NG'ANG'UTYET 12 - Bukuit Ne Tilil

Kwondo ak maswetit ne oo

¹ Ak ki took kaboorunet ne oo eng' kipsengwet; kwondo ne ki ilaachi asiista, ak komi arawet keluutap keldebesaikyik, ak ki mi metinnyi kuutweetap kecheik taman ak aeng'.

² Ak kitamono: ak kowaachei, kotinyei ng'wanindap sigisyet, ak eng' ng'wanindo komachei kosigiis.

³ Ak ki took kaboorunet age eng' kipsengwet; ak ogeero, maswetit ne oo ne piriir, ne tinyei metowek tisap ak kuinoik taman, ak ki miitei metowekyik naryosyek tisabu.

⁴ Ak ichuuti katutyennyi kebeberta agenge eng' somok ne po kecheigap kipsengwet, ak kowiirchi ng'wony. Ki tonon maswetit eng' taitap kwonyooto ne kimachei kosigiis, kole si ye sigis, koam lakweet.

⁵ Ak ki sich lakweet ne weeriit, ne tuun pou pororyosyek tugul eng' koroktap karnet: ak ki kimut lakweennyi kwo ole mi Kamuktaindet, agoi ng'echerennyi ne po laitornatet.

⁶ Ak ki mwei kwonyooto kwo surkwen, ole kiting'e komosta ne kiga kochopchi Kamuktaindet, si kobiit kobai ineendet eng' olooto peetuusyek eliphuut agenge pogol aeng' ak tamanwogik lo.

⁷ Ak ki piit lugeet eng' kipsengwet: ki wo Mikael kobooto malaikaisyekyik kobargei ak maswetit; ak ki yai lugeet maswetinooto ak malaikaisyekyik;

⁸ ago ma iterteeris, amata kosich oldanywa kogeny eng' kipsengwet.

⁹ Ak ki kiturur maswetinooto oo konyo ng'wony, ereneet ne po keny, ne kiguure Chesawilyet ak keguure Setani, kaberberindetap ng'wony komugul; ki kiturur konyo ng'wony, ak ki kiturur malaikaisyekyik kobooto ineendet.

¹⁰ Ak ki agas kutit ne oo eng' kipsengwet, kole, “Kagonyo nguno yetunet, ak kamuktaet, ak laitornatetap Kamuktaindet nenyo, ak kimnateetap Kristo nenyi; amu kagetururto kataamindetap che kitupche kwo ng'wony, ne itaami icheek eng' taitap Kamuktaindet nenyo peet ak kemoi.

¹¹ Ak ki iterteer `icheek ineendet amu korotiigap Aarwet, ak amu ng'olyootap paornatennywa; ama cham saboonwekwak agoi meet.

¹² Nooto anyun oboiboitu, okweek kipsengwet, ak okweek che omenye olooto. Pwo agobo ng'wony ak nyanjet, amu kachoorgei chesawilyet konyo ole omi, kotinyei nereeknateet ne oo, amu ingen kole tinyei peetuusyek che ng'ering' kityo.”

¹³ Ak ye kingo keer maswetit kole kageturur konyo ng'wony, kous kwonyi kasichei weeriit.

¹⁴ Ak ki kigoochi kwonyooto kebebaik aeng' che po kipsiichit ne oo, si kobiit kotirirene kwo surkwen agoi oldanyi, ole kibae, eng' peetuusyek, ak peetuusyek alak, ak kebebertap peetuusyek, koistoegei togeetap ereneet.

¹⁵ Ak king'ut ereneet peek eng' kutinnyi che tee aineet, kosube kwonyooto, kole si kobiit koip ineendet ainonooto.

¹⁶ Ak kitoret ng'wony kwonyooto, ak ki yaat kutinnyi ng'wony, ak kolugui aineet ne kang'utu maswetit eng' kutinnyi.

¹⁷ Ak ki nereekyi maswetit kwonyooto, ak kwo kobargei ak kesweekyik che ki ng'et, che riibei ng'atuutigap Kamuktaindet, ak kotinyei paornateetap Jeso,

¹⁸ ak kitonone ng'aniegap nyanjet.