet ne oo, nooto ko Yufrets; ak ki teenyo peekyik, si kobiit kochobok ooreetap laitorinik che punu kong'asiis.

¹³ Ak ki ageer tamirmirik che yaach somok che uu mororochik, komang'une kutitap maswetit, ak eng' kutitap tyondo, ak eng' kutitap maotyot ne po lembech:

¹⁴ amu chooto ko tamirmirigap oik, che yaei kaboorunoik; che pendi kaplaitorinigap ng'wony komugul, si koyum icheek koba lugeet eng' peetuut ne oo ne po Kamuktaindet, Ne po Kamuktaet.

¹⁵ “Ogeero, anyoone ko uu choriin. Paibai ineendet ne riipsei, ak koriibei ngoroikyik, si mawendot aach ngor, ak kegeer kalilanennyi.”

¹⁶ Ak koyum icheek eng' ole kiguure Har-Magedon eng' kutitap Yahudik.

¹⁷ Ak kiroong'ji malaikaiyat ne po tisap taabeennyi soet; ak ki mong' kutit ne oo eng' Hekaluut, kobun ng'echereetap laitornatet, kole, “Kagosulda!”

¹⁸ Ak ki piit ilotik, ak kutusweek, ak tuloosyek; ak ki piit potanet ne oo ne po ng'wony, ne ki tomo kobiitu kobooch ngo piit piik eng' ng'wony, potanet ne oo, ne kiim kot.

¹⁹ Ak kipcheak nganaseet ne oo koek kebeberwek somok, ak kilulyo nganasoogap pororyosyek: ak ki kibwaat Babilon ne oo eng' taitap Kamuktaindet, si kobiit kigoochi ineendet kigombet ne po divaigap koroomnatetap nereegekyik.

²⁰ Ak ki mwei emet age tugul ne ki ikween peek, amata kegeer tuloonook.

²¹ Ak kororokyi piik koik che eecheen che po ropta che rorogu eng' kipsengwet, che tee nyigiisindanywa talendait: ak ki chup `piik Kamuktaindet amu koroitap koichooto po ropta; amu oo miising' koroitanyi.